«ەرەكشە تەاتردىڭ» ەلورداداعى پرەمەراسى

ونەرلەرىمەن قالىڭ كورەرمەندى ءتانتى ەتكەن ەرەكشە تەاتردىڭ ەرەك­شە اكتەرلەرى كوپشىلىكتىڭ ىقى­لاسىنا بولەندى. سپەكتاكل ىم-يشارا تىلىندە وينالدى. بۇل قو­يى­لىمنىڭ بىرەگەيلىگى ەكەنى انىق.

ءوز سوزىندە پالاتا سپيكەرى «ەرەك­شە تەاتر» جوباسىنىڭ ينكليۋزيۆتى قوعام قۇرۋ جولىن­داعى ماڭىزدىلىعىنا توقتال­دى. سونداي-اق سەناتتىڭ وسى با­عىت­تاعى زاڭ شىعارۋ جۇمىستارىنىڭ ناتيجەلەرىنە نازار اۋداردى.

«ەرەكشە قاجەتتىلىگى بار ازا­ماتتاردى قولداۋ، كەدەرگىسىز، ين­كليۋزيۆتى ورتا قالىپتاستىرۋ – مەم­لەكەتىمىزدىڭ جانە قوعامنىڭ الدىندا تۇرعان ماڭىزدى مىندەت­تەردىڭ ءبىرى. پرەزيدەنتىمىز قاسىم-جومارت توقاەۆ بۇل ماسە­لەگە ءاردايىم باسا ءمان بەرىپ، ۇنەمى نازاردا ۇستاپ كەلەدى. بىلتىر ەلىمىزدە «مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋ تۋرالى» زاڭ قابىلداندى. الداعى ۋاقىتتا قاجەت بولسا، تاعى دا زاڭنامالىق جۇمىستاردى قولعا الۋعا دايىنبىز. «ەرەكشە تەاتر» جانە «Sensitive» بي تەاترى سياقتى جوبالار مۇگەدەكتىگى بار ازاماتتاردىڭ، اسىرەسە بالالاردىڭ بويىنداعى شىعارماشىلىق قابى­لەتتەرىن دامىتۋعا، ولاردىڭ ورتاعا بەيىمدەلىپ، ومىردەن ءوز ورىندارىن تابۋىنا ۇلكەن مۇمكىندىك بەرەتىنى ءسوزسىز. سوندىقتان مۇنداي باس­تامالاردى قولداۋدىڭ ماڭىزى زور»، دەدى ماۋلەن اشىمباەۆ.

سەنات توراعاسى قويىلىم جو­عارى دەڭگەيدە بولعانىن جانە اكتەرلەر ءوز رولدەرىن شەبەر سومداعانىن دا اتاپ ءوتتى. سونداي-اق ول ەلوردالىق كورەرمەندەرگە كەرەمەت كوڭىل كۇي سىيلاعان ونەر ۇجىمىنا، «Sensitive» بي ان­سامبلىنە، ونىڭ كوركەمدىك جەتەك­شىسى ولگا روستوۆششيكوۆاعا جانە دارىندى بالالارعا ۇنەمى قولداۋ كورسەتىپ كەلە جاتقان قۇرالاي تۇس­پەكوۆا باستاعان ۇلتتىق دەلفي كوميتەتىنە العىس ءبىلدىردى.

سونىمەن قاتار ماۋلەن اشىم­باەۆ پەتروپاۆل قالاسىندا تەاتر ۇجىمىمەن العاش كەزدەسكەن ساتتە العان اسەرىمەن ءبولىستى. سول كەز­دەسۋدەن كەيىن جاس ونەرپازداردى ەلورداعا شاقىرعانىن دا جەتكىزدى. پالاتا سپيكەرى ونەر ۇجىمىنىڭ نەگىزى قالانعانىنا 5 جىلعا جۋىق ۋاقىت وتكەنىن، وسى ارالىقتا جوبا ناعىز تەاتر رەتىندە قالىپتاسىپ، الەمنىڭ بىرقاتار ەلىندە وتكەن كوپتەگەن حالىقارالىق كونكۋرستا توپ جارعانىن اتاپ ءوتتى.

ۇيىمداستىرۋشىلاردىڭ اي­­تۋىن­شا، تەاتر قۇرۋ يدەياسى – ۇلت­تىق دەلفي ويىندارى اياسىنداعى پارادەلفي اتالىمىنىڭ لايىقتى جالعاسى. بۇل باستامانىڭ باستى ماقساتى – ەرەكشە قاجەتتىلىگى بار شىعارماشىل جاستارعا جۇيەلى تۇردە قولداۋ كورسەتۋ. سونىڭ ناتيجەسىندە 2018 جىلى جاستار جىلى قارساڭىندا ۇلتتىق دەلفي كوميتەتى «ەرەكشە تەاتر» جوباسىن قولعا العان. مۇگەدەكتىگى بار بالالار مەن جاستارعا تەاتر ونەرىن ۇيرەتۋدىڭ تاجىريبەلىك جانە ادىستەمەلىك نەگىزىن قالىپتاستىرۋ – وسى جوبانىڭ ماڭىزدى مىندەتى.

قازىرگى تاڭدا تەاتر پەتروپاۆل قالاسىنداعى ەستۋ قابىلەتى تومەن بالالارعا ارنالعان مەكتەپ-ينتەرناتتا ورنالاسقان. ول جەردە مۇگەدەكتىگى بار 25 اكتەر جۇمىس ىستەيدى. ولاردىڭ باسىم بولى­گى – پارادەلفي اتالىمى بويىن­شا ءتۇرلى بايقاۋدا توپ جار­عان جاستار. فينالدىق سىندا ونەر كورسەتكەن تاعى 300-دەن استام جاس ازامات دەلفي ونەر مەكتەبىندە ءوز شىعارما­شى­لىق­تارىن شىڭداپ ءجۇر. سونداي-اق ولار ۇلتتىق دەلفي قازىلار القاسىنىڭ مۇشەلەرىنە تالىمگەر رەتىندە دە قولداۋ كورسەتەدى.