شەتەلدىك ساراپشىلار نە دەيدى؟

جاقىندا VII استانا ەكونوميكالىق فورۋمى اياسىندا وتكەن «مەملەكەتتىك قىزمەت پەرسونالىن باسقارۋ: احۋالى مەن بولاشاعى» اتتى جاھاندىق كونفەرەنتسياسىندا الەمنىڭ كوپتەگەن ساراپشىلارى  ءسوز الىپ,  قازاقستاندىق مەملەكەتتىك قىزمەت مودەلىن جوعارى باعالادى. اۋرەليا بۋشەز, ەۋروپا وداعىنىڭ قازاقستانداعى وكىلدىگىنىڭ باسشىسى: – قازاقستاندا مەملەكەتتىك قىزمەتتىڭ جاڭا مودەلى قولدانىلۋدا. بۇل نەگىزگى ءۇش قاعيداتقا سۇيەنەدى: قوعام الدىندا ەسەپ بەرۋ, اشىقتىق جانە مەريتوكراتيا. وسى باعىتتا كۇردەلى جۇمىستار اتقارىلىپ, جەتىستىكتەرگە قول جەتكىزىلدى. ماسەلەن, مەملەكەتتىك قىزمەت بويىنشا ايماقتىق حابتىڭ قۇرىلعانىن ايرىقشا اتاپ وتۋگە بولادى. قازاقستاننىڭ ايماقتاعى باسقا مەملەكەتتەرگە كورسەتىپ وتىرعان ۇلگىسى قۇندى. بۇل وزگە ەلدەردىڭ مەملەكەتتىك قىزمەت سالاسىن جاڭعىرتۋعا سەرپىن بەرەدى. ارينە, ەۋروپا وداعى قازاقستاننىڭ مەملەكەتتىك قىزمەت سالاسىن جاڭعىرتۋ بويىنشا جەتىستىكتەرىن تولىق مويىنداي وتىرىپ, وعان ودان ءارى قاراي قولداۋ بىلدىرەدى. چەستەر نيۋلاند, اقش مەملەكەتىك قىزمەت پەرسونالدى باسقارۋ ءوفيسى جانىنداعى باسقارۋشىلار بىلىكتىلىگىن ارتتىرۋ فەدەرالدى ينستيتۋتىنىڭ بۇرىنعى ديرەكتورى, وڭتۇستىك كاليفورنيا ۋنيۆەرسيتەتىنىڭ پروفەسسورى: – قازىرگى تاڭدا قازاقستاننىڭ مەملەكەتتىك قىزمەت جۇيەسى – الەمدەگى, ونىڭ ىشىندە اقش-تى قوسا العاندا, ەڭ وزىق ۇلگىلەردىڭ ءبىرى. سەبەبى, ساياسي لاۋازىمداعىلار سانى قىسقارتىلىپ, اكىمشىلىك مەملەكەتتىك قىزمەتكەرلەر سانى ارتتىرىلعان. 70-جىلدارى اقش ساياسي قىزمەتشىلەر سانىن كوبەيتۋ جولىن ۇستانعان بولاتىن. ال بۇل ماسەلەدە امەريكالىق ۇكىمەت بەلگىلى ءبىر دەڭگەيدە ولقىلىق جىبەردى. بىزگە كەرىسىنشە سىزدەردىڭ مەملەكەتتىك قىزمەت جۇيەسىندەگىدەي باعىتتا جۇمىس جاساۋ كەرەك ەدى. مانۆەل باداليان, ارمەنيا رەسپۋبليكاسى ازاماتتىق قىزمەت كەڭەسىنىڭ توراعاسى:  – ءبىزدىڭ ساراپشىلارىمىز قازاقستاندىقتارمەن بىرگە جۇمىس ىستەيتىن بولادى. ارمەنيانىڭ مەملەكەتتىك قىزمەت سالاسى قازاقستاننىڭ تاجىريبەسى مەن كومەگىنىڭ ارقاسىندا جەتىلە تۇسپەك. بىزدە ءالى قول جەتكىزبەگەن ماسەلەلەر قىزىقتىرىپ وتىر. مىسالى, قازاقستان مەملەكەتتىك قىزمەتكەرلەردى سارالاپ, «ا» كورپۋسى سياقتى مەملەكەتتىك قىزمەت دەڭگەيلەرىن انىقتادى. ءبىزدى مەملەكەتتىك قىزمەت سالاسىن جەتىلدىرۋ ءۇشىن كوپتەگەن ەلدەردىڭ تاجىريبەسىمەن تانىستىق. سونىڭ ىشىندە قازاقستاننىڭ ۇلگىسى بىزگە وتە جاقىن كورىندى. سوندىقتان جاڭادان «ۆەلوسيپەد» ويلاپ تاپپاي-اق, قازاق ۇلگىسىن الۋدى ءجون كوردىك. قازاقستان مەن ارمەنيانىڭ مەملەكەتتىك قىزمەت سالاسىنداعى ىنتىماقتاستىق الەۋەتى زور. ءبىز قازاقستاننىڭ وسى سالاداعى زاڭنامالارى, ءادىس-تاسىلدەرىمەن تانىستىق. بۇل ءۇشىن ءوز ريزاشىلىعىمدى بىلدىرگىم كەلەدى. ستەفان حلاۆاچەك, اۆستريا ساۋدا پالاتاسى ەكونوميكالىق دامۋ ينستيتۋتىنىڭ ەكس-دي­رەك­تورى, باسقارۋ جانە ۇيىم­داستىرۋدى دامىتۋ ماسەلەلەرى بويىنشا باس ساراپشى: – اسىرەسە, مەملەكەتتىك قىزمەت بويىنشا استانا ايماقتىق حاب تۋرالى يدەيا وتە جاقسى! ويتكەنى, مەملەكەتتىك قىزمەتتى رەفورمالاۋ بارىسىندا اقپارات تاراتۋ, تاجىريبە ءبولىسۋ وتە ماڭىزدى. مەملەكەتتىك قىزمەتكەرلەر اراسىندا كوبىرەك اقپارات الماسىپ, ۇنەمى بىلىكتىلىكتەرىن ارتتىرىپ وتىرۋ قاجەت. ال سول بىلىمدەردى, اقپاراتتاردى ءبىر جەردەن تاراتاتىن ورتالىقتىڭ بولۋى وتە قىزىقتى. توپتامانى دايىنداعان سەرىك ءپىرنازار, «ەگەمەن قازاقستان».