مۇنداي ءىس-شارالاردى كومەك ەمەس مۇمكىندىك دەپ سيپاتتاۋىمنىڭ سەبەبى, مەملەكەتتىڭ قولداۋى ناتيجەسىندە ءارتۇرلى ۇيىمدار مەن بىرلەستىكتەردىڭ مۇمكىندىگى شەكتەۋلى جانداردى قوعامعا ارالاستىرۋى ءوز جەمىسىن بەرىپ وتىر. سول ارقىلى ولار قوعامنىڭ بەلدى مۇشەسىنە اينالىپ كەلەدى. ءبىلىم الادى, جۇمىسقا تۇرادى, ۇناعان كاسىبىمەن اينالىسادى.
مۇگەدەكتىگى بار جانداردى قولداۋ ماقساتىندا جۋىردا شىمكەنتتەگى م.اۋەزوۆ اتىنداعى وڭتۇستىك قازاقستان ۋنيۆەرسيتەتىندە عىلىم جانە جوعارى ءبىلىم ءمينيسترىنىڭ ينكليۋزيۆتى ءبىلىم بەرۋ جونىندەگى شتاتتان تىس كەڭەسشىسى تاڭساۋلە سەرىكوۆپەن كەزدەسۋ بولدى. مينيسترلىك وكىلى جيىندا ۋنيۆەرسيتەت قابىرعاسىندا ءبىلىم الىپ جۇرگەن جۇزدەن اسا مۇمكىندىگى شەكتەۋلى جانعا ءبىلىم, عىلىمنىڭ مۇمكىندىكتەرىن پاش ەتتى, زاماناۋي تەحنولوگيالار عاسىرىندا ساپالى ءبىلىم الۋ الەۋمەتتىك ساناتىنا قاراماستان بارلىق جاس ءۇشىن ماڭىزدى ەكەنىنە توقتالدى.
سونىمەن قاتار ۋنيۆەرسيتەتتىڭ ەرەكشە ستۋدەنتتەردى وقىتۋعا ساي بەيىمدەلگەن ينفراقۇرىلىمىمەن تانىستى. ينكليۋزيۆتى ءبىلىم بەرۋ ورتالىعىنداعى قۇرال-جابدىقتاردى تاماشالادى. ماسەلەن, مۇندا زاعيپ جانە كورۋ قابىلەتى ناشار جاندارعا ارنالعان تيفلوقۇرىلعىلار بار. سول سەكىلدى ەكرانداعى ۆيزۋالدى ەلەمەنتتەردى دىبىستايتىن NVDA باعدارلاماسى ورناتىلعان كومپيۋتەرلەر مەن كەز كەلگەن كىتاپتى دىبىستاپ, وقىپ بەرە الاتىن Clearreader جانە SARA™ CE وقۋ جانە جازۋ تەحنيكالارى قويىلعان. ورتالىقتا وتىرىپ ستۋدەنتتىڭ وزىندىك جۇمىستارىن جانە باسقا دا قوسىمشا تاپسىرمالاردى ورىنداۋعا جاعداي جاسالعان. عالامتور ىسكە قوسۋلى تۇر. مۇنداعى تەحنيكالاردى قالاعان ۋاقىتتا پايدالانۋعا بولادى. ەمتيحانداردى تاپسىرۋ ىڭعايلى بولۋ ءۇشىن كىتاپتاردى دىبىستايتىن تەحنيكا http://lib.ukgu.kz/ web-سايتىندا ورناتىلعان. ونى كۇندىز-ءتۇنى قولدانا بەرۋگە مۇمكىندىك بار.
كەزدەسۋدە ورتالىقتاعى كىتاپحانانى دامىتۋ ءبولىمىنىڭ مەڭگەرۋشىسى ءلاززات وتەعۇلوۆا شىمكەنت قالالىق كوزى كورمەيتىن جانە ءالسىز كورەتىن ازاماتتارعا ارنالعان ارنايى جانە باسقا دا كىتاپحانالارمەن كەلىسىمشارت جاسالعانىن, سونىڭ ناتيجەسىندە ۋنيۆەرسيتەتتە ءبىلىم الىپ جاتقان مۇمكىندىگى شەكتەۋلى جاندار ساپالى بىلىمگە قول جەتكىزگەنىن مالىمدەدى.
تاڭساۋلە سەرىكوۆ مۇمكىندىگى شەكتەۋلى جان ەكەنىنە قاراماستان, Phd دارەجەسىندەگى پروفەسسور اتانىپ وتىرعانىن ايتتى. سونداي-اق ول ستۋدەنت جاستارعا ءوزىنىڭ ومىرلىك تاجىريبەسىمەن ءبولىسىپ, الدىنان كەزدەسكەن قيىندىقتاردى قالاي جەڭگەنىن اڭگىمەلەپ, جەتىستىككە جەتۋ ءۇشىن جىگەرلى, تالاپشىل بولۋعا شاقىردى.
سونىمەن بىرگە كەزدەسۋدە مارتەبەلى قوناققا بيىك ماقساتتاردى باعىندىرعان جاستاردىڭ جەتىستىكتەرى باياندالدى. ماسەلەن, اسقات احمەدجان بۇگىندە «قولارباداعى بي» سپورتىنان الەمنىڭ ءۇش دۇركىن چەمپيونى, ازامات جاقسىمبەتوۆ ەڭبەگىنىڭ ناتيجەسىندە مۇگەدەكتەر ارباسىنان اياققا تۇرعان.
ءوزىم بولسام فيلولوگيا فاكۋلتەتىنىڭ جۋرناليستيكا ماماندىعى بويىنشا 2-كۋرس ستۋدەنتىمىن. كورۋ قابىلەتىمنىڭ ناشارلىعىنا بايلانىستى 1-توپتاعى مۇگەدەكپىن. م.اۋەزوۆ اتىنداعى وڭتۇستىك قازاقستان ۋنيۆەرسيتەتى ماعان ساپالى ءبىلىم الۋمەن قاتار, وقۋ ورداسىندا ءجۇرىپ ۇلكەن جوبالاردى جۇزەگە اسىرۋىما مۇمكىندىك بەردى. ءۇش جىلعا جۋىق ۋاقىت Youtube, Tiktok الەۋمەتتىك جەلىلەرىندە كونتەنت جاسايتىن ساراپشىلارمەن جوبالارعا پروديۋسەرلىك ەتەمىن. ءوزىڭ قالاعان ارمانعا ۇمتىلساڭ, ناقتى ماقساتتار قويىپ سونى ورىنداۋ جولىندا تەر توكسەڭ, ءبارى دە سەن ويلاعانداي بولاتىنىنا كوزىم جەتتى. ەڭ باستىسى ماقسات پەن ۇمتىلىس بولسا, مۇمكىندىكتىڭ شەكتەۋلىلىگى ادامعا كەدەرگى ەمەس. سول ءۇشىن كەزدەسۋدە بەلسەندى ستۋدەنت رەتىندە الەۋمەتتىك جەلىنى دۇرىس پايدالانا بىلسەك, تابىس تابۋعا زور مۇمكىندىك اشىلادى دەگەن ويىممەن ءبولىستىم.
وسىنداي قىزىقتى كەزدەسۋلەر, مۇمكىندىگى شەكتەۋلى جانداردى جۇمىسقا بەيىمدەۋگە باعىتتالعان ءتۇرلى قولداۋ شارالارى تۇراقتى تۇردە ءوز جالعاسىن تاۋىپ وتىرسا, نۇر ۇستىنە نۇر بولار ەدى.
بەكجان نۇرادين,
م.اۋەزوۆ اتىنداعى وقۋ ستۋدەنتى
