تولە بي اتىنداعى مەكتەپتىڭ وقۋشىسى ارتەم مۋراۆەۆ اۋىل ماڭىنداعى قىردا ويناپ ءجۇرىپ, بەيمالىم تاڭبالارى مەن كەراميكالىق بۇيىمدارى بار بىلەزىكتى كوزى شالادى. بۇدان كەيىن تاعى ءبىر مەكتەپ وقۋشىسى قاسىمحان جۇماباي قولا سىرعالار مەن بىلەزىكتەردى قولىنا تۇسىرگەن. كونە داۋىرلەردىڭ كوزىندەي بولعان جادىگەرلەردى تاپقان جاسوسپىرىمدەر كەزدەيسوق كەزىككەن ولجالارى تۋرالى ۇلكەندەرگە حابارلايدى.
– اتالعان جادىگەرلەردى دوستارىممەن ويناپ جۇرگەن كەزدە تاۋىپ الدىم. جەر قىرتىسىنان جىلتىراعان الدەبىر زاتتى كوزىم شالدى. قاراپ تۇرماي قازىپ الۋعا تىرىستىم. قولعا تۇسىرگەننەن كەيىن جادىگەردى مەكتەپكە اپاردىم, – دەيدى ارتەم مۋراۆەۆ.
تورتكۇل توبەسىنەن تابىلعان كونە جادىگەرلەر تاريحي مۇرا ەكەنى تالاس تۋدىرمايدى. عالىمداردىڭ پايىمىنا سالساق, ءبىر كەزدەرى بۇل ماڭدا قارلۇق قاعاناتى ۇستەمدىك قۇرعان ەكەن. ال ءبىر عاسىردان كەيىن قاراحاندىقتار كەلگەن كورىنەدى.
– وسى توبەگە كوتەرىلگەن ادام اۋىلىمىزدىڭ تاماشا تابيعاتىنا تامساناتىنى داۋسىز. تورتكۇلگە شىققاندا اياق استى جاتقان تاريحي جادىگەردى تاپتىم. كەيىن مەكتەپكە اپارىپ تاپسىردىم, – دەيدى قاسىمحان جۇماباي.
مامانداردىڭ سوزىنە سەنسەك, ىقىلىم زاماندا توبە ماڭىندا «اداحنەت» دەگەن اۋىل بولعان. توبە ۇلى جىبەك جولىنىڭ نەگىزگى بولىگىنە جاتپاسا دا, مۇندا ساۋدا-ساتتىق جاقسى دامىعان كورىنەدى.
جامبىل وبلىسى,
جامبىل اۋدانى
