جالپى وتىرىستا ءماجىلىس دەپۋتاتتارىنىڭ باستاماسىمەن ازىرلەنگەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سۇيىتىلعان گاز اينالىمىن رەتتەۋ پروتسەستەرىنىڭ رەينجينيرينگى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا تالقىلاۋ ۇسىنىلادى.
اتالعان زاڭ جوباسى نارىق جاعدايلارىن ەسكەرە وتىرىپ, سۇيىتىلعان گازدىڭ باعاسىن بەلگىلەۋ جانە ونى ءبولۋ ۇدەرىستەرىن جۇيەلى رەتتەۋگە, كولەڭكەلى ەكسپورتتى بولعىزباۋعا, وڭىرلەردە سۇيىتىلعان مۇناي گازىنىڭ زاڭسىز اعىنىنا جول بەرمەۋگە باعىتتالعان.
سونداي-اق كۇن ءتارتىبىنىڭ جوباسىندا راتيفيكاتسيالاناتىن زاڭ جوبالارى بار. ولار – ءۇشىنشى ەلدەرمەن ءوزارا ساۋداداعى تەحنيكالىق كەدەرگىلەردى جويۋ ءتارتىبى مەن شارتتارى تۋرالى كەلىسىم جانە ازەربايجانمەن وسىمدىكتەر كارانتينى جانە ولاردى قورعاۋ سالاسىنداعى ىنتىماقتاستىق تۋرالى كەلىسىم.
سونىمەن قاتار ءماجىلىس كوميتەتتەرى بىرقاتار جاڭا زاڭ جوباسىن جۇمىسقا الادى. اتاپ ايتقاندا, الەۋمەتتىك جانە اكىمشىلىك قۇقىق بۇزۋشىلىق تۋرالى كودەكستەر جوباسى, كونستيتۋتسيالىق زاڭدارعا وزگەرىستەر ەنگىزۋ, الەۋمەتتىك قامسىزداندىرۋ ماسەلەلەرى بويىنشا تۇزەتۋلەر ەنگىزۋ مەن جىلۋ ەنەرگەتيكاسى, جەرگىلىكتى ءوزىن-ءوزى باسقارۋ, جول ءجۇرىسىن ۇيىمداستىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوبالارى بار. جۇمىسقا الىناتىن زاڭ جوبالارىنىڭ قاتارىندا كەدەندىك ءترانزيتتىڭ كەدەندىك راسىمىنە سايكەس تاۋارلاردى تاسىمالداۋ (تاسۋ) كەزىندە كەدەندىك باجداردى, سالىقتاردى, ارنايى, دەمپينگكە قارسى, وتەماقى باجدارىن تولەۋ جونىندەگى مىندەتتى ورىنداۋدى قامتاماسىز ەتۋدى قولدانۋدىڭ ەرەكشەلىكتەرى تۋرالى كەلىسىمدى راتيفيكاتسيالاۋ تۋرالى» زاڭ جوباسى بار.
