قازىر ەلىمىزدە 20 قاراشاعا بەلگىلەنگەن كەزەكتەن تىس پرەزيدەنت سايلاۋى شەڭبەرىندە ۇگىت-ناسيحات كەزەڭى جالعاسىپ جاتىر. وسىعان وراي قۇزىرلى ورگان وسى كەزدە سايلاۋعا بايلانىستى قوعامدىق پىكىرگە ساۋال سالۋدى جۇرگىزۋ ءتارتىبى زاڭمەن قاتاڭ رەتتەلەتىنىن ەسكەرتىپ ءوتتى.
ناقتى ايتقاندا, بۇل سالادا كەمىندە 5 جىل تاجىريبەسى بار, ساۋال سالۋ تۋرالى ورتالىق سايلاۋ كوميسسياسىن الدىن الا جازباشا حاباردار ەتكەن, تىركەلگەن زاڭدى تۇلعالار عانا قوعامدىق پىكىرگە ساۋال سالۋدى جۇرگىزۋگە قۇقىلى. ال حابارلامادا ساۋالناما جۇرگىزۋگە قاتىساتىن جانە وندا جۇمىس تاجىريبەسى بار ماماندار, ساۋال سالۋ جۇرگىزىلەتىن وڭىرلەر, قولدانىلاتىن تالداۋ ادىستەرى تۋرالى مالىمەتتەر جان-جاقتى كورسەتىلۋگە ءتيىس.
بۇگىنگى كۇنگە دەيىن وسك-عا وسىنداي جازباشا حابارلامامەن 7 زاڭدى تۇلعا جۇگىنگەن. الايدا باس پروكۋراتۋرا سايلاۋ كۇنى داۋىس بەرۋگە ارنالعان ءۇي-جايدا قوعامدىق پىكىرگە ساۋال سالۋعا تىيىم سالىنعانىن مالىمدەدى. سايلاۋ كۇنى سايلاۋ ۋچاسكەلەرىنەن شىعۋ كەزىندە وسك-نى جازباشا حاباردار ەتكەن, بەلگىلەنگەن تارتىپپەن تىركەلگەن زاڭدى تۇلعالارعا عانا ساۋال سالۋدى جۇرگىزۋگە رۇقسات ەتىلەدى.
«باق ساۋال سالۋ ناتيجەلەرىن جاريالاۋ كەزىندە ونى جۇرگىزگەن زاڭدى تۇلعانى جانە ساۋال سالۋعا تاپسىرىس بەرگەن جانە تولەگەن ادامداردى, وتكىزۋ ۋاقىتىن, اقپارات جيناۋ ءادىسىن, سۇراقتاردىڭ ناقتى تۇجىرىمىن, سۇرالعانداردىڭ سانىن جانە ساۋال سالۋ ناتيجەلەرىنىڭ قاتەلىك كوەففيتسيەنتىن كورسەتۋگە مىندەتتى.
ساۋال سالۋ ناتيجەلەرىن, سايلاۋ ناتيجەلەرىنىڭ بولجامدارىن, سايلاۋعا بايلانىستى وزگە دە زەرتتەۋلەردى داۋىس بەرۋ كۇنىنە دەيىن 5 كۇن ىشىندە جانە داۋىس بەرۋ كۇنى باق-تا جاريالاۋعا جول بەرىلمەيدى», دەپ جازىلعان ۆەدومستۆو تاراتقان حابارلامادا.
ياعني باق ساۋال سالۋ ناتيجەلەرىن 15 قاراشاعا دەيىن جاريالاي الادى. ال سايلاۋ كۇنى سايلاۋ ۋچاسكەلەرىنەن شىققاندا جۇزەگە اسىرىلعان قوعامدىق پىكىرگە ساۋال سالۋ ناتيجەلەرىن 20 قاراشادان كەيىن عانا باق-تا جاريالاۋعا رۇقسات ەتىلەدى.
«كونستيتۋتسيالىق زاڭنىڭ بۇل تالاپتارىن ساقتاماۋ اكىمشىلىك قۇقىق بۇزۋشىلىق تۋرالى كودەكستىڭ 120-بابى بويىنشا جاۋاپتىلىققا اكەپ سوعادى. وسىعان وراي بارلىق جەكە جانە زاڭدى تۇلعالاردى, بۇقارالىق اقپارات قۇرالدارىن سايلاۋ پروتسەسىنىڭ بۇزىلۋىنا جول بەرمەۋگە, ونىڭ ىشىندە سايلاۋعا بايلانىستى قوعامدىق پىكىرگە ساۋال سالۋدى جۇرگىزۋ جانە جاريالاۋ كەزىندە كونستيتۋتسيالىق زاڭدى مۇلتىكسىز ساقتاۋعا شاقىرادى», دەپ حابارلادى باس پروكۋراتۋرا.
