قاڭتار وقيعاسىنا كوبىنەسە «اتويلاعانداردىڭ جەلەۋىنە» ەرىپ, تارتىپسىزدىكتى ۇيىمداستىرۋشىلاردىڭ شىن نيەتىن بىردەن تۇسىنبەگەن نەمەسە وزدەرىنىڭ زاڭسىز ارەكەتتەرىنىڭ زاردابىن باعامداي الماعان ازاماتتارىمىز قاتىستى. وسىنداي وقيعالاردىڭ قاسىرەتى مەملەكەتىمىزدىڭ ەڭ جوعارى قۇندىلىقتارى – ونىڭ ەگەمەندىگى, تۇتاستىعى, كونستيتۋتسيالىق قۇقىعى مەن قوعامدىق قاۋىپسىزدىگىنە قاۋىپ ءتوندىرىپ, ەلدىڭ بىرلىگىنە ىرىتكى سالدى.
قازىرگى ۋاقىتتا جاپپاي تارتىپسىزدىكتەرگە قاتىسۋشىلاردىڭ (ۇيىمداستىرۋشىلاردى ەسەپتەمەگەندە) سانى 1 600 ادامعا جەتىپ وتىر. ونىڭ ىشىندە 1 500 ادام راقىمشىلىققا ىلىنگەن. راقىمشىلىق زاڭى تەك 4-7 قاڭتار ارالىعىندا وتكەن جاپپاي تارتىپسىزدىكتەرگە قاتىسقان, سول جەردە بولىپ تۇتقىندالعان ازاماتتاردى قامتيدى.
ءبىر ەسكەرەتىن نارسە – راقىمشىلىققا ىلىككەن قىلمىستىق ىستەردىڭ بارلىعى تولىق اقتالۋعا جاتقىزىلمايدى. راقىمشىلىق جاساۋ ادامدى اقتامايدى جانە ونى زاڭ تۇرعىسىنان اقتاي المايدى, ونىڭ ماقساتى – جازادان بوساتۋ نەمەسە ونىڭ مەرزىمىن قىسقارتۋ.
زاڭ نورمالارىنا سايكەس, قىلمىستىق ىستەردى تەك اۋىر ەمەس قىلمىستار نەمەسە اۋىر ەمەس جانە ورتاشا اۋىرلىقتاعى قىلمىستار جاساعان ادامدارعا قاتىستى عانا ەمەس, سونىمەن قاتار اۋىر قىلمىستار ءۇشىن جازانى 3/4-كە قىسقارتۋ كوزدەلىپ وتىر. سونىمەن قاتار ەگەر سوتتالعاننىڭ جازاسىن وتەۋگە ءبىر جىلدان اسپايتىن ۋاقىت قالسا, جازا مەرزىمى وتەلمەگەن بارلىق مەرزىمگە قىسقارتىلادى.
«راقىمشىلىق جاساۋ تۋرالى» زاڭنىڭ ادامگەرشىلىك تۇرعىسىنان دا ماڭىزى زور. ماسەلەن, ۇكىمەت پەن جەرگىلىكتى اتقارۋشى ورگاندار مەكەمەلەردەن بوساتىلعانداردى جۇمىسقا تۇرعىزۋ, تۇراقتى تۇرعىلىقتى جەرى جوقتاردى ارنايى ورتالىقتارعا ورنالاستىرۋدى قامتاماسىز ەتۋ, سونداي-اق ولارعا الەۋمەتتىك جانە وزگە دە كومەك كورسەتۋ جونىندەگى ءىس-شارالاردى جۇزەگە اسىرۋعا مىندەتتى.
راقىمشىلىق اكتىسى قوعامىمىزدى بىرىكتىرۋ ماقساتىندا ادلەتتى قازاقستاننىڭ بولاشاعى ءۇشىن قابىلداندى.
ينديرا اۋباكىروۆا,
م.نارىكباەۆ اتىنداعى قازمزۋ پروفەسسورى,
زاڭ عىلىمدارىنىڭ دوكتورى
