كەش باسىندا سالتاناتتى جيىنعا كەلگەندەر ۋنيۆەرسيتەت تاريحىن تاراتا كورسەتكەن بەينەروليكتەن وقۋ ورنىنىڭ بۇرىنعى ءھام بۇگىنگى تىنىسىمەن تانىستى.
– وقۋ ورنى ءبىلىم, عىلىم ورداسى عانا ەمەس, سىر وڭىرىندەگى رۋحاني-مادەني ورتالىققا اينالعانىن كورىپ وتىرمىز. تاريحى تەرەڭ قاراشاڭىراق بيىلعى وقۋ جىلىندا ۋنيۆەرسيتەتتەر اراسىندا جۇرگىزىلگەن ەڭ جوعارى رەيتينگ «Asian University Rankings – 2023» قورىتىندىسى بويىنشا الەمنىڭ 23 ەلىنەن قاتىسقان 760 ۋنيۆەرسيتەت ىشىنەن ۇزدىكتەر قاتارىنا ەندى. ايرىقشا ايتا كەتەر تاعى ءبىر جاڭالىق, كورەيا مەن قازاقستان اراسىنداعى جوعارى ءبىلىم سالاسىنداعى ەكىجاقتى ىنتىماقتاستىقتى ىلگەرىلەتۋ اياسىندا قورقىت اتا ۋنيۆەرسيتەتى مەن سەۋل ۇلتتىق عىلىم جانە تەحنولوگيالار ۋنيۆەرسيتەتىنىڭ ينفورماتيكا جانە ينجينيرينگ دەپارتامەنتى بىرلەسىپ, «جاساندى ينتەللەكت جانە ينفورماتيكانىڭ جاڭا مەكتەبى جانە بيزنەس-ينكۋباتسيالىق ورتالىعىن قۇرۋ» جوباسىن ازىرلەدى. بۇل جوبا ەلىمىزدىڭ ەكونوميكالىق جانە تسيفرلىق دامۋىنا ۇلكەن ۇلەس قوسادى. سونىمەن قاتار ۋنيۆەرسيتەت اكادەميالىق ارتىقشىلىقتار ورتالىقتارى اشىلاتىن 20 وڭىرلىك جوعارى وقۋ ورىندارى قاتارىنا كىردى, – دەدى عىلىم جانە جوعارى ءبىلىم ءمينيسترى.
وبلىس اكىمىنىڭ ورىنباسارى نۇرىمبەت ساقتاعانوۆ باتىل باستامالار مەن تىڭ ىزدەنىستەر ارقىلى ۋنيۆەرسيتەت وتاندىق جەتەكشى وقۋ ورىندارى اراسىندا لايىقتى ورىن الىپ وتىرعانىن اتاپ ءوتتى.
جىل سايىن جەرگىلىكتى بيۋدجەت ەسەبىنەن الەۋمەتتىك جاعىنان از قامتىلعان وتباسىلار بالالارىن وقىتۋ ءۇشىن ءبىلىم گرانتتارى ءبولىنىپ وتىر. ۋنيۆەرسيتەتتەگى جاس عالىمداردىڭ ارحەولوگيالىق, اگرارلىق سالاداعى جوبالارى ۇنەمى قولداۋ تاۋىپ كەلەدى. زامان اعىمىنا ىلەسە بىلگەن وقۋ ورنىندا جاڭا ماماندىقتاردى وقىتىپ, كادرلار دايارلاۋدىڭ مۇمكىندىگى مول. الدا بيۋدجەت ەسەبىنەن ەكونوميكا سالالارى بويىنشا ماماندىقتار سانىن كوبەيتۋ جوسپارلانىپ وتىر.
قورقىت اتا اتىنداعى قىزىلوردا ۋنيۆەرسيتەتىنىڭ باسقارما توراعاسى – رەكتورى بەيبىتكۇل كارىموۆا ىرگەسى قالانعالى بەرى بىرەگەي ءبىلىم ورداسىندا 80 مىڭعا جۋىق مامان دايارلانعانىن جەتكىزدى. ءوڭىر ەكونوميكاسى سالالارىنداعى مامانداردىڭ 80 پايىزعا جۋىعى وسى قاراشاڭىراقتان تۇلەپ ۇشقاندار. سالتاناتتى جيىن «تانىم تۇمارى» اتتى تەاترلاندىرىلعان قويىلىمعا ۇلاسىپ, ۇستازدار مەن عالىمدارعا قۇرمەت كورسەتىلدى.
قىزىلوردا
