جۋالىدا كارتوپ جاقسى وسەدى

باسقا-باسقا, جۋالى جەرىندە كارتوپ جاقسى وسەدى. بۇعان, بالكىم, وسى توپىراقتىڭ قۇنارلى, اۋا رايىنىڭ قولايلى بولۋى دا اسەر ەتەتىن بولار, ءسىرا. ايتەۋىر, سوڭعى جىلدارى جۋالى جۇرتى داقىلدىڭ وسى تۇرىنەن كوپ ءونىم الۋدى جاقسى مەڭگەرىپ كەلەدى. بۇگىندە ءوڭىردىڭ تاۋلى-قىرلى دالاسىندا كارتوپ وسىرۋمەن 520-عا جۋىق شارۋاشىلىق اينالىسادى. ارينە, بارلىعى دەرلىك ۇساق شارۋاشىلىقتار, بىراق, ەشقايسىسى دا بۇل كاسىپ­­تەرىنەن قول ۇزگىسى كەلمەيدى. سودان بولار وتكەن جىلى جۋالىلىقتار كارتوپ القابىن 1910 گەكتارعا جەتكىزسە, بيىل بۇل كورسەتكىشتى 2110 گەكتاردان اسىرىپتى. سول كوپ شارۋاشىلىقتىڭ ىشىندە «زىليحانىڭ» شوقتىعى بيىك. وسى ءىستىڭ كوزىن تاۋىپ, تىنىمسىز ەڭبەگىنىڭ ارقاسىندا كوپ ءونىم الۋعا قول جەتكىزىپ جۇرگەن «زىليحا» شارۋا قوجالىعى وتكەن جىلى رەسەي مەن گوللانديادان كارتوپ اكەلگەن بولاتىن. ەندى بيىل بۇل ىسكە نەمىستىڭ وزىق تەحنولوگياسىن ەندىرىپ, كارتوپتى گوللاند ادىسىمەن ەكتى. جالپى سىيىمدىلىعى 1 800 توننانى قۇرايتىن ەكى قويماسى بار بولعاندىقتان قىستى كۇندەرى وبلىس تۇرعىندارىنىڭ سۇرانىسىن قامتاماسىز ەتۋمەن قاتار ونىمدەرىن ەلىمىزدىڭ تۇكپىر-تۇكپىرىنە تاسىمالدايدى. ارينە, ءاربىر تىرلىكتى ساراپتاپ, مول ءونىمنىڭ سىرى مەن قىرىن زەرتتەۋدەن جالىقپايتىن «زىليحا» كارتوپتان كوپ پايدا بارىن بىلگەننەن بولار, جىل سايىن القاپ كولەمىن ۇلعايتىپ كەلەدى. «وتكەن جىلى 120 گەكتار جەرگە ەكتىك, بيىل كارتوپ القابىن تاعى 30 گەكتارعا ۇلعايتتىق. بىلتىرعى ونىمنەن 450 توننا كارتوپتى تۇقىم رەتىندە الىپ قالدىق تا, باسقالارىن ساتىپ, تابىس تاپتىق», دەيدى شارۋا قوجالىعىنىڭ توراعاسى كەرىمقۇل بەگاليەۆ. بۇگىندە ەلىمىزدە كارتوپ شا­رۋا­شىلىعىن دامىتۋ ءۇشىن كوپ جەڭىلدىكتەر جاسالۋدا. بۇل, ارينە, جۋالىلىقتاردىڭ كارتوپتان كوپ ءونىم الۋىنا جاقسى جاعداي جاسايدى. «زىليحا» شارۋا قوجالىعى كەلەسى جىلى 5 مىڭ توننا ءونىمدى ساقتايتىن قويما مەن جەمىس-جيدەكتى وڭدەيتىن شاعىن زاۋىت سالۋدى جوسپارلاپ وتىر. ورالحان ءداۋىت, «ەگەمەن قازاقستان». جامبىل وبلىسى. سۋرەتتى تۇسىرگەن اقادىل رىسماحان.