جيىنعا «اق جول» دەموكراتيالىق پارتياسى قوعامدىق بىرلەستىگىنىڭ توراعاسى ازات پەرۋاشەۆ, وبلىستاردىڭ, استانا, الماتى جانە شىمكەنت قالالارىنىڭ اۋماقتىق سايلاۋ كوميسسيالارى بەينەكونفەرەنتسيا رەجىمىندە قوسىلدى جانە بۇقارالىق اقپارات قۇرالدارىنىڭ وكىلدەرى قاتىستى.
ورتالىق سايلاۋ كوميسسياسىنىڭ توراعاسى نۇرلان ءابدىروۆ ەلىمىزدە تىركەلگەن 7 ساياسي پارتيانىڭ بارلىعى پارتيالىق تىزىمدەر بويىنشا پارلامەنت ءماجىلىسى دەپۋتاتتارىنىڭ سايلاۋىنا قاتىسۋعا جىبەرىلگەنىن اتاپ ءوتتى. سونداي-اق ول 6 اقپاندا وسك-عا پارلامەنت ءماجىلىسى دەپۋتاتتارىن سايلاۋعا پارتيالىق ءتىزىمدى ۇسىنۋ تۋرالى «اق جول» دەموكراتيالىق پارتياسىنىڭ قۇجاتتارى تاپسىرىلعانىن ەسكە سالدى. ورتالىق سايلاۋ كوميسسياسى سايلاۋ زاڭناماسىنا سايكەس كانديداتتاردىڭ كونستيتۋتسيا جانە سايلاۋ تۋرالى كونستيتۋتسيالىق زاڭمەن قويىلاتىن تالاپتارعا سايكەستىگىن اڭىقتاۋ بويىنشا ءتيىستى راسىمدەر جۇرگىزدى.
ورتالىق سايلاۋ كوميسسياسىنىڭ مۇشەسى اسىلبەك سماعۇلوۆ «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 89-بابىنا سايكەس تىركەۋگە ءبىر ساياسي پارتيادان ءبىر عانا ءتىزىم جىبەرىلەتىنىن, وعان ساياسي پارتيالار اراسىندا بولىنەتىن دەپۋتاتتىق مانداتتاردىڭ بەلگىلەنگەن سانىنىڭ 30 پايىزدان اسپايتىن ادامدار سانى ەنگىزىلگەنىن حابارلادى. پارتيالىق تىزىمدە ايەلدەر, جاستار جانە مۇگەدەكتىگى بار ادامدار سانى جيىنتىق بويىنشا وعان ەنگىزىلگەن ادامداردىڭ جالپى سانىنىڭ كەمىندە 30 پايىزىن قۇراۋعا ءتيىس.
بەلگىلى بولعانداي, «اق جول» دەموكراتيالىق پارتياسى 54 ادامنان تۇراتىن پارتيالىق ءتىزىمدى ۇسىنعان. تىزىمدەگى 18 كانديدات ايەلدەر, جاستار جانە مۇگەدەكتىگى بار ادامدار ساناتقا جاتادى, ياعني تالاپقا سايكەس 33,3 پايىزدى قۇرايدى. پارتيالىق تىزىمگە ەنگىزىلگەن بارلىق ادام كونستيتۋتسيا مەن سايلاۋ تۋرالى كونستيتۋتسيالىق زاڭنىڭ تالاپتارىنا سايكەس كەلەدى.
اسىلبەك سماعۇلوۆ پارتيالىق تىزىمدەردى ۇسىنعان ساياسي پارتيالار پارتيالىق تىزىمگە ەنگىزىلگەن ءاربىر ادام ءۇشىن زاڭنامادا بەلگىلەنگەن ەڭ تومەنگى جالاقىنىڭ ون بەس ەسەلەنگەن مولشەرىندە ورتالىق سايلاۋ كوميسسياسىنىڭ شوتىنا سايلاۋ جارناسىن ەنگىزەتىنىن حابارلادى. پارلامەنت ءماجىلىسى دەپۋتاتتارىنىڭ الدىڭعى سايلاۋىندا داۋىس بەرۋگە قاتىسقان سايلاۋشىلاردىڭ 5 جانە ودان دا كوپ پايىزىن العان ساياسي پارتيالار سايلاۋ جارناسىن تولەمەيدى. 2021 جىلعى قاڭتاردا وتكەن پارلامەنت ءماجىلىسى دەپۋتاتتارىنىڭ سايلاۋىندا «اق جول» دەموكراتيالىق پارتياسى سايلاۋشىلاردىڭ 10,95 پايىزىن جينادى. وسىعان بايلانىستى اتالعان پارتيا سايلاۋ جارناسىن تولەۋدەن بوساتىلادى.
كوميسسيا مۇشەلەرى سايكەستىكتى انىقتاۋ جانە تىركەۋ تۋرالى ءتيىستى حاتتامالارعا قول قويعاننان كەيىن «2023 جىلعى 19 ناۋرىزعا تاعايىندالعان پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىندا «اق جول» دەموكراتيالىق پارتياسى قوعامدىق بىرلەستىگىنىڭ پارتيالىق ءتىزىمىن تىركەۋ تۋرالى» قاۋلى قابىلدادى. تىركەلگەن كانديداتتار ءتيىستى كۋالىكتەرىن الدى.
