ينۆەستيتسيا – دامۋ قاينارى
تاۋەلسىز ەلىمىزدىڭ ايبارى مەن ايدىنىنا اينالعان استانا تورتكۇل دۇنيە تۇگەل تانىعان بەيبىتشىلىك پەن ىزگىلىك ورداسىنا اينالدى. بۇگىندە ەلوردامىز قاي سالادا بولماسىن سەرپىندى دامىپ كەلەدى. استانادا جۇزەگە اسىرىلىپ جاتقان تۇبەگەيلى دامۋ جەتىستىكتەرى الەمدىك قاۋىمداستىقتىڭ نازارىنان تىس قالمادى. ءححى عاسىردىڭ وزىق مەگاپوليسى رەتىندە قالامىزدىڭ قول جەتكىزگەن جەتىستىكتەرى الەمدىك ساراپشىلاردىڭ لايىقتى باعاسىنا يە بولۋدا. 1999 جىلى شىلدەدە قالا يۋنەسكو-نىڭ «الەم قالاسى» سىيلىعىنا يە بولدى. 2012 جىلى «Moody`s Investors Service» اتتى دۇنيەجۇزىنىڭ جەتەكشى رەيتينگتىك اگەنتتىگى ەلوردامىزعا ۆاا3 كرەديتتىك رەيتينگىن ۇسىنىپ, 2010 جىلدىڭ تامىزىندا «پوزيتيۆتىك» بولجامى دەڭگەيىنە دەيىن كوتەردى. 2011 جىلى استانا «تمد مەن ەۋرازەق-تىڭ ەڭ ۇزدىك قالاسى» اتتى ءىىى حالىقارالىق قالالىق بايقاۋ كونكۋرسىنىڭ جەڭىمپازى اتاندى. مىنە, مۇنىڭ ءبارى مەملەكەت باسشىسىنىڭ تىكەلەي قولداۋىمەن قالامىزدىڭ وسى 16 جىل ىشىندە قارقىندى دامۋىنىڭ جەمىسى. استانانىڭ الدىندا تۇرعان بۇگىنگى باستى مىندەت – قالانى وسىناۋ دامۋ ۇردىسىنەن جاڭىلدىرماي, ىلگەرى باستىرىپ, الەمنىڭ ۇزدىك شاھارلارىنىڭ قاتارىنا قوسۋ. ول ءۇشىن, ءبىرىنشى كەزەكتە, بيزنەس ورتانىڭ سەنىمىنە كىرىپ, ولاردىڭ ينۆەستيتسيالىق الەۋەتىن يننوۆاتسيالىق جوبالارعا تارتۋ قاجەت. سوندىقتان دا قاناتىن كەڭگە جايىپ كەلە جاتقان جاس قالامىزعا مولىنان ينۆەستيتسيا تارتۋ ماسەلەسى ارقاشان وزەكتى بولىپ وتىر. بۇل ماسەلە ۇكىمەتتىڭ جانە قالا اكىمدىگىنىڭ نازارىنان تىس قالىپ كورگەن جوق. وسى ماقساتپەن سوڭعى جىلدارى استانا ەكونوميكالىق فورۋمى شەڭبەرىندە تۇراقتى تۇردە «استانا ينۆەست» اتتى حالىقارالىق ينۆەستيتسيالىق فورۋم وتكىزۋ داستۇرگە اينالدى. بيىلعى جىلى بەسىنشى رەت وتكىزىلگەن «استانا ينۆەست» فورۋمىنىڭ ەلوردامىزعا ينۆەستيتسيا تارتۋ ماسەلەسىنە زور ۇلەس قوسىپ كەلە جاتقاندىعى داۋسىز. قالانىڭ قارقىندى دامۋ ءۇردىسىندە ينۆەستيتسياعا ءبىرىنشى كەزەكتە باسىمدىق بەرىلىپ وتىرعاندىعى زاڭدى. قالا ەكونوميكاسىنا تارتىلعان وسى ينۆەستيتسيالار از ۋاقىتتىڭ ىشىندە استانانىڭ ءوزىن-ءوزى تولىق قامتاماسىز ەتەتىن ەلىمىزدەگى ساناۋلى قالالاردىڭ قاتارىنا كىرۋىنە مۇمكىندىك بەردى. ەلوردانىڭ قازىعى قاعىلعان 16 جىل ۋاقىت ىشىندە قالامىزعا 4 ترلن. 780 ملرد. تەڭگە (30 ملرد. اقش دوللارى) تىكەلەي ينۆەستيتسيا تارتىلدى. بۇل ءبىرىنشى كەزەكتە قالامىزداعى قۇرىلىس يندۋسترياسىنىڭ دامۋىنا ەرەكشە ىقپال ەتتى. وسى جىلدار ىشىندە ەلوردامىزدا 12 ملن. شارشى مەتر تۇرعىن ءۇي سالىنسا, ونىڭ 4 ملن. شارشى مەترى تەك سوڭعى 4 جىل ىشىندە بوي كوتەردى. وسى ينۆەستيتسيالاردىڭ ارقاسىندا قالامىزدىڭ يندۋستريالىق دامۋىن جوعارى دەڭگەيگە كوتەرۋگە قول جەتكىزىلدى. سوڭعى جىلدارى ەلوردادا دۇنيە جۇزىنە كەڭىنەن ءمالىم ءوندىرىس ماركالارىنىڭ ءونىمدەرى شىعارىلا باستادى. بۇل رەتتە ەلوردادا شىعارىلاتىن «دجەنەرال ەلەكتريك» لوكوموتيۆىن, «تالگو» جولاۋشىلار ۆاگونىن, «الستوم» ەلەكتروۆوزدارىن, «ەۆروكوپتەر» تىكۇشاقتارىن ەرەكشە اتاپ وتكەن ءجون. تەك وسى اتىشۋلى ءوندىرىس ورىندارىنىڭ ءوزى شىعارعان ءونىمدەرىنىڭ كولەمى وتكەن جىلى جارتى ميلليارد اقش دوللارىن قۇرادى. سوڭعى 4 جىل ىشىندە قالا ەكونوميكاسىنا تارتىلعان جەكەمەنشىك ينۆەستيتسيا كولەمى ءۇش ەسە ارتتى. جاقىندا وتكەن V «استانا ينۆەست-2014» حالىقارالىق فورۋمى شەڭبەرىندە جالپى كولەمى 500 ملن. اقش دوللارىن قۇرايتىن 11 ينۆەستيتسيالىق جوبا تۋرالى كەلىسىمگە قول قويىلدى. ەلوردا ەكونوميكاسىنا جىلدان-جىلعا قوماقتى ينۆەستيتسيا تارتۋدىڭ باستى سەبەبى قالا اۋماعىندا جۇرگىزىلىپ وتىرعان ءتيىمدى ينۆەستيتسيالىق ساياساتتىڭ ناتيجەسى. 2001 جىلى استانا دامۋىنىڭ ديناميكاسىن قامتاماسىز ەتۋ ءۇشىن «استانانىڭ وركەندەۋى – قازاقستاننىڭ وركەندەۋى» اتتى قالانىڭ دامۋى بويىنشا مەملەكەتتىك باعدارلاما شەڭبەرىندە قازاقستان پرەزيدەنتىنىڭ تاپسىرماسى بويىنشا «استانا – جاڭا قالا» ارنايى ەكونوميكالىق ايماعى قۇرىلدى. مۇندا جەڭىلدەتىلگەن قۇقىقتىق رەجىم جۇمىس ىستەيدى. ينۆەستورلار كورپوراتيۆتىك تابىس سالىعىن, م ۇلىك سالىعىن, جەر ۋچاسكەلەرىنىڭ مەنشىك يەلەرى ءۇشىن جەر سالىعىن جانە 10 جىلعا دەيىن جەر ۋچاسكەلەرىن پايدالانعانى ءۇشىن جالعا الۋ تولەمىن تولەۋدەن بوساتىلعان. سونداي-اق, «استانا – جاڭا قالا» ارنايى ەكونوميكالىق ايماقتىڭ جاڭا اكىمشىلىك-ىسكەرلىك ورتالىعىنىڭ اۋماعىندا وبەكتىلەردى سالعان كەزدە پايدالانىلاتىن تاۋارلاردىڭ جەتكىزۋشىلەرىنىڭ ققس-تى قايتارۋى كوزدەلگەن. ودان باسقا ارنايى ەكونوميكالىق ايماقتىڭ اۋماعىندا ەركىن كەدەن ايماعى رەجىمى قولدانىلادى, ياعني ينۆەستورلار تاۋارلاردى, ماتەريالدار مەن جابدىقتاردى يمپورتتاعان كەزدە كەدەندىك باج تولەۋدەن بوساتىلادى. قالامىزدا سوڭعى جىلدارى ءىس جۇزىنە اسىرىلىپ جاتقان وزىق تەحنولوگيالارعا نەگىزدەلگەن يننوۆاتسيالىق جوبالار ينۆەستورلاردىڭ ەرەكشە قىزىعۋشىلىعىن تۋعىزۋدا. بۇل رەتتە «Smart Astana» جوباسى نەگىزىندە جۇزەگە اسىرىلاتىن نىسانداردى اتاۋعا بولادى. بۇگىنگى كۇنى «Smart Astana» جوباسى بويىنشا قالامىزدىڭ قاۋىپسىزدىگىن قامتاماسىز ەتۋ ماقساتىندا «استانا قالاسىنىڭ ءومىر تىرشىلىگىن قامتاماسىز ەتۋدىڭ كەشەندى جۇيەسى», كولىك جۇيەلەرىن جاڭعىرتۋ جونىندەگى «ينتەللەكتۋالدىق كولىك جۇيەسى» جوبالارىنا ينۆەستيتسيا تارتۋ ماسەلەسى كۇن تارتىبىنە قويىلعان. مىنە, وسىنداي يننوۆاتسيالىق جوبالاردى, «اقىلدى» تەحنولوگيالاردى قالا تىرشىلىگىنە كەڭىنەن ەنگىزۋ ارقىلى استانا قالاسى 2017 جىلدارى الەمنىڭ ەڭ وزىق 50 «اقىلدى» قالالارىنىڭ قۇرامىنا كىرۋدى ماقسات تۇتىپ وتىر. «ەكسپو-2017» بۇكىلالەمدىك جەتىستىكتەر كورمەسىن استانادا وتكىزۋ قالامىزدىڭ دامۋ ۇردىسىندەگى ايتۋلى بەلەس بولماق. وسى ۇلتتىق جوبا شەڭبەرىندە جۇزەگە اسىرىلاتىن يننوۆاتسيالىق جوبالار مەن زاماناۋي قۇرىلىس نىساندارىنا تىكەلەي ينۆەستيتسيا تارتۋ ماسەلەسى بۇگىندە بارىنشا باسىمدىقپەن ءىس-جۇزىنە اسىرىلۋدا. قالا اكىمدىگى «استانا ەكسپو-2017» ۇلتتىق جوباسىنىڭ اياسىندا ءومىر ءسۇرۋ ستاندارتتارى وتە جوعارى, ەكولوگيالىق تازا, يننوۆاتسيالىق جاڭا قالا سالۋ ماقساتىن كۇن تارتىبىنە قويىپ وتىر. وسى ماقساتپەن بىرقاتار وزىق جوبالار باعدارلاماسى جوسپارلانۋدا. وزىق تەحنولوگيالارعا نەگىزدەلگەن بۇل جوبالار قازىردىڭ وزىندە وتاندىق جانە شەتەلدىك ينۆەستورلاردىڭ قىزىعۋشىلىعىن تۋعىزا باستادى. وسى ورايدا ەلوردادا جاڭعىرمالى ەنەرگيا قۋات كوزدەرىن جانە ەنەرگەتيكالىق تيىمدىلىك ماسەلەلەرىن شەشۋدى كوزدەيتىن «استانا گرين سيتي», ەكسپو-2017 حالىقارالىق كورمەسىن وتكىزۋ شەڭبەرىندە قالامىزدىڭ كولىك ينفراقۇرىلىمىن جانە لوگيستيكاسىن تۇبەگەيلى جاڭعىرتۋعا باعىتتالعان «استانا موبيليتي», قالامىزداعى قىزمەت كورسەتۋ جانە قوناقۇي بيزنەسىنىڭ ينفراقۇرىلىمىن حالىقارالىق ستاندارتتارعا لايىقتى دامىتاتىن «ۋەلكوم تۋ استانا» جوبالارىن ەرەكشە اتاپ وتۋگە بولادى. الداعى ۋاقىتتا وتاندىق جانە شەتەلدىك ينۆەستورلار بۇل زاماناۋي جوبالارعا وزدەرىنىڭ قوماقتى ينۆەستيتسيالارىن سالاتىندىعىنا سەنىم زور. ءوز كەزەگىندە بۇل ەلوردامىزدىڭ ساپالى دا قارقىندى دامۋ ءۇردىسىنىڭ جاڭا بەتتەرىن اشاتىندىعى ءسوزسىز. جىلقىباي جاعىپار ۇلى, «ەگەمەن قازاقستان».تاعدىرىم تامىرلاسقان كيەلى مەكەن
ازامات بولىپ قالىپتاسۋ جىلدارىمىز استانانىڭ الماتىدان ارقا جەرىنە كوشۋ كەزەڭىنە تۋرا كەلدى. اۋەلى ەلباسىنىڭ بۇل شەشىمىنىڭ ەل دامۋىنداعى ستراتەگيالىق ماڭىزى مەن ساياسي ءمانىنىڭ استارىن تەرەڭ ۇقپاساق تا, ەل ورداسىنىڭ ەل ورتاسىنا كەلگەنىن شىن قۇپتادىق. اسكەر قاتارىندا الماتى قالاسىندا بولىپ, ساۋكەلەلى ارۋ شاھاردىڭ قىزىعى مەن دۋمانىن تالاي كوردىك. الاتاۋدىڭ قوينىندا جاتىپ, جاسىل جەلەككە بولەنگەن اسەم الماتى ءار جاس قازاقتىڭ ارمان قالاسى-تۇعىن, ءالى دە سول سالتاناتتى قالپىمەن ارمان قالا بولىپ قالا بەرەتىنىنە ءشۇبام جوق. بىراق, مەن ءۇشىن استانانىڭ ورنى بولەك! كوركەم ءارى كيەلى قالا – استانا! وزىڭدە ازامات بولىپ قالىپتاستىق. عالامات قۇرىلىسىڭا قاتىسىپ, ءبىرشاما ءىس تىندىرعان دا بولدىق. قالانعان ءار تاسىڭنان عۇمىرلىق تاجىريبە جيناپ, بۇكىل ومىرىمىزگە التىن ارقاۋ ەتىپ تارتتىق. كيەلى دەيتىنىم, ارقانىڭ كوركەم دە كەرىم ارۋىنا وزىڭدە ءجۇرىپ تاعدىر قوستىم. قۇدايعا تاۋبە, ءوسىپ-ءونىپ جاتىرمىز. استانامەن بىرگە بوي كوتەرىپ, سالتانات بيىگىنە شىقتىق. قۇلدىراڭداعان ق ۇلىنشاقتارىم جاسامپاز قالادا ەرجەتىپ, بويجەتىپ كەلەدى. ءوز قولىمىزبەن تۇرعىزىپ جاتقان قالانى ارالاتقاندا, ءاربىر اسەم عيمارات پەن جاسىل جەلەگى جەلكىلدەگەن كوشەلەردىڭ قالاي سالىنىپ, قالاي قۇلپىرعانى جونىندە ۇزاق-ۇزاق اڭگىمە شەرتەمىن. بۇگىندە تاعدىر قوسقان زايىبىم مۇعاليما. ورىس سىنىپتارىنا قازاق ءتىلى مەن ادەبيەتى پانىنەن ءدارىس وقيدى. ال ءوزىم قازاقستانداعى ەڭ ءىرى كومپانيانىڭ ءبىرى «KEGOK» اق-تا ماماندىعىم بويىنشا ينجەنەر-ەنەرگەتيك بولىپ قىزمەت اتقارامىن. شۇكىر, بىرەۋدەن كەيىن, بىرەۋدەن ىلگەرى تارىقپاي, تارتىنباي عۇمىر كەشىرۋدەمىز. ءبىز جاسپىز. بۇگىن استانانىڭ 16 جىلدىعىن تويلاۋعا كىرىسىپ كەتسەك, كەلەشەكتە ەلوردانىڭ 50 جىلدىعىندا ەگەمەن ەل تاريحى جونىندە كەلەلى ءسوز ايتىپ وتىرامىز دەگەن ۇمىتتەمىز. ارايلاپ, اسقاقتاي بەر كيەلى قالام – استانا! نۇرعالي جۇماباي ۇلى, قالا تۇرعىنى, ينجەنەر-ەنەرگەتيك.استاناداعى اكتسيا – ادام ومىرىنە اراشا بولۋ
قالا كۇنى مەرەكەسى قارساڭىندا, ياعني 20-21 ماۋسىم كۇندەرى ساعات 10.00-15.00 ارالىعىندا استاناداعى «اراي» ساياباق ايماعى مەن قالانىڭ مەديتسينالىق مەكەمەلەرىندە قالالىق اكىمدىكتىڭ قولداۋىمەن «ءبىر تامشى قان – ءبىر ادامنىڭ ءومىرى» اكتسياسى وتەدى. بۇل اكتسيانىڭ ماقساتى اۋىر حالگە تاپ بولعان ادامدارعا كومەكتەسۋ ءۇشىن دەنى ساۋ جانداردى دونورلىققا تارتۋ بولىپ تابىلادى. وسىعان وراي, قالاداعى كوپسالالى ستاتسيونارلار مەن ترانسفۋزيولوگيا عىلىمي-وندىرىستىك ورتالىعىندا (تعوو) قان الۋ ورىندارى ۇيىمداستىرىلادى. جوبا تعوو مەن ستاتسيونار دارىگەرلەرىنىڭ قاتىسۋىمەن جۇزەگە اسىرىلماق. اكتسيا بارىسىندا 250-300 ادامنان قان الۋ كوزدەلۋدە. بۇل شارانىڭ تۇپكى ماقساتى – ءاربىر وتانداستارىمىزدىڭ ساناسىنا ادام ءومىرىن قۇتقارۋعا سەپ بولاتىن دونورلىق ازاماتتىق پارىز سەزىمىن ۇيالاتۋ. بۇگىنگى تاڭدا ەلوردادا جاڭا مەديتسينالىق نىسانداردىڭ كوبەيۋىنە, كورسەتىلەتىن مەديتسينالىق قىزمەت پەن وتا جاساۋ سانىنىڭ ارتۋىنا بايلانىستى قالالىق مەديتسينالىق مەكەمەلەردىڭ قانعا دەگەن قاجەتتىلىگى 2 ەسەگە ارتىپ, كۇنىنە 100 ليترگە جەتىپ وتىر. استانانىڭ بارلىق مەديتسينالىق ۇيىمدارىندا جىلىنا 83000 وتا جاسالادى. ونىڭ ىشىندە جوعارى تەحنولوگيالاردى قولدانۋ ارقىلى 25000 وتا وتكىزىلەدى. وسىدان-اق قانعا دەگەن سۇرانىس اۋقىمىن بولجاۋعا بولادى. سوندىقتان دونورلىق يگى قوزعالىستى ارتتىرۋدىڭ ماڭىزى زور. ءاربىر دونور «قاناتىمەن سۋ سەپكەن قارلىعاشتاي» بىرنەشە ادام ءومىرىن ساقتاپ قالادى. قان الۋ ورىندارى 20 ماۋسىمدا – №1, №2 قالالىق ەمحانالاردا; 21 ماۋسىمدا – «اراي» ساياباعىنىڭ ايماعى, ترانسفۋزيولوگيا عىلىمي-وندىرىستىك ورتالىعىندا جۇمىس ىستەيتىن بولادى. جانار بيكەەۆا. استانا.مۇگەدەكتەرگە مۇمكىندىك
جاقىندا قالا كۇنى مەرەكەسى قۇرمەتىنە ارنالعان مۇمكىندىگى شەكتەۋلى ادامداردىڭ «ءبارىمىز بىردەيمىز – كەمسىتۋدى بىلمەيمىز» اتتى بايقاۋى باستالدى. بۇل ءداستۇرلى بايقاۋ بىرنەشە اتالىمدار بويىنشا وتكىزىلىپ, قالا كۇنى مەرەكەسىندە مارەگە جەتەدى.
ەسكە سالا كەتەتىن بولساق, بىلتىر مۇمكىندىگى شەكتەۋلى جاندار اراسىندا وتكەن وسى رەسپۋبليكالىق بايقاۋ بارىسىندا «ال, قۇربىم» انىمەن استانالىق ا.نۇعىمانوۆا «ۇزدىك ورىنداۋشى» اتالىمى بويىنشا جەڭىمپاز اتانعان ەدى.
بيىلعى جارىستىڭ العاشقى كەزەڭىندە دە «ەڭ تاتۋ وتباسى», «ەڭ ۇزدىك بي», «ۇزدىك ورىنداۋشى» جانە «ۇزدىك جاسامپاز» اتالىمدارى بويىنشا 50-دەن استام ۇمىتكەرلەر باق سىناستى. كونكۋرس ەرەجەسىنە ساي ونەرىمەن توپ جارعاندار ىرىكتەلىپ, رەسپۋبليكالىق اۋقىمداعى شەشۋشى جارىسقا جولداما الدى. جارىس جەڭىمپازدارىنىڭ اراسىندا ءى توپتاعى مۇگەدەك سايات قورعانبەكوۆتىڭ ونەرى مەن ومىرگە دەگەن ىنتاسى كورەرمەندەر ىقىلاسىنا بولەندى. ول ءوزىنىڭ ومىرگە دەگەن قۇشتارلىعى مەن ازاماتتىق بەلسەندىلىگى ارقاسىندا بەرىك وتباسىن قۇرىپ, جىگەرلى ۇرپاق تاربيەلەۋدە. سايات قورعانبەكوۆتىڭ وتباسى 10 جىلدان استام ۋاقىتتان بەرى ءدام-تۇزى جاراسىپ, بەلسەندى ءومىر كەشۋدە.
– وتباسى – ەڭ اسىل قازىنام. وتان دا وتباسىنان باستالادى. سوندىقتان دا, وتباسىمدى قادىر تۇتىپ, جارىمدى سىيلاپ, بالالارىمدى ماقتان ەتەمىن. ءوزىم بالالار ۇيىندە ءوستىم. ەندى مەنىڭ بالالارىم ونداي قيىندىقتى كورمەي, اتا-انانىڭ مەيىرىمى مەن سۇيىسپەنشىلىگىنە بولەنىپ, جاراسىمدى وتباسىندا تاربيەلەنۋىن ءومىرىمنىڭ باستى پارىزى سانايمىن, دەيدى «ءبارىمىز بىردەيمىز – كەمسىتۋدى بىلمەيمىز» بايقاۋىنىڭ ىرىكتەۋ جارىسىنىڭ جەڭىمپازى سايات قورعانبەكوۆ.
«ەگەمەن-اقپارات».
بالالار باق سىناسادى
بيىلعى بالالاردى قورعاۋ كۇنى ەلوردامىزدا «ايالاعان استانا» ۇلتتىق مۋزىكالىق تەلەۆيزيالىق بالالار بايقاۋىنىڭ جەڭىمپازدارىنا ارنالعان ارنايى مۋزىكالىق مەكتەپ ەسىگىن ايقارا اشتى. وسى مەكتەپ قابىرعاسىندا شەبەرلىكتەرىن شىڭداپ, قالا كۇنى وتەتىن بايقاۋعا دايىندالۋ جانە «جاڭا تولقىن» بايقاۋىندا قازاقستان نامىسىن قورعاۋعا مۇمكىندىك الۋ ءۇشىن استاناعا ەلىمىزدىڭ ءار وڭىرىنەن 16 دارىندى بالا ات ارىلتىپ كەلدى. 1 ماۋسىمدا سارىارقا توسىنە جينالعان بالالار ءبىر-بىرىمەن العاش جۇزدەستى جانە وزدەرىنىڭ تالانتتارىن شىڭداۋعا لينا اريفۋللينا شەبەرحاناسىنىڭ اكتەرلىك شەبەرلىك, سولفەدجيو, ۆوكال بويىنشا ماسكەۋدەن كەلگەن ۇستازدارىمەن تانىستى. ەستەرىڭىزگە سالا كەتەيىك, 2014 جىلى ناۋرىز-ءساۋىر ايلارىندا وتكەن «ايالاعان استانا» جوباسىنىڭ ىرىكتەۋ جارىستارىندا الماتى, تالدىقورعان, تاراز, شىمكەنت, قىزىلوردا, قوستاناي, ورال, اتىراۋ, اقتاۋ, اقتوبە, قاراعاندى, پاۆلودار, سەمەي, كوكشەتاۋ, پەتروپاۆل, استانا قالالارىنىڭ 8-12 جاس ارالىعىنداعى 1000-نان استام تالانتتى بالالارى باق سىناستى. مامىر ايىنىڭ ورتاسىندا فينالعا وتكەن ەلىمىزدەگى ەڭ تالانتتى بالالاردىڭ ەسىمدەرى بەلگىلى بولدى. ولار: لۋيزا نۇرقۋاتوۆا (اقتاۋ), زاميرا ساگاديەۆا (زەرەندى), دانيا يشانقۇلوۆا (ورال), مۇحامەدالي جۇگىنىسوۆ (استانا), ديلناز تولەگەن (قىزىلوردا), دياس ومار (قىزىلوردا), ناستيا پەرشيكوۆا (پاۆلودار), جاحان قابىكەن (استانا), ماليكا ساماعۇلوۆا (پاۆلودار), ديلنۇر ءبىرجانوۆا (قاراعاندى), عاليمۇرات ءابدىماناپوۆ (جەزقازعان), جانايگەرىم وتەگەنوۆ (قوستاناي), الديار ورەكەن (ەكىباستۇز), ياسمين ماجيتوۆا (الماتى), ساعىنعان قۋانعان (استانا), ءادىلەت مەيرامبەكوۆ (كوكشەتاۋ). ايماقتىق جارىستا توپ جارعاندار ەندى قالا كۇنى مەرەكەسى قۇرمەتىندەگى باسەكەدە باق سىناسادى. ماۋسىم ايى بويى بالالار استانالىق مۋزىكالىق مەكتەپتە وزدەرىنىڭ ۆوكالدىق قابىلەتتەرىن شىڭداپ, رۋسلان بۇتاباەۆتىڭ جەتەكشىلىگىندەگى «Zaratushtra Band» جاندى داۋىستاعى وركەسترىنىڭ سۇيەمەلدەۋىمەن قويىلاتىن تەلەۆيزيالىق شوۋعا دايىندالادى. فينالعا 12 كونتسەرتتىك ءنومىر دايىندالۋدا. ءبىرى جەكە ورىنداسا, ءبىرى توپتا ونەر كورسەتەدى. «ايالاعان استانا» بايقاۋى ءۇش اتاۋلى جارىس كۇنىنەن تۇرادى: «بالالىق شاق ءانۇرانى» (4 شىلدە), «جۇلدىزدارمەن دۋەت جانە الەمدىك حيت» (5 ءشىلدە), «اتامەكەن» (6 شىلدە). وسى كۇندەردەگى جارىس قورىتىندىسىنا سايكەس حالىقارالىق قازىلار القاسى مەن تەلەكورەرمەندەر «بالالارعا ارنالعان جاڭا تولقىنعا» جولدامانى الاتىن جەڭىمپازدى انىقتايتىن بولادى. باسەكە بارىسىندا جۇلدەلى 1,2,3 ورىندارمەن بىرگە جەڭىمپازعا ارنالعان باستى سىيلىق (1 ميلليون تەڭگە) بەلگىلەنگەن. سونىمەن بىرگە ارنايى «كورەرمەن كوزايىمى» سىيلىعى دا ءوز يەسىن كۇتۋدە. «ەگەمەن-اقپارات». بەتتى ازىرلەگەن جىلقىباي جاعىپار ۇلى, سۋرەتتەردى تۇسىرگەن ەرلان وماروۆ, «ەگەمەن قازاقستان».
