فورۋم اياسىندا وزگەرمەلى كليماتقا اۋىل شارۋاشىلىعىن بەيىمدەۋ ماسەلەلەرى تالقىلاندى

VII استانا ەكونوميكالىق فورۋمى اياسىندا قازىرگى وزگەرمەلى الەمدىك كليماتقا اۋىل شارۋاشىلىعى سالاسىن بەيىمدەۋگە ارنالعان سەسسيا بولىپ ءوتتى. سەسسيا جۇمىسىنا تانىمال ساياساتشىلار, قازاقستانداعى ۇكىمەتتىك ەمەس ۇيىمداردىڭ, حالىقارالىق ۇيىمداردىڭ وكىلدەرى, تاياۋ جانە الىس شەتەلدەردەن اۋىل شارۋاشىلىعى سالاسىنداعى عالىمدار مەن ماماندار, ساراپشىلار قاتىستى. ءىس-شارا بارىسىندا پانەلدىك سەسسياعا قاتىسۋشىلار كليماتتىڭ وزگەرۋ پروبلەماسىن جانە ونىڭ اۋىل شارۋاشىلىعىنىڭ دامۋىنا اسەرىن تالقىلادى. وتاندىق جانە حالىقارالىق ساراپشىلاردىڭ عىلىمي زەرتتەۋلەرى نەگىزىندە جەر شارۋاشىلىعى جۇيەلەرىن دامىتۋ جانە وزگەرمەلى كليماتقا قازاقستان رەسپۋبليكاسىنىڭ اۋىل شارۋاشىلىعى سالاسىن بەيىمدەۋ بويىنشا بىرقاتار ۇسىنىستاردى ازىرلەدى. پانەلدىك سەسسيانى اشۋ كەزىندە قازاقستان رەسپۋبليكاسىنىڭ اۋىل شارۋاشىلىعى ءمينيسترى اسىلجان مامىتبەكوۆ كليماتتىڭ وزگەرۋىنەن تۋىندايتىن قاتەرلەردەن بارىنەن بۇرىن اۋىل شارۋاشىلىعى سالاسى زارداپ شەگەتىنىن اتاپ ءوتتى. اگرارلىق سالانىڭ كليماتتىڭ وزگەرۋىنە تۇراقتى بولۋى ءۇشىن سالداردى باعالاۋدى, ۇزاق مەرزىمدى بەيىمدەۋ ءۇشىن ينستيتۋتتىق الەۋەتتى ءوسىرۋدى جانە تابيعي اپاتتاردان تۋىندايتىن قاۋىپتەردى باسقارۋ جۇيەسىن قۇرۋدى قاراستىراتىن ءتيىستى ساياسات جۇرگىزىلۋى ءتيىس. سەسسيادا ساۋد ارابياسى كورول­دىگىنىڭ اۋىل شارۋاشىلىعى ءمينيسترى فاحد بەن ابدۋرراحمان بالگۋنەيم, بۇۇ ازىق-ت ۇلىك جانە اۋىل شارۋاشىلىعى ۇيىمىنىڭ شىعىس ەۋروپا مەن ورتالىق ازياداعى وڭىرلىك ديرەكتورى ۆلاديمير راحمانين, بەلارۋس رەسپۋبليكاسى اۋىل شارۋاشىلىعى ءمينيسترىنىڭ ءبى­رىن­شى ورىنباسارى لەونيد اداموۆيچ مارينيچ, ورتالىق ازيا ءۇشىن دۇنيە­جۇزىلىك بانكتىڭ وڭىرلىك ديرەكتورى سارودج كۋمار دجا, قر قورشاعان ورتا جانە سۋ رەسۋرستارى ءمينيسترى ن.قاپ­پاروۆ جانە Greenport Holland International پرەزيدەنتى حەرمان دە بوون ءسوز سويلەپ, ءوز پىكىرلەرىن ورتاعا سالدى. پانەلدىك سەسسيانىڭ قورى­تىن­دى­سىندا وزگەرمەلى كليماتقا اۋىل شارۋا­شىلىعىن بەيىمدەۋ ماسەلەلەرى بويىنشا ۇسىنىستار ازىرلەندى. سۇڭعات ءالىپباي, «ەگەمەن قازاقستان».