قىس قىر استىندا. 5 قاراشا كۇنى كەشكى ساعات 20:00-دە جىلۋ قازاندىعىنىڭ كۇل شىعارۋ جۇيەسىندەگى ستانسادا سورعى ىستەن شىعىپ, №1 قازاندىق اگرەگاتىنىڭ قوسالقى جابدىعى اپاتتى جاعدايدا اجىراتىلدى. ناتيجەسىندە, سالقىنداتقىشتىڭ تەمپەراتۋراسى +39°س دەيىن تومەندەپ كەتكەن. ايتا كەتسەك, قالىپتى تەمپەراتۋرا مولشەرى +70°س ەدى. ورىن العان ولقىلىققا بايلانىستى شۇعىل تۇردە شتاب قۇرىلىپ, ماماندار ماسەلەنى شەشۋ جولىن قاراستىرىپ جاتىر.
– شۇعىل تۇردە مەنىڭ باسشىلىعىممەن اپاتتى جويۋ جونىندەگى شتاب قۇرىلدى. شتاب تاۋلىك بويى جۇمىس ىستەيدى. سونداي-اق جىلۋ ستانساسىنا سوگرا جانە وسكەمەن جەو, «وسكەمەن جىلۋ جەلىلەرى» اق ماماندارى كەلدى. قازىرگى ۋاقىتتا كۇل شىعارۋ جۇيەسىندە قوزعالتقىشتى اۋىستىرۋ, ىسكە قوسۋ-رەتتەۋ جۇمىستارى جۇرگىزىلۋدە. جەو-عا قوسىمشا 120 توننا مازۋت جەتكىزىلدى, وتىندى جونەلتۋ جالعاسۋدا, – دەيدى ايماق باسشىسى دانيال احمەتوۆ.
سونىمەن قاتار اپاتتى جاعدايدى جويۋ ءۇشىن «قازاقمىس» جشس جەو-عا 20-دان اسا قىزمەتكەر جىبەرىپ, جوندەۋ, قالپىنا كەلتىرۋ جۇمىستارىنا قوسىمشا جابدىقتار ءبولدى. ودان بولەك كومەك رەتىندە وسكەمەننىڭ «ۆوستوكۆزرىۆپروم» جشس-نىڭ 20 قىزمەتكەرى كەلدى. قالانىڭ ەنەرگوجۇيەسىنىڭ ۇزدىكسىز جۇمىس ىستەۋى ءۇشىن «بىرىككەن ەنەرگوسەرۆيستىك كومپانياسى» اق ريددەرگە 12 اپاتتىق بريگادا جىبەردى. ريددەر قالاسىنىڭ ءبىلىم ءبولىمى باسشىلىعىنىڭ بۇيرىعىمەن 7-11 قاراشادان باستاپ مەكتەپ وقۋشىلارى قاشىقتىقتان وقىتۋ فورماسىنا كوشتى. قالانىڭ مەكتەپكە دەيىنگى مەكەمەلەرى دە ۋاقىتشا جۇمىسىن توقتاتتى.
– ءبىلىم عيماراتىندا جىلۋ ءالى تارقاي قويعان جوق. بىراق وقۋشىلاردى قاشىقتان وقۋعا جىبەردىك. وقۋ ورنىندا ونلاين وقىتۋ پلاتفورماسى جۇمىس ىستەپ تۇر. شارۋاشىلىق قىزمەتكەرلەرى كۇشەيتىلگەن رەجىمدە جاعدايدى قاداعالاپ وتىر. قالادا جاعدايعا بايلانىستى شتاب قۇرىلىپتى. ءبىلىمدى, بىلىكتى ماماندار كەلىپ, اقاۋلاردى رەتكە كەلتىرىپ جاتىر دەگەن حاباردى ەستىپ وتىرمىز. ىسكەرلىك تانىتسا, ماسەلە وڭىنان شەشىلەدى, – دەپ سەنىم ءبىلدىردى ريددەر اگروتەحنيكا كوللەدجىنىڭ ديرەكتورى سۇڭقار اسقار ۇلى.
رەسمي اقپاراتقا سەنسەك, «تابيعي جانە تەحنوگەندىك سيپاتتاعى توتەنشە جاعدايلاردىڭ سىنىپتاماسىن بەلگىلەۋ تۋرالى» ۇكىمەتتىڭ 2014 جىلعى 2 شىلدەدەگى №756 قاۋلىسىنا سايكەس بۇل اپاتتىق جاعداي جەرگىلىكتى اۋقىمداعى توتەنشە جاعداي دەپ جىكتەلەدى. وبلىس باسشىلىعىنىڭ مالىمەتىنشە, جاعداي ەرەكشە باقىلاۋدا. ريددەر قالاسىن جىلۋمەن جابدىقتاۋدى قالپىنا كەلتىرۋ بويىنشا بارلىق قاجەتتى شارالار قابىلدانىپ جاتىر ەكەن. ال تۇرعىندار بۇل قازاندىقتىڭ كەڭەس ۇكىمەتى تارقاعالى كۇردەلى جوندەۋ كورمەگەنىن ايتادى.
– ەكىنشى كۇننەن استى, ءۇي سۋىپ كەتتى. جىلى سۋ جوق. ءۇيدى ەلەكتر ەنەرگياسىمەن جىلىتىپ وتىرمىز. ەلەكتر ەنەرگياسىن كوپ پايدالانعاندىقتان, ەنەرگيا كومپانياسىنان دا اقاۋ شىعۋى مۇمكىن. مەكتەپ پەن بالاباقشا جابىلدى. ياعني بالا ۇيدە, اتا-انا جۇمىستا. ءورت شىعىپ, قايعىلى جاعداي بولماسا ەكەن. قاۋىپتى. اتا-انانىڭ ءبىرى جالاقىسىن ساقتاي وتىرىپ, بالالارعا قاراۋ كەرەك. ونىڭ ۇستىنە ەل تۇماۋراتىپ اۋىرىپ جاتىر. تاعى ءبىر ايتا كەتەرلىگى, اكىمنىڭ اۋىزشا بۇيرىعىمەن بالاباقشالار, مەكتەپتەر الدىن الا جىل سوڭىنا دەيىن جىلۋعا تولەپ تاستاعان. الماعان قىزمەت ءۇشىن قالاي عانا الدىن الا اقشا تولەگەن؟! تۇسىنىكسىز. جالپى, ريددەر قازاندىعىنىڭ 98 پايىزىن جوندەۋ كەرەك دەپ مامىردا ايتىلعان. بۇل قازاندىق كەڭەس ۇكىمەتى تاراعالى كۇردەلى جوندەۋ كورمەگەن. الايدا ءبىزدىڭ باسشىلىق قىرۋار قارجى جۇمساپ, ورتالىق الاڭدى جوندەدى. ەشكىمگە قاجەتى جوق توعايدىڭ اراسىنا جارىق تارتتى. بيۋدجەتتىڭ قارجىسىن ماقساتسىز جۇمساپ جاتىر دەگەن وسى. سۋىقتا دىردەكتەپ وتىرعانىمىز – جەمقورلىقتىڭ, وتىرىك ءتسيفردىڭ, وتىرىك ەسەپتىڭ ارقاسى, – دەيدى ريددەر قالاسىنىڭ تۇرعىنى نازار اساينوۆ.
ءيا, ايتسا ايتقانداي-اق. «قويشىنىڭ قىزى قوي كەلگەندە ءىس تىگەدى» دەمەكشى, ءبىزدىڭ جاقتا قارا كۇزدە جول جوندەۋ جۇمىستارى باستالادى, قۇبىرلارى اۋىسادى, جىلۋ قازاندىقتارى دا قىس كەلگەندە ىستەن شىعادى. قىس قامىن جاز ويلاپ قويۋعا بولار ەدى عوي. بىلەمىز, ايتۋعا وڭاي. دەيتۇرعانمەن, جاۋاپكەرشىلىك سەزىنە بەرمەيمىز كەيدە. ونىڭ ۇستىنە ريددەردەگى ءدال وسى ماسەلە ءتورت-بەس جىلدان بەرى كوتەرىلىپ كەلە جاتقان كورىنەدى.
شىعىس قازاقستان وبلىسى,
ريددەر قالاسى
