كەزدەسۋ بارىسىندا جۇمىسپەن قامتۋمەن قاتار, ازاماتتاردىڭ نەسيە بەرەشەگى تۋرالى ماسەلەلەر كوتەرىلدى. كانديداتتىڭ مالىمەتىنشە, 7,4 ملن ازاماتتىڭ باسىندا كەم دەگەندە ءبىر نەسيە بار. جىل سايىن بۇل كورسەتكىش ارتپاسا, تومەندەگەن ەمەس. ماسەلەن, سوڭعى 12 ايدىڭ قورىتىندىسى بويىنشا نەسيە العان وتانداستارىمىزدىڭ سانى 962 مىڭعا ارتقان.
– بۇل ماسەلەنى تۇرعىنداردىڭ الەۋمەتتىك جاعدايىن ارتتىرۋ ارقىلى رەتتەۋگە بولادى. ول ءۇشىن نارىقتا سۇرانىسقا ساي ماماندىقتاردى وقىتۋدى مىقتاپ قولعا العان ءجون. وقۋ اقىسىن سۋبسيديالاۋ سياقتى قارجىلىق پروبلەمالاردىڭ دا شەشىلۋى ماڭىزدى, – دەدى ماقسۇت ناسيبۋلوۆ.
كەزدەسۋدە جاستاردى باسپانامەن قامتۋ ماسەلەسى دە ءسوز بولدى. ەلىمىزدىڭ باراز وڭىرىندە, سونىڭ ىشىندە الماتى قالاسىندا جاستار ءۇشىن باسپانا – ەڭ وزەكتى ماسەلە. قالادا پاتەردىڭ باعاسى تىم جوعارى. ارينە, ەڭبەك جولىن ەندى عانا باستاعان جاستار بىردەن پاتەر ساتىپ الا المايتىنى تۇسىنىكتى. بىراق سولاي ەكەن دەپ ەش قارەكەتسىز قول قۋسىرىپ وتىرۋعا بولمايدى. جاستاردىڭ باسپانا الۋىنا جان-جاقتى جاعداي جاساۋ كەرەك. بۇل – مەملەكەتتىڭ باستى مىندەتىنىڭ ءبىرى. وسى ورايدا جالپىۇلتتىق سوتسيال-دەموكراتيالىق پارتياسى جەرگىلىكتى اكىمدىكتەر ءتيىمدى تاسىلدەر ويلاستىرۋى كەرەك دەپ ەسەپتەيدى.
– اكىمدىك جالعا بەرىلەتىن تۇرعىن-ءۇي سالۋ ءۇشىن ينۆەستورلارعا تارتىمدى بولاتىن ءتيىمدى تاسىلدەردى ويلاستىرۋعا ءتيىس. بىراق جالدامالى ۇيلەر تىم قىمباتقا تۇسپەۋى كەرەك. ونداي پاتەرلەر, ەڭ الدىمەن, قولجەتىمدى بولۋعا ءتيىس. جالپى, جاستار ءۇشىن باسپانالى بولۋ قول جەتپەس ارمانعا اينالماۋى كەرەك. باسىندا باسپاناسى بار جاستاردىڭ ەرتەڭگى كۇنگە دەگەن سەنىمى ارتادى. قالالاردا تۇرعىن-ءۇي تاپشىلىعىن ازايتۋ – اسا ماڭىزدى مىندەت, – دەيدى كانديدات.
ماقسۇت ناسيبۋلوۆ حالىقتىڭ باسىم بولىگىنىڭ كەدەيلىگى تۋرالى ماسەلەنى كوتەردى. ونىڭ ايتۋىنشا, حالىقتىڭ جاپپاي كەدەيلىگى مەملەكەتكە وتە قىمباتقا تۇسەدى. «بۇل رەتتە, ماسەلەنى شەشۋ ءۇشىن تىڭ تەتىكتەردى ىسكە قوسۋ ماڭىزدى», دەدى ول.
