سۋرەتتى تۇسىرگەن ەرلان ومار, «EQ»
بۇل تۋرالى استانا قالالىق ءبىلىم باسقارماسىنىڭ باسشىسى قاسىمحان سەنعازىەۆ مالىمدەدى. جاعىمدى جاڭالىقتى كوپشىلىك جاقسى قابىلدادى. ويتكەنى ەلوردادا ءبىلىم وردالارىنىڭ جەتىسپەيتىنى بارشاعا ءمالىم.
– سوڭعى ءۇش جىلدا ەلوردادا 64 500 ورىندىق 36 مەكتەپ پايدالانۋعا بەرىلدى. جىل سايىن وقۋشىلار كونتينگەنتى 21 مىڭعا ارتىپ كەلەدى. بۇل جىلىنا شامامەن 10 مەكتەپتى پايدالانۋعا بەرۋ كەرەك دەگەندى اڭعارتادى. قازىرگى تاڭدا ەلوردادا 236 757 بالا كونتينگەنتى بار 162 جالپى ءبىلىم بەرەتىن مەكتەپ جۇمىس ىستەيدى. قالامىزدا بالا سانى شامادان تىس 18 مەكتەپ, ءۇش اۋىسىمدى 8 مەكتەپ بار. وقۋشىلاردىڭ ورىن تاپشىلىعى 26 مىڭ ورىندى قۇرايدى, – دەدى قاسىمحان سەنعازىەۆ.
ونىڭ ايتۋىنشا, 2029 جىلعا دەيىن ماتەريالدىق-تەحنيكالىق بازانى نىعايتۋ ماقساتىندا 58 ءبىلىم بەرۋ ۇيىمىندا كۇردەلى جوندەۋ, 105 ءبىلىم بەرۋ نىسانىندا اعىمداعى جوندەۋ جۇمىستارى جۇرگىزىلەدى. سونداي-اق 302 روبوتتەحنيكا, حيميا, فيزيكا, بيولوگيا, STEM ءپان كابينەتتەرى الىنادى.
– ەلوردانىڭ ورتا ءبىلىم بەرۋ جۇيەسىنىڭ كادرلىق قۇرىلىمىندا 13 903 مۇعالىم بار. ونىڭ 62 پايىزى پەداگوگيكالىق اتتەستاتتاۋ قورىتىندىسى بويىنشا جاڭا فورماتتاعى بىلىكتىلىك ساناتتارىن الدى. نەگىزگى جالاقىلارىنا 30 پايىزدان 50 پايىزعا دەيىن قوسىمشا تولەم تولەنەدى. جاڭا مەكتەپتەردىڭ قۇرىلىسىنا بايلانىستى, ونىڭ ىشىندە «جايلى مەكتەپ» ۇلتتىق جوباسى اياسىندا ەلوردادا 7 120 مۇعالىمگە قاجەتتىلىك تۋىندايدى, – دەدى باسقارما باسشىسى.
گۇلالەم ەسقاليەۆا
