«1 قاڭتاردان باستاپ تولەمدەر مەن الەۋمەتتىك قىزمەتتەردىڭ بارلىق تۇرلەرى پرواكتيۆتى فورماتتا كورسەتىلەدى. مەملەكەتتىك ورگانداردىڭ اقپاراتتىق جۇيەلەرىنىڭ دەرەكتەرى ارقىلى كورسەتىلەتىن بىرقاتار قىزمەت ينتەگراتسيا اياقتالعاننان كەيىن كەزەڭ-كەزەڭىمەن كوشىرىلەدى», دەدى ت.دۇيسەنوۆا ۇكىمەت وتىرىسىندا.
ءمينيستردىڭ ايتۋىنشا, مەملەكەتتىك قولداۋ پرواكتيۆتى فورماتتا كورسەتىلەدى.
«ياعني ازاماتتارعا الەۋمەتتىك تولەمدەر مەن الەۋمەتتىك كومەك اقپاراتتىق جۇيەدە بار دەرەكتەر نەگىزىندە تاعايىندالادى. قازىرگى قاعاز تۇرىندەگى قۇجاتتار جۇيەدەن بىرتىندەپ الىنادى», دەپ تولىقتىردى مينيستر.
ايتا كەتۋ كەرەك, مەملەكەتتىك قولداۋ تولىعىمەن پرواكتيۆتى فورماتقا اۋىسادى دەگەن نورمالار جاڭا الەۋمەتتىك كودەكستە قامتىلعان. كودەكستى بۇگىن, 27 جەلتوقساندا ۇكىمەت بەكىتتى.
تسيفرلىق كارتا اياسىندا الەۋمەتتىك قولداۋ قاجەتتىلىگى اقپاراتتىق جۇيە ارقىلى انىقتالادى. ياعني ازامات مەملەكەتتىك قولداۋدى ءتيىستى ورگاندارعا جۇگىنبەي-اق الا الادى. بۇل قاجەتتىلىكتى مەملەكەت ءوزى انىقتايدى جانە بارلىق پروتسەدۋرالاردى اۆتوماتتى تۇردە ورىندايدى.
سونىمەن قاتار قاڭتار ايىنان باستاپ بالا كۇتىمى بويىنشا تولەمدەر ءبىر جىلدان ءبىر جارىم جىلعا دەيىن ۇزارتىلادى. جۇمىسىنان ايىرىلعاندار ءۇشىن تولەمدەر ورتاشا ايلىق تابىستان 45 پايىزىنا وسەدى.
