قوستاناي وبلىسىندا ءىز-ءتۇسسىز جوعالىپ كەتكەن 7 جاسار قىزدىڭ ءمايىتى تابىلدى

استانا. 23 مامىر. قوستاناي وبلىسى رۋدنىي قالاسىندا 24 ساۋىردەن بەرى ىزدەستىرىلىپ كەلگەن 7 جاسار قىزدىڭ ءولى دەنەسى تابىلدى. بۇل تۋرالى «24kz» حابارلادى. ەستەرىڭىزگە سالا كەتەيىك, وسىدان ءبىر اي بۇرىن قىز بالانى بەلگىسىز ەر ادام بەلگىسىز جاققا ەرتىپ اكەتكەن. سول كۇيىندە ۇيىنە قايتىپ ورالماعان ۆيكتوريا گانيانى پوليتسيا قىزمەتكەرلەرىمەن بىرگە مىڭداعان ەرىكتى ىزدەدى. الايدا, جاپپاي ىزدەستىرۋ شارالارىنىڭ سوڭى جەرگە كومىلگەن قىز بالانىڭ ءمايىتىن تابۋمەن, ياعني, وكىنىشتى جاعدايدا اياقتالدى.  ونىڭ جانسىز دەنەسى قالا سىرتىنداعى سالىنىپ جاتقان عيمارات ىشىنەن تابىلعان. قوستاناي وبلىستىق ىشكى ىستەر دەپارتامەنتىنىڭ ءباسپاسوز حاتشىسى ادىلبەك نۇرماقين: «22 مامىر كۇنى رۋدنىي-توبىل تاسجولىنىڭ بويىندا قۇرىلىس ءجۇرىپ جاتقان ءبىر عيمارات ىشىنەن جاس قىز بالانىڭ ءمايىتى تابىلدى. ول رۋدنىي قالاسىندا 24 ءساۋىر كۇنى جوعالىپ كەتكەن ۆيكتوريا گانيا ەكەنىن اتا-اناسى تانىپ وتىر. وسىعان بايلانىستى قازىر ساراپتاما جۇمىستارى تاعايىندالدى. اتالعان قىلمىسقا بايلانىستى قىلمىستىق كودەكستىڭ  96-بابى بويىنشا ءىس قوزعالعان. قازىرگى كەزدە كۇدىكتىنى ىزدەۋ جۇمىستارى جۇرگىزىلىپ جاتىر», – دەدى. جولدىباي بازار. دەرەككوز: «24kz». فوتو: «24kz».