سۋرەتتى تۇسىرگەن ەرلان ومار, «EQ»
وبلىستىق قان ورتالىعىنىڭ باسشىسى گۋلام ۋماروۆتىڭ ايتۋىنشا, ادامداردىڭ قان تاپسىرۋى ءبىر جاعىنان ساۋاپتى ءىس سانالسا, ەكىنشى جاعىنان ازاماتتىڭ دەنساۋلىعى ءۇشىن دە پايداسى مول ەكەن. قىسقاسى, دونورلىق قان تاپسىرعان ادام كىسى بالاسىنا جاقسىلىق جاساپ قانا قويماي, ءوز دەنساۋلىعىن جاقسارتۋعا دا مۇمكىندىك الماق.
«باعامداپ قاراساق, قان تاپسىرۋ – ساۋاپتى ءارى جاۋاپتى ءىس. بۇل قادام دونوردىڭ وزىنە فيزيولوگيالىق جاعىنان دا, پسيحولوگيالىق تۇرعىدان دا پايدالى. ەگەر ەلىمىزدىڭ ءاربىر تۇرعىنى قان تاپسىرۋدى وزىنە ازاماتتىق پارىز دەپ ساناسا, سان مىڭداعان ناۋقاس اۋرۋىنان ايىعىپ, اياعىنا نىق تۇرار ەدى. ءارى قان تاپسىرعان ادامنىڭ قان اينالۋ جانە يممۋندىق جۇيەسى جاقسارادى. سونىمەن قاتار ورگانيزمى نىعايىپ, جۇرەك-قان تامىر جۇيەسى كەسەلدەرىنىڭ پروفيلاكتيكاسى قامتاماسىز ەتىلەدى. بارىنەن بۇرىن قينالعانعا قولۇشىن سوزۋدىڭ مورالدىق پايداسى مول. وسى ورايدا باق جانە الەۋمەتتىك جەلىلەر ارقىلى تۇسىندىرمە جۇمىستارى دا كەڭىنەن جۇرگىزىلۋدە. سونداي-اق وبلىستاعى مەكەمە-كاسىپورىنداردا اكتسيالار ۇيىمداستىرۋ يگى داستۇرگە اينالعان. بيىلعى ماۋسىم ايىندا تاراز قالاسىنداعى «جاستار» اللەياسىندا دۇنيەجۇزىلىك قان دونورى كۇنىنە وراي اۋقىمدى ءىس-شارا ۇيىمداستىرىلدى. «قان دونورلىعى – ىنتىماقتاستىق نەگىزى. دونور بولىڭىز جانە ادام ءومىرىن ساقتاۋعا ۇلەس قوسىڭىز» ۇرانىمەن وتكەن اكتسيا اياسىندا شاتىرلار تىگىلىپ, LED-ەكران ارقىلى تاقىرىپتىق بەينەروليكتەر كورسەتىلدى», دەيدى گ.ۋماروۆ.
ورتالىق باسشىسىنىڭ ايتۋىنشا, وبلىس اكىمدىگى دەنساۋلىق ساقتاۋ باسقارماسى, وبلىستىق كاسىپكەرلەر پالاتاسى جانە «قىزىل اي» قوعامى وبلىستىق فيليالى اراسىندا ۇشجاقتى مەموراندۋمعا قول قويىلعان. سول ارقىلى دا دونور بولۋعا نيەتتى ازاماتتاردىڭ قاراسىن ارتتىرۋعا ايرىقشا نازار اۋدارىلىپ وتىر.
سالاعا كورسەتىلگەن قامقورلىقتىڭ ارقاسىندا قان ورتالىقتارىنىڭ ماتەريالدىق-تەحنيكالىق بازاسى نىعايا تۇسۋدە. وبلىستىق قان ورتالىعى زامان تالابىنا ساي ەڭسەلى عيماراتتا قىزمەت كورسەتۋدە. بۇگىندە مەكەمەدە 112 ادام ەڭبەك ەتەدى. كاسىپورىن دونورلىق قان مەن ونىڭ كومپونەنتتەرىن دايىنداۋمەن, وڭدەۋمەن, تەكسەرۋمەن, جامبىل وبلىسىنىڭ بارلىق ەمدەۋ-پروفيلاكتيكالىق ۇيىمدارىن قامتاماسىز ەتۋمەن, سونداي-اق تەحنوگەندىك جانە تابيعي سيپاتتاعى توتەنشە جاعدايلار كەزىندە قان كومپونەنتتەرىنىڭ قورىن قۇرۋمەن اينالىسادى.
جىلدىق قۋاتتىلىق 15,0 مىڭ ليتر قان مەن ونىڭ كومپونەنتتەرىن ازىرلەۋگە نەگىزدەلگەن. تەحنولوگيا ىلگەرىلەگەن سايىن ناۋقاسقا دونوردان تىكەلەي قان قۇيىلعان كۇندەر دە كەلمەسكە كەتتى. قازىرگى تاڭدا دونوردان الىنعان قان ودان ءارى كوپتەگەن كومپونەنتكە بولىنەدى جانە ولار بەلگىلى ماقساتتا قولدانىلادى. سونداي-اق قان ورتالىعىندا ء«ىnfo-Donor» باعدارلاماسى اياسىندا قان قىزمەتىنىڭ اۆتوماتتاندىرىلعان اقپاراتتىق جۇيەسى جۇمىس ىستەپ تۇر. دايىنداۋدىڭ جانە تەكسەرۋدىڭ بارلىق كەزەڭى كومپيۋتەرلىك جۇيەگە ەنگىزىلىپ, دونوردىڭ كەلۋىنەن باستاپ قان تاپسىرۋى, دايىندالعان قاندى اۋرۋحانالارعا بەرۋگە دەيىنگى ۇدەرىس باقىلاۋدا. وسى ورايدا سانداردى سويلەتە كەتسەك, 2022 جىلدىڭ 9 ايىندا بارلىعى 28 262 قان كومپونەنتى ەمدەۋ-پروفيلاكتيكالىق ۇيىمدارىنا بەرىلدى, جالپى 5 مىڭ رەتسيپيەنتكە قۇيىلدى.
ورتالىق باسشىسىنىڭ سوزىنە سۇيەنسەك, وڭىردەگى قان تاپسىرۋعا نيەتتى ازاماتتاردىڭ سانى جىل وتكەن سايىن ارتىپ كەلەدى. بۇل ءبىرىنشى كەزەكتە مامانداردىڭ جۇرگىزگەن ساپالى جۇمىسىنىڭ ناتيجەسى بولسا, ەكىنشىدەن, جەرگىلىكتى حالىق تا دونور بولۋدىڭ قوعام ءۇشىن پايداسىن تۇسىنگەنىن ايعاقتاي تۇسسە كەرەك.
جامبىل وبلىسى
