مانشۇك مۋزەيىنىڭ استان-كەستەڭىن شىعاردى

وتكەن سارسەنبىنىڭ بەيسەنبىگە قاراعان تۇنىندە ورال قالاسىندا ادامنىڭ ءوڭى تۇگىل, تۇسىنە كىرە بەرمەيتىن لاس تا جىمىسقى قىلمىس جاسالدى. ءتۇن قاراڭعىلىعىن جامىلعان بەلگىسىز بىرەۋ وسى ساتتە كەڭەس وداعىنىڭ باتىرى مانشۇك مامەتوۆانىڭ مەموريالدىق مۋزەي-ءۇيىنىڭ تەرەزەسىن سىندىرىپ ىشىنە كىرىپ, بولمەلەردىڭ استان-كەستەڭىن شىعارعان. ءارى مۇنداعى ەشقانداي بالاماسى مەن سىڭارى جانە كوشىرمەسى جوق تاريحي-مۋزەيلىك اسا قۇندى جادىگەرلەردى ۇرلاپ كەتكەن. ونىڭ ىشىندە 1891 جىلعى ۇلگىدەگى «موسين» سنايپەرلىك ۆينتوۆكاسى, «كو» ماركالى كارابين جانە مەحانيكالىق پاتەفون بار. سونىمەن بىرگە, الگى الاياق وسىندا قويىلعان قازاق حالقىنىڭ تاعى ءبىر قايراتكەر ۇلى, قاھارماندار قالاسى – وردادا قازاق­­­­تىڭ تۇڭعىش اتتى اسكەر پولكىن قۇرۋعا اتسالىس­قان حاميت ءچۋريننىڭ بىلعارى رۋلەتكا-ولشەگىشىن دە ويلانباستان جىمقىرعان. قولدى بولعان زاتتاردىڭ ىشىندە «سامسۋنگ» ۇلگىسىندەگى زاماناۋي باعالى بۇيىمدار دا بار. وسى وقيعاعا بايلانىستى باتىس قازاقستان وبلىستىق ىشكى ىستەر دەپارتامەنتىنىڭ ءباسپاسوز قىزمەتى تاراتقان جەدەل اقپارات پاراعىندا بۇل كەزدە كۇزەتشى تۇك بىلمەي, تۇك سەزبەي ءارى تۇك ەستىمەي قان­نەن-قاپەرسىز قورىلداپ ۇيىقتاپ جاتقانى كورسەتىلگەن. ءارى ول مۋزەي ديرەكتورىنىڭ ۇلى بولىپ شىققان. ءتۇن ىشىندە ورىن العان سوراقىلىقتى مۋزەي قىزمەتكەر­لەرى تاڭەرتەڭ جۇمىسقا كەلگەندە ءبىر اق كورىپ, تەك سودان كەيىن عانا پوليتسياعا حابارلاعان. شاقىرۋ تۇسكەن­نەن كەيىن ءتورت ساعات ىشىندە جاسالعان ايرىقشا قىل­مىس ءىزى سۋىماي اشىلدى. ياعني كۇندىزگى 14.00 شاما­سىن­دا مۋزەيدى توناعان قاراقشى وبلىس ورتالىعىندا قولعا ءتۇستى. بۇل 1989 جىلى دۇنيەگە كەلگەن, بۇعان دەيىن ۇرلىق پەن توناۋشىلىقتى كاسىپ ەتىپ كەلگەن, ءارى وسى قىلمىسى ءۇشىن جاستىعىنا قاراماستان بەس رەت سوتتالىپ ۇلگەرگەن ازعىن بولىپ شىقتى. سونىڭ تورتەۋىندە وعان تۇزەۋ كولونياسىندا كەشىرىلىم جاسالىپ, شارتتى تۇردە ۋاقىتىنان بۇرىن شىعىپتى. مەملەكەتىمىز­دىڭ وسىنداي ىزگىلىگىن تۇسىنە الماعان وعان ەندى نە دەۋگە بولادى؟ تونالعان مۋزەيلىك قۇندىلىقتار تابىلىپ كەرى قايتارىلدى. ۇرلىق جاساعان جان قاماۋعا الىندى. ول مۇندا سوتتىڭ شەشىمىن كۇتەتىن بولادى. تەمىر قۇسايىن, «ەگەمەن قازاقستان». ورال.