مۋزەي قىزمەتكەرلەرى مۇراعات دەرەكتەرى مەن اقساقالداردان جينالعان اۋىزشا دەرەكتەر نەگىزىندە «قازاق» گازەتىنىڭ تارالۋىنا ىقپال ەتكەن اقتوبەلىكتەر تۋرالى تىڭ مالىمەتتەردى ورتاعا سالدى. قۇندى دەرەك – سول زاماندا ورىنبور, قازان, ترويتسك, سانكت-پەتەربۋرگتە وقىعاندار, اۋقاتتىلار مەن بولىستاردىڭ گازەت تاراتۋ مەن باسپاحانا شىعىندارىنا بەرگەن جاردەمى تۋرالى دا ايتىلىپ ءوتتى. «قازاق» گازەتىنىڭ 110 جىلدىعىنا ارنالعان ءىس-شارانى وتكىزۋگە مەكتەپ وقۋشىلارى دا اتسالىستى. اقتوبە قالاسىنداعى ۇ.ق ۇلىمبەتوۆ اتىنداعى №64 ورتا مەكتەپ پەن م.ارىن اتىنداعى قارعالى ورتا مەكتەبىنىڭ وقۋشىلارى ازىرلەگەن «قازاق» گازەتى – 1918 جىل» اتتى ساحنالىق كورىنىس وتە اسەرلى شىقتى.
ۇلتتىڭ جوعىن جوقتاعان باسىلىم ورىنبور قالاسىندا جارىق كورىپ, ەل ىشىندەگى تىلەكتەس-نيەتتەس ازاماتتاردىڭ كومەگىمەن قازاق دالاسىنىڭ تۇكپىر-تۇكپىرىنە كىدىرىسسىز تارادى. حح عاسىردىڭ العاشقى ونجىلدىعىندا اقتوبە قالاسى مەن ورىنبوردىڭ اراسىنا وتاربا جۇرە باستاعاندا, باسىلىمنىڭ العاشقى ساندارى نيەتتەس جانداردىڭ كومەگىمەن ەلگە جەتەتىن. بۇل تۋرالى قازاقستاننىڭ قۇرمەتتى ءجۋرناليسى يدوش اسقار, ولكەتانۋشى بەكارىستان مىرزاباي, تاريح عىلىمدارىنىڭ دوكتورى, پروفەسسور ۇزاقباي يسماعۇلوۆ, وبلىستىق مۇراعاتتىڭ جەتەكشى عىلىمي قىزمەتكەرى دۋمان سارباەۆ, فيلوسوفيا عىلىمدارىنىڭ كانديداتى ۇمبەتحان سارسەمبين, قالالىق جاس تۋريستەر ستانساسىنىڭ قوسىمشا ءبىلىم بەرۋ پەداگوگى ديليارا ىسقاق ءسوز سويلەپ, تاريحى تاعىلىمدى «قازاق» گازەتىنىڭ ەلىمىزدىڭ ءباسپاسوز سالاسىندا الار ورنى ەرەكشە ەكەنىن ايتىپ, شارانى ۇيىمداستىرۋشىلارعا العىستارىن ءبىلدىردى.
اقتوبە وبلىسى
