قاڭتاردا قانشا التىن قۇيما ساتىلدى؟

حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسىن ۇلتتىق بانك 2017 جىلى ىسكە قوسقان بولاتىن. باعدارلاما قولعا الىنعالى جالپى سالماعى 3,9 توننا تارتاتىن 115 209 التىن قۇيما ساتىلىپتى.

التىن قۇيمالار بەس ءتۇرلى سالماقتا ۇسىنى­لادى: 5, 10, 20, 50 جانە 100 گ. ساتىپ الۋشىلار اراسىندا سۇرانىسقا يە ءتۇرى – 10 گرامدىق التىن قۇيما. جالپى ساتىلعان قۇيمالار اراسىندا ونىڭ ۇلەسى 26% – 29 723 دانا. ودان كەيىن 5 گرامدىق التىن قۇيما – 25 538 دانا (22%), 100 گرامدىق قۇيما – 23 460 دانا (20%), 20 گرامدىق قۇيما – 23 131 دانا (20%) جانە 50 گرامدىق قۇيما – 13 357 دانا (12%). التىن قۇيمالار الماتى, استانا جا­نە اتىراۋ قالالارىندا كوپ ساتىلعان.

التىن قۇيما – سەنىمدى ينۆەستيتسيا قۇرالى. التىن قۇيمالار نارىعىنداعى وتىمدىلىكتىڭ باستى كەپىلى – بانك پەن بانكتىك ەمەس ايىرباستاۋ پۋنكتتەرى كليەنتكە اقشانى سول كۇنى تولەي وتىرىپ, قۇيمالاردى كەرى ساتىپ الا الادى.

باعدارلاما باستالعاننان بەرى ەكىنشى دەڭگەيلى بانك­تەر مەن بانكتىك ەمەس جەكەلەگەن پۋنكتتەر جالپى سالما­عى 484,6 كيلو بولاتىن 19 228 التىن قۇيمانى كەرى ساتىپ الدى, بۇل – جالپى ساتىلعان قۇيمالاردىڭ 17%-ى. كە­رى ساتىپ الىنعان قۇيما­لاردىڭ بارلىعى ۇلتتىق بانك­تىڭ اۋماقتىق فيليالدارى ارقىلى حالىققا ساتىلادى.

ءاربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى, ميكروتەكست ءھام جيەگى بار) جانە ارنايى قوراپپەن شىعادى. سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعاپ تۇراتىن قوراپ ساپا سەرتيفيكاتى بولىپ تا سانالادى. سوندىقتان التىن قۇيمانى ۇقىپپەن ساقتاپ, قورابىن بۇلدىرمەۋگە كەڭەس بەرەمىز.

التىن قۇيمالاردى Halyk Bank-تەن, ەۋرازيالىق بانكتەن, Jusan Bank-نەن, تسەنتركرەديت بانكىنەن, سونداي-اق بانكتىك ەمەس جەكەلەگەن پۋنكتتەردەن دە ساتىپ الىپ, كەرى ساتۋعا بولادى.