تاعى ءبىر دەپ وتىرعانىمىز, وسىدان ءبىر اي بۇرىن مۇز ويىلىپ كەتىپ, اۆتوكولىك سۋ استىنا كەتكەن. ونداعى وقيعادا ايەل ادام كوز جۇمىپ, تۋعان-تۋىستارىنىڭ قابىرعاسى قايىسقان. بۇل جولى مۇز ءۇستىن كۇرەپ بارا جاتقان تراكتور بار-جوعى بەس-التى سەكۋند ىشىندە كوزدەن عايىپ بولدى. مۇز وپىرىلىپ, سۋ استىنا كەتتى. قۇداي ساقتادى. جۇرگىزۋشىسى شيراق ەكەن. شىعىپ ۇلگەردى. ونىڭ ءبارىن الەۋمەتتىك جەلىدە تاراعان بەينەتاسپادان كورىپ, تاڭ بولدىق. بۇعان دەيىن دە قانشاما كولىك, قانشاما ادام مۇز استىنا كەتتى؟! كوپىر قۇرىلىسى اياقتالمايىنشا, بۇل وقيعانىڭ قايتالانا بەرمەسىنە تاعى كەپىلدىك جوق.
ايتەۋىر, بۇل جولى وقىس وقيعادان سوڭ مۇز ۇستىمەن جۇرۋگە ۋاقىتشا تىيىم سالىنىپ, ءتارتىپ ساقشىلارى كۇزەتكە تۇرعان. ولار دا قاشانعى كۇزەتەدى؟! تۇيسىگى بار جۇرگىزۋشى تىيىم سالىنسا, مۇز ۇستىنە وزدىگىنەن دە شىقپاۋى كەرەك.
شىعىستا قالىڭ قار ءتۇستى. ارتىنشا جاڭبىر سەبەلەدى. اۋا تەمپەراتۋراسى +1 گرادۋسقا دەيىن جىلىدى. مۇنداي اينىمالى كۇن رايىندا فيزيكا زاڭدىلىعى بويىنشا, مۇزدىڭ دا تىعىزدىعى وزگەرمەي مە؟! ءسويتىپ, شىتىناپ تۇرعان مۇز ۇستىنە تراكتور دوڭگەلەگى تۇسكەندە, جارىلدى دا كەتتى. بۇل – جولاۋشىلاردىڭ پايىمى. شىنتۋايتىنا كەلگەندە, 1,5 تونناعا عانا رۇقسات ەتىلگەن مۇز ۇستىنەن 9-10 توننالىق «كاماز» جۇك كولىگى ءوتىپ, جۇرگىزۋشى ءوزىنىڭ عانا ەمەس, باسقا دا جولاۋشىلاردىڭ ومىرىنە قاۋىپ ءتوندىرىپ كەتكەن ەكەن.
– مۇز – سۋ بەتىنە جايىلعان قاعاز سياقتى. سالماق تۇسسە, قوزعالىستا بولادى. اۋىر جۇك كولىگى ءوتىپ كەتكەن سوڭ قالىڭدىعى 30-35 سم مۇزدى بۇلدىرگەن. ادەتتە, تەحنيكا مۇزعا بىردەن باتىپ كەتپەيدى. ءبىرىنشى دوڭگەلەگى تۇسەدى. سالماق تۇسكەن سوڭ عانا بىرتىندەپ باتادى. ال بەينەجازبادا كورگەنىمىزدەي, تراكتور 4-5 سەكۋند ىشىندە باتىپ كەتتى. ەندى مۇز قاتقان سوڭ التىباقان قۇرىپ, تەحنيكانى شىعارىپ الامىز, – دەدى «وبلشىعىسجول» جشس باسشىسى نۇرجان ءجۇمادىلوۆ.
وبلىستىق پوليتسيا دەپارتامەنتىنىڭ ءباسپاسوز قىزمەتى اتالعان وقيعا تۋرالى ەشكىم حابارلاسپاعانىن ايتتى. دەسە دە تەكسەرۋ جۇمىستارىن باستاعان. ال وبلىس تۇرعىندارى «قىزىل تۋ» وتكەلىندەگى كوپىر قۇرىلىسىن تەزدەتپەسە, مۇنداي وقىس جاعدايلار ازايمايتىندىعىن ايتىپ ءجۇر.
ايتا كەتەيىك, «وبلشىعىسجول» جشس-نىڭ باس مامانى ل.نۇقىباەۆانىڭ حابارلاۋىنشا, «قىزىل تۋ» وتكەلىندەگى مۇز جولىمەن جۇرۋگە تىيىم سالىندى. اۋا رايى كۇرت جىلىپ, مۇز بەتىندە جارىقتار پايدا بولعان. ونىڭ ۇستىنە, وتكەل بەتىنە ەرىگەن قار سۋى جايىلعان. جولاۋشىلار قاۋىپسىزدىگىنىڭ الدىن الۋ ماقساتىندا «قىزىل تۋ» وتكەلىندەگى مۇز ارقىلى جول بارلىق كولىك تۇرلەرى ءۇشىن جابىلدى. جولاۋشىلار ەندى ۇلكەن نارىن, التاي ارقىلى عانا كۇرشىم, مارقاكولگە قاتىناي الادى.
شىعىس قازاقستان وبلىسى
