مامانداردىڭ ايتۋىنشا, ءسابيدىڭ بويىن مەڭدەگەن دەرت بەلگىلەرى ەكىنشى كۇنى بايقالعان. گيدروتسەلە دياگنوزى الدىن الا قويىلعانىمەن, اۋرۋحاناعا كەلەردەن ءبىر كۇن بۇرىن نارەستە قاتتى مازاسىزدانعان, سكروتالدى ءىسىنۋ بەلگىلەرى بايقالعان ەكەن. جەدەل ىسكە كىرىسكەن اق جەلەڭدى ابزال جاندار سكروتالدى سيندروم دياگنوزىن قويىپ, وعان شۇعىل تۇردە كومەك كورسەتكەن. دارىگەرلەردىڭ شۇعىل كونسيليۋمىنان كەيىن بالا وبلىستىق كوپبەيىندى اۋرۋحانانىڭ پەريناتالدىق بلوگىنا اۋىستىرىلعان. وسىلايشا جاعداي تولىق باقىلاۋعا الىنعان.
تەكسەرۋ ناتيجەسىندە دارىگەرلەر ءسابيدىڭ جاعدايىنىڭ تىم ناشارلاپ كەتكەنىن انىقتاعان. ءىشىنىڭ ىسىنگەنى, پالپاتسيا كەزىندە قاتتى قينالاتىنى ناقتىلانعان. قىسقاسى, اق جەلەڭدى ابزال جاندار شۇعىل تۇردە وپەراتسيا جاساۋ تۋرالى شەشىم قابىلداعان. كەيىننەن ءىش قۋىسىن تەكسەرگەن كەزدە اسقازاننىڭ پەرفوراتسياسى انىقتالىپ, مامانداردىڭ جەدەل ىسكە كىرىسۋىمەن جاعداي قالىپقا كەلتىرىلگەن.
جوعارى ساناتتى بالالار ەندوسكوپيست-حيرۋرگى نۇرتۋعان القۋاتوۆتىڭ ايتۋىنشا, ءساتتى جاسالعان وپەراتسيادان كەيىن بالا مامانداردىڭ باقىلاۋىنا الىنعان. بۇگىندە دارىگەرلەر لورا اسانوۆا مەن شاپقات قۇدايبەرگەنوۆ ءسابيدىڭ ەم-شاراسىن تولىقتاي باقىلاپ وتىر.
ءسابيدىڭ ءومىرىن ساقتايمىز دەپ ابىگەرگە تۇسكەن دارىگەرلەردىڭ ايتۋىنشا, اۋەلدە نارەستەنىڭ تاماقتانۋىنىڭ ءوزى قيىنداي تۇسكەن. الايدا وپەراتسيا جاسالعان سوڭ ءبىر اپتادان كەيىن ول ەنتەرالدى تاماقتاندىرۋعا اۋىستىرىلعان. بۇگىندە جاعدايى بىرقالىپتى.
تاراز
