ءا. تۇرسىنوۆ ك. ومۋراليەۆتى تمۇ باس حاتشىسى لاۋازىمىنا تاعايىندالۋىمەن قۇتتىقتاپ, الداعى جاۋاپتى قىزمەتىندە ساتتىلىكتەر تىلەدى, سونداي-اق, تۇركى مەملەكەتتەرىنىڭ تمۇ شەڭبەرىندەگى ىنتىماقتاستىعىنىڭ ودان ءارى تەرەڭدەي تۇسەتىندىگىنە سەنىم ءبىلدىردى.
كەزدەسۋ بارىسىندا ءا.تۇرسىنوۆ تۇركى مەملەكەتتەرى ۇيىمىنىڭ حالىقارالىق ءرولىنىڭ ارتىپ كەلە جاتقانىنا توقتالىپ, قازاقستاننىڭ تۇركى الەمىنىڭ اتاجۇرتى رەتىندە ۇيىمعا مۇشە بارلىق ەلدەرمەن جان-جاقتى قارىم-قاتىناستى دامىتۋعا مۇددەلى ەكەنىن اتاپ ءوتتى. وسى ورايدا, قازاقستان باستاماسىمەن قابىلدانعان «تۇركى الەمىنىڭ كەلەشەگى – 2040» قۇجاتىن ىسكە اسىرۋعا ايرىقشا ءمان بەرەتىنىن جەتكىزدى.
قازاقستاندىق ديپلومات 2022 جىلعى 11 قاراشادا سامارقاندتا (وزبەكستان رەسپۋبليكاسى) وتكەن تمۇ 9-شى ءسامميتى بارىسىندا پرەزيدەنت قاسىم-جومارت توقاەۆتىڭ كوتەرگەن ۇسىنىستارىنىڭ ماڭىزدىلىعى مەن وزەكتىلىگىن اتاپ ءوتىپ, قازاق تاراپىنىڭ وسى باعىتتا حاتشىلىقتان جۇيەلى ءارى جەمىستى جۇمىس كۇتەتىنىن ايتتى.
ك.ومۋراليەۆ ۇيىمنىڭ الداعى جۇمىسى بويىنشا جوسپارلارىمەن ءبولىسىپ, تمۇ حاتشىلىعىنىڭ مۇشە مەملەكەتتەرمەن بىرلەسە اتقارىپ جاتقان جۇمىستارى تۋرالى اقپارات بەردى.
جۇمىس ساپارى بارىسىندا تمۇ باس حاتشىسىنىڭ قر پرەزيدەنتى ق. توقاەۆپەن, سونداي-اق بىرقاتار مەملەكەتتىك ورگاندار باسشىلارىمەن كەزدەسۋلەرى جوسپارلانعان.
تۇركى مەملەكەتتەرى ۇيىمى (تمۇ) قازاقستاننىڭ باستاماسىمەن 2009 جىلى ناحچىۆان قالاسىندا (ازەربايجان رەسپۋبليكاسى) قۇرىلدى. تمۇ حاتشىلىعى ىستانبۇل قالاسىندا (تۇركيا) ورنالاسقان. قازىرگى ۋاقىتتا تمۇ-عا ازەربايجان, قازاقستان, قىرعىزستان, تۇركيا جانە وزبەكستان كىرەدى. ماجارستان مەن تۇرىكمەنستان بايقاۋشى مارتەبەسىنە يە.
