«تاعى ءبىر ماڭىزدى ماسەلەگە توقتالعىم كەلەدى. تۇركى مەملەكەتتەرى ۇيىمىنىڭ قىزمەتىن بۇقارالىق اقپارات قۇرالدارى ارقىلى بەلسەندى تۇردە دارىپتەۋىمىز كەرەك. بۇل – وتە قاجەت نارسە. وسى جۇمىستى ەلدەرىمىزدىڭ ىشىندەگى اقپارات قۇرالدارى جانە بەلگىلى حالىقارالىق اگەنتتىكتەر اياسىندا جۇرگىزۋگە بولادى. سەبەبى, الەم قاۋىمداستىعى ءبىزدىڭ تۇركى الەمىندەگى ىقپالداستىقتى نىعايتۋ ءۇشىن جاساپ جاتقان اۋقىمدى جۇمىسىمىز تۋرالى ءبىلۋى قاجەت», دەدى پرەزيدەنت.
ق.توقاەۆ جاھان جۇرتشىلىعى ءبىزدىڭ ۇيىمنىڭ جۇمىسى تۋرالى ءالى دە جاقسى بىلە بەرمەيتىنىن اتاپ ءوتتى. دەگەنمەن, قازىر تۇركى ىنتىماقتاستىعى يدەياسى بۇكىل الەمنىڭ نازارىن وزىنە اۋدارا باستاعانىن, سونداي-اق تۇركى وركەنيەتىنەن حابار بەرەتىن قۇندى دەرەكتەردىڭ تابىلىپ جاتقانىنا توقتالدى.
«بۇل – ءبىزدىڭ ەلدەرىمىزگە ورتاق قۇندىلىقتار. سوندىقتان, قولدا بار تاريحي جانە تىلدىك دەرەكتەردى جۇيەلەپ, رەتكە كەلتىرۋ ماڭىزدى مىندەت دەپ ويلايمىن. عىلىمي ينستيتۋتتاردىڭ جانە مەكەمەلەردىڭ اياسىندا بەلسەندى جۇمىس ۇيىمداستىرىپ, ونى الەم جۇرتشىلىعىنا كەڭىنەن تانىستىرۋىمىز كەرەك. ۇيىمنىڭ جۇمىسى ديپلوماتيالىق سامميتتەر مەن قورىتىندى قۇجاتتارى بار كەزدەسۋلەرمەن عانا شەكتەلىپ قالماعانى ءجون. تۇركى مەملەكەتتەرى ۇيىمى بارشا تۇركى الەمىندەگى حالىقتاردى جاقىنداستىراتىن ىقپالدى ورتالىققا اينالۋى قاجەت دەپ سانايمىن», دەدى قاسىم-جومارت كەمەل ۇلى.
