– قازاقستاندا باي ءارى تابىستى بولۋدىڭ مىزعىماس شارتتارى ەشكىمگە جاسىرىن ەمەس – اركىمنىڭ يەلىگىڭدە نە بانك, نە پايدالى قازبا ورنى بولۋى كەرەك. مۇنداي يگىلىكتەردى بيلىكتەگىلەرگە – شەنەۋنىكتەرگە, ولاردىڭ تۋىستارىنا نە دوستارىنا ءبىر تابان جاقىن بولساڭ يەلەنەسىڭ. كورپوراتيۆتىك, وليگارحيالىق ەكونوميكا مەملەكەتتىڭ باسەكەگە قابىلەتتىلىگىن تومەندەتەدى. ونى باسقاراتىندار بالاما, قايتا وڭدەۋ سەكتورلارىنىڭ دامۋىنا, كاسىپورىن قوجالارىنىڭ مىقتى تابىنىڭ قالىپتاسۋىنا قىزىعۋشىلىق تانىتپايدى. ساناۋلىلاردىڭ پايداعا كەنەلىپ, ميلليونداعان ادامنىڭ كەدەيلىكتە كۇن كەشۋى – ناعىز تەڭسىزدىك. ءبىز ەگجەي-تەگجەي تەكسەرۋ جۇرگىزىپ, ۇرلانىپ, وففشورعا جاسىرىلعاننىڭ ءبارىن ەلىمىزگە قايتارۋعا مىندەتتىمىز. جوبامەن ەسەپتەگەننىڭ وزىندە ۇلتتىق قوردىڭ ۇشەۋىنە تەڭ كەلەتىن الەۋەت شەتەلدە جاتقانى ءمالىم. بۇل – ازاماتتارىمىزدىڭ اقشاعا شاققانداعى بولاشاعى. ەكونوميكالىق رەسۋرستاردىڭ زاڭسىز شوعىرلانۋىنا قارسى ءىس-قيمىل ماسەلەلەرى جونىندەگى ۆەدومستۆوارالىق كوميسسيا قۇرامىنا ءبىزدى قوسۋىن تالاپ ەتەمىز. ءبىز 90-جىلدارداعى جەكەشەلەندىرۋدەن مول پايداعا كەنەلگەن ءىرى بيزنەسمەندەردى IPO وتكىزىپ, ورتا كاسىپكەرلەرگە اكتيۆتەرىن ءبولىپ بەرۋىن تالاپ ەتەمىز, ولار بولسا ەكونوميكامىزدىڭ جاڭا بۋىنىنا اينالادى. بانكروتقا ۇشىراسا, ەكونوميكاعا زيانى ءتيىپ كەتەتىن كومپانيالار بىزگە قاجەت ەمەس. ستراتەگيالىق قور مەن جەر قويناۋىن باقىلاۋ ءۇشىن تابيعي قازبالاردى ءوندىرۋ جانە ەكسپورتتاۋمەن اينالىساتىن سالالاردى بىرتە-بىرتە مەملەكەتتەندىرۋگە بايقاۋ جاريالانادى. ۇلتتىق وڭدەۋشى ونەركاسىپكە باسىمدىق بەرىلەدى. ادىلەتسىز كەلىسىمشارتتار قايتا قارالاتىن بولادى, ال ەلىمىز ءۇشىن كەسىرىن تيگىزەتىن شارتتار بۇزىلاتىن بولادى. بارلىق كەلىسىمشارت تەك قازاقستان اۋماعىندا جاسالادى جانە تىركەلەدى, ال ولار بويىنشا بارلىق تولەمدەر تەك وتاندىق رەزيدەنت بانكتەر ارقىلى جۇرگىزىلەدى. بۇل ماسەلە پارتيانىڭ باستى نازارىندا, – دەدى كانديدات.
