جيىنعا باس اسكەري پروكۋراتۋرانىڭ, قارۋلى كۇشتەردىڭ, باسقا دا اسكەرلەر مەن اسكەري قۇرالىمداردىڭ, جەرگىلىكتى اتقارۋشى ورگانداردىڭ وكىلدەرى, سونداي-اق وبلىستار مەن رەسپۋبليكالىق ماڭىزى بار قالالاردىڭ قورعانىس ىستەرى جونىندەگى دەپارتامەنتتەرىنىڭ باستىقتارى قاتىستى.
قارۋلى كۇشتەر باس شتابىنىڭ باستىعى, گەنەرال-لەيتەنانت مارات قۇسايىنوۆ جالپى اسكەرگە شاقىرۋ مىندەتتەرى ورىندالعانىن جانە شاقىرۋ ناۋقانى ۇيىمداسقان تۇردە وتكەنىن العا تارتتى. 2022 جىلى 35 مىڭعا جۋىق جاس قارۋلى كۇشتەر, مەملەكەتتىك كۇزەت قىزمەتى, شەكارا قىزمەتى, ۇلتتىق ۇلان, توتەنشە جاعدايلار مينيسترلىگى بولىمشەلەرىنىڭ قاتارىن تولىقتىردى. قازىر ولار اسكەري ءىستىڭ قىر-سىرىن ۇيرەنىپ, وتان الدىندا بورىشىن لايىقتى اتقارىپ ءجۇر.
– جىل سايىن وتان الدىندا وزدەرىنىڭ كونستيتۋتسيالىق مىندەتتەرىن ورىندايتىن مىڭداعان ورەندەر اسكەرگە شاقىرۋ كوميسسيالارىنان وتەدى. ال اسكەري ەسەپكە الۋ ۇدەرىستەرىن تسيفرلاندىرۋ, قورعانىس مينيسترلىگىنىڭ eGov.kz پلاتفورماسى ارقىلى قىزمەتتەر كورسەتۋى شاقىرۋ ناۋقانى بارىسىندا ارتىق بيۋروكراتيانى, قاعازباستىلىقتى قىسقارتۋعا جانە سىبايلاس جەمقورلىق تاۋەكەلدەرىن ازايتۋعا مۇمكىندىك بەردى, – دەدى گەنەرال-لەيتەنانت مارات قۇسايىنوۆ.
وتكەن جىلى قارۋلى كۇشتەردىڭ قوعامدىق ۇيىمدارمەن, ونىڭ ىشىندە جيناۋ پۋنكتتەرى مەن اسكەري بولىمدەرگە بارۋ مۇمكىندىگى بار وكىلدەرمەن, ساربازدار انالارىنىڭ كوميتەتىمەن ءوزارا ءىس-قيمىل جولعا قويىلعانى اتاپ ءوتىلدى. بۇل ساربازداردىڭ تۋىستارى مەن جاقىندارىنا, ولاردىڭ اسكەرگە شاقىرىلۋىنان باستاپ, اسكەري ۇجىمداردا ەرەجە مەن ءتارتىپتىڭ بار ەكەندىگىنە جەكە كوز جەتكىزۋگە, سونداي-اق قازاقستان اسكەرىنىڭ احۋالى جايلى تەرىس بولجامدار مەن دەسترۋكتيۆتى قاۋەسەتتەردىڭ الدىن الۋعا مۇمكىندىك بەردى.
سونداي-اق جيىندا اسكەرگە شاقىرۋدى ۇيىمداستىرۋدىڭ وزەكتى ماسەلەلەرى تالقىلاندى. جەتىلدىرۋدى جانە بىرلەسكەن جۇيەلى جۇمىستى قاجەت ەتەتىن اسپەكتىلەرگە ەرەكشە نازار اۋدارىلماق. اتاپ ايتقاندا, بۇل اسكەرگە شاقىرىلۋشىلاردىڭ دەنساۋلىعىن ولاردى سپورتتىق جانە اسكەري-پاتريوتتىق قىزمەتكە تارتۋ ارقىلى مەكتەپ كەزىنەن باستاپ نىعايتۋ.
بۇدان بولەك كەڭەس بارىسىندا قورعانىس مينيسترلىگى پرەزيدەنت تاپسىرماسىنا سايكەس جاستار اراسىندا اسكەري بورىشىن وتەۋگە ىنتاسىن ارتتىرۋ شارالارىن قابىلداعانىن اتاپ ءوتتى. وسىلايشا, قورعانىس ءمينيسترى 40-تان استام جوعارى وقۋ ورنىنىڭ رەكتورلارىمەن كەلىسىم جاساستى. ولار 2023 جىلدان باستاپ مەرزىمدى اسكەري قىزمەت وتكەرگەندەرگە ۇبت ناتيجەلەرىن ەسەپكە الماي, وقۋعا ءتۇسۋ قۇقىعىن بەرۋگە, ال قىزمەت بارىسىندا ەرەكشە كوزگە تۇسكەندەرگە وقۋ ورنى ەسەبىنەن گرانتتار بەرۋگە دايىن.
