قازاقستاندا پياز ەكسپورتىنا تىيىم سالىندى

ءۇشىنشى ەلدەردىڭ قازاقستاندىق پيازعا دەگەن سۇرانىسى ازيا مەن الەمدەگى ەڭ ءىرى پياز وندىرۋشىلەردىڭ ءبىرى - پاكىستانداعى تابيعي اپاتتارمەن بايلانىستى. بۇل ەلدەگى سۋ تاسقىنى الەمدە، ونىڭ ىشىندە ءبىزدىڭ ەلدىڭ نارىعىندا پياز باعاسىنىڭ وسۋىنە اكەلدى.

قازاقستاننىڭ وڭتۇستىك وڭىرلەرىندە، سونداي – اق وزبەكستاندا ءونىمنىڭ قاتتى ايازدا ءۇسىپ كەتۋى ونىڭ قۇنىنا قوسىمشا سالماق بولىپ وتىر. وسىلايشا پيازدىڭ نەگىزگى وندىرۋشىلەرى ەندى قازاقستاندىق ءونىمدى بەلسەندى تۇردە يمپورتتاپ جاتىر.

سونىمەن قاتار ۇلتتىق ستاتيستيكا بيۋروسىنىڭ مالىمەتى بويىنشا، 2022 جىلى ەلدەگى پيازدىڭ ءونىمى 1،1 ميلليون توننانى قۇرادى. بۇل رەتتە قازاقستاندىقتار جىل سايىن بۇل كولەمنەن 3 ەسە از، ورتاشا ەسەپپەن العاندا 315 مىڭ توننا تۇتىنادى.

اكىمدىكتەردىڭ دەرەكتەرىنە سايكەس بۇگىنگى كۇنى ەلىمىزدە پيازدىڭ راستالعان قورى 152،4 مىڭ توننانى قۇرايدى، بۇل وتكەن جىلعى ەگىننىڭ جالپى كولەمىنىڭ 14% عانا. بۇل كولەم جاڭا ءونىم جينالعانعا دەيىن جەتكىلىكتى، سوندىقتان ەكسپورتقا ەنگىزىلگەن شەكتەۋلەر قازاقستاننان قالعان پيازدى اكەتۋ تاۋەكەلدەرىن بولدىرمايدى.

ايتا كەتۋ كەرەك، رەسپۋبليكادا پيازدىڭ كوتەرمە باعادا ءبىر كەلىسى 150-170 تەڭگەنى قۇرايدى، ال كورشىلەس رەسەي مەن وزبەكستاندا باعا 240 تەڭگە كولەمىندە تۇرادى. سونىمەن قاتار Qaztrade مالىمەتتەرى بويىنشا، وزبەكستان مەن تاجىكستان ءوز ەلدەرىندە پياز ەكسپورتىنا شەكتەۋ قويعان بولاتىن.

ۇكىمەت جاقىن ارادا نارىقتىق جاعدايدى جاقسارتۋ كەزىندە بارلىق شەكتەۋلەردى ۋاقىتىلى الىپ تاستاۋ ءۇشىن ەلدەگى جانە الەمدەگى جاعدايدى مۇقيات قاداعالايدى.

فەرمەرلەر ءۇشىن پياز ەكسپورتىنا تىيىم سالۋدىڭ جاعىمسىز سالدارىن ازايتۋ ءۇشىن بۇگىنگى كۇنى اۋىل شارۋاشىلىعى تاۋارىن وندىرۋشىلەردەن پيازدى اكك ارقىلى تۇراقتاندىرۋ قورلارىنا، سونداي-اق ساۋدا جەلىلەرى ارقىلى اينالىم سحەماسى ارقىلى ساتىپ الۋدىڭ ءارتۇرلى تەتىكتەرى ىسكە اسىرىلىپ جاتىر.