پارلامەنتارالىق بايلانىستار جايى تالقىلاندى

سەنات توراعاسى قاسىم-جومارت توقاەۆ قازاقستانعا العاش رەت رەسمي ساپارمەن كەلگەن ارگەنتينانىڭ سىرتقى ىستەر جانە عيبادات ەتۋ ءمينيسترى ەكتور ماركوس تيمەرمانمەن كەزدەستى. ق.توقاەۆ ساپاردىڭ ەكى ەل اراسىنداعى ءوزارا ءتيىمدى ىنتىماقتاستىققا قۋاتتى سەرپىن بەرەتىنىنە سەنىم ءبىلدىردى. سەنات توراعاسى مەيماننىڭ ساپارى قازاقستان پرەزيدەنتى ن.نازارباەۆتىڭ باستاماسى بويىنشا ەۋرازيالىق ەكونو­ميكالىق وداققا قول قويىلاتىن تاريحي كۇنگە تۇسپا-تۇس كەلگەنىنە نازار اۋداردى. ە.تيمەرمان بۇل وقيعانىڭ العا قاراي جاسالعان ماڭىزدى قادام ەكەنىن اتاپ ءوتتى. سەنات توراعاسى قازاقستاننىڭ جوعارى زاڭ شىعارۋ ورگانىنىڭ قۇرىلىمى جانە قىزمەتىمەن تا­نىس­تىردى. ول قازاقستان پار­لامەنتى مەن ارگەنتينانىڭ ۇلت­تىق كونگرەسى اراسىنداعى تىكەلەي بايلانىس ورناتۋدى ۇسىندى جانە ارگەنتينالىق سەناتورلاردى استاناعا كەلۋگە شاقىردى. جۇزدەسۋشىلەر سونداي-اق, ەكى ەل پارلامەنتتەرىنىڭ جوعارعى پالاتالارىندا دەپۋتاتتاردىڭ ىنتىماقتاستىق توپتارىن قۇرۋ قاجەتتىگىن اتاپ ءوتتى. ق.توقاەۆ ارگەنتينانى استانادا بولاتىن ەكسپو-2017 كورمەسىنە بەلسەندىلىكپەن قاتىسۋعا شاقىردى جانە بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولۋىنا قازاقستاننىڭ كانديداتۋراسىن بۋەنوس-ايرەستىڭ قولداۋىنا ءۇمىت ارتاتىنىن جەتكىزدى. ارگەنتينا ءسىم-ءىنىڭ باسشىسى قازاقستان مۇنداي مارتەبەگە لايىق ەكەنىن جانە دۇنيەجۇزىلىك ۇيىم جۇمىسىنا ءبىزدىڭ ەلىمىزدىڭ بەلسەندى ارالاسۋى ءىستى جاقسى جاعىنا وزگەرتۋگە, ونىڭ ءىشىن­دە, شيەلەنىستەردى رەتتەۋگە كومەك­تە­سەتىنى تۋرالى پىكىرىن ءبىلدىردى, دەپ حابارلادى سەناتتىڭ ءباسپاسوز قىزمەتى.