قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ءوز سوزىندە: «وكىنىشكە قاراي, سىبايلاس جەمقورلىق ءالى دە ءبىزدىڭ قوعامنىڭ اۋىر دەرتى بولىپ وتىر. سىبايلاس جەمقورلىق مەملەكەتتەردىڭ كوپشىلىگىندە بار. قازاقستان دا ودان سىرت قالعان جوق. ونىمەن قالاي كۇرەسىپ جاتىر نەمەسە قالاي اشكەرەلەپ وتىر – ول باسقا ماسەلە», دەپ اتاپ ءوتتى.
قازىرگى تاڭدا سىبايلاس جەمقورلىق اۋقىمدىلىعىنا عانا بايلانىستى ەرەكشەلەنەدى.
سىبايلاس جەمقورلىقپەن كۇرەس – قوعام تالابى. ءمىنسىز قوعام – جەمقورلىقسىز قوعام, سالاۋاتتى ءومىر – پاراقورلارسىز ءومىر, مىقتى مەملەكەت – جەمقورلارسىز مەملەكەت. ەلىمىز ەلۋ ەلدىڭ قاتارىنا ەنۋ ءۇشىن اياق باسقاندا اينالامىزدى اشكوز الاياقتاردان الاستاپ, قوعامدى تازارتۋ – ازاماتتىق مىندەتىمىز.
قازاقستان پرەزيدەنتى سىبايلاس جەمقورلىققا قارسى كۇرەس ەلىمىزدىڭ ستراتەگيالىق دامۋىنىڭ نەگىزگى باسىمدىقتارىنىڭ ءبىرى ەكەنىن ايتتى. بۇل باعىتتا بىرقاتار ماڭىزدى مىندەت اتقارىلعان, اتاپ ايتقاندا, قازاقستان حالىقارالىق گرەكو ۇيىمىنا مۇشە بولدى, قاراماعىنداعى قىزمەتكەردىڭ سىبايلاس جەمقورلىققا قاتىسى انىقتالعان جاعدايدا ونىڭ باسشىسىنىڭ قىزمەتىنەن بوساتىلۋى زاڭمەن بەكىتىلدى, سىبايلاس جەمقورلىق تاۋەكەلدەرىن زاڭنامامەن ساراپتاۋ جۇمىستارى كۇشەيتىلدى.
«سىبايلاس جەمقورلىقتىڭ سەبەبى مەن شارتتارىن جويماي ونىمەن كۇرەسۋ, بۇل – جەل ديىرمەنمەن الىسۋ. حالىق الدەبىر شەنەۋنىكتىڭ نەمەسە باسشىنىڭ جاي جاۋاپكەرشىلىككە تارتىلعانىن كورىپ قانا قويماي, ول جۇمىس ىستەگەن مەملەكەتتىك مەكەمەدە ەندى مۇنداي جاعدايدىڭ قايتالانبايتىنىن دالەلدەيتىن تۇبەگەيلى وزگەرىستەردىڭ ورىن العانىنا كۋا بولۋى كەرەك. ازىرگە مەن مۇنداي كەشەندى جانە تۇبەگەيلى جۇمىستى كورىپ وتىرعان جوقپىن. شەنەۋنىكتەر شەڭبەر جاساپ, بىرىنەن كەيىن ءبىرى اۋىسىپ جاتىر. ال جۇيەلى پروبلەمالار شەشىلمەگەن كۇيى تۇر», دەدى قاسىم-جومارت توقاەۆ سىبايلاس جەمقورلىققا قارسى كۇرەس ماسەلەلەرى جونىندە كەڭەستە سويلەگەن سوزىندە.
سونىمەن قاتار سىبايلاس جەمقورلىقپەن پارمەندى كۇرەسۋ ءۇشىن حالىقتىڭ قۇقىقتىق ساۋاتسىزدىعىن جوياتىن, قۇقىقتى ءتۇسىندىرۋ جۇمىسىنىڭ دەڭگەيى مەن ساپاسىن ارتتىرۋ كەرەكتىگىنىڭ ماڭىزى زور. حالىق ءوز قۇقىعىن, وزدەرىنە قارسى قانداي دا ءبىر قۇقىققا قايشى ءىس-ارەكەت جاسالعان جاعدايدا قانداي ءىس-قيمىل قولدانۋ كەرەكتىگىنىڭ ناقتى جولدارىن تولىق بىلۋلەرى قاجەت. كونستيتۋتسيالىق ءتارتىپتى قورعاۋ, سىبايلاس جەمقورلىقپەن كۇرەس اياسىندا ءتيىمدى, بىرىڭعاي جالپى مەملەكەتتىك ساياسات جۇرگىزۋ, مەملەكەت پەن ازاماتتاردىڭ ءومىر ءسۇرۋىنىڭ بارلىق سالالارىندا سىبايلاس جەمقورلىق پەن ونىڭ كورىنىستەرى دەڭگەيىن تومەندەتۋ, قوعامنىڭ مەملەكەتكە جانە ونىڭ ينستيتۋتتارىنا سەنىمىن نىعايتۋ بۇگىنگى كۇندەگى باستى ماقسات بولىپ وتىر.
وسى ماقساتتاعى جۇمىستاردى جۇيەلى جۇرگىزۋگە تاعى ءبىر سەرپىن رەتىندە «قازاقستان رەسپۋبليكاسىندا قىلمىسقا جانە سىبايلاس جەمقورلىققا قارسى كۇرەستى كۇشەيتۋ جانە قۇقىق قورعاۋ قىزمەتىن ودان ءارى جەتىلدىرۋ جونىندەگى قوسىمشا شارالار تۋرالى» قازاقستان رەسپۋبليكاسى پرەزيدەنتىنىڭ جارلىعى قولدانىسقا ەنگىزىلگەن. بۇل جارلىق ەلىمىزدەگى قۇقىق قورعاۋ ورگاندارى قىزمەتتەرىن جەتىلدىرۋگە باعىتتالا وتىرىپ, سىبايلاس جەمقورلىققا قارسى ارەكەتتەرمەن ولاردىڭ پايدا بولۋىنىڭ الدىن-الۋدا جۇيەلى, ءارى تۇراقتى شارالار اتقارۋدى قامتاماسىز ەتەدى. سىبايلاس جەمقورلىق تەك قۇقىق بۇزۋشىلىق ەمەس. بۇل مەملەكەتتىڭ تيىمدىلىگىنە دەگەن سەنىمدى تومەندەتەدى جانە ۇلتتىق قاۋىپسىزدىككە تىكەلەي قاتەر توندىرەدى. سوندىقتان مەملەكەت پەن قوعام سىبايلاس جەمقورلىققا قارسى بىرىگىپ, ارەكەت ەتۋى كەرەك.
