ەۋرازيالىق ەكونوميكالىق وداق ۇستانىمى بۇۇ تالاپتارىنا قايشى كەلمەيدى

استانا. 26 مامىر. ورتالىق كوممۋنيكاتسيالار قىزمەتىندە وتكەن بريفينگتە ادىلەت ءمينيسترىنىڭ ورىنباسارى ەلۆيرا ازيموۆا ەۋرازيالىق ەكونوميكالىق وداق بۇۇ پرينتسيپتەرىن ورىنداۋعا مىندەتتى ەكەنىن جەتكىزدى. بۇل تۋرالى «قازاقپارات» حابارلادى. ەلۆيرا ازيموۆانىڭ ايتۋىنشا, تاراپتار كەلىسىمى بويىنشا ەۋرازيالىق ەكونوميكالىق وداق حالىقارالىق ۇيىم ساناتىنا جاتقىزىلادى. ادىلەت ءمينيسترىنىڭ ورىنباسارى: «ءىس جۇزىندە قۇرىلاتىن بارلىق حالىقارالىق ۇيىمدار بۇۇ-عا تىركەلۋى ءتيىس. بۇل ۇيىمدار بۇۇ-نىڭ بارلىق  ۇستانىمدارىن ورىنداۋعا مىندەتتى», – دەدى. بريفينگتە ۆيتسە-مينيستر ەۋرازيالىق ەكونوميكالىق وداقتى قۇرۋ جونىندەگى كەلىسىم زاڭگەرلىك اۋقىمدى قۇجات ەكەنىنە توقتالدى. ونىڭ سوزىنە قاراعاندا, اتالعان كەلىسىم-شارت نەگىزىنە قولدانىستاعى 68 حالىقارالىق قۇجات جاتقىزىلعان. وسى ۋاقىتقا دەيىن بۇل كەلىسىمدە ەلىمىزدىڭ مۇددەسىنە قايشى كەلەتىن جاعدايلار كەزدەسپەگەن. ەلۆيرا ازيموۆا: «ەۋرازيالىق ەكونوميكالىق وداق قۇرۋ تۋرالى كەلىسىم جەتىلدىرىلگەن قۇجات. ول ۋاقىت تالابىنا جانە ءبىزدىڭ مۇددەمىزگە ساي كەلەدى», – دەدى. جولدىباي بازار. دەرەككوز: «قازاقپارات». فوتو: tonykok.kz.