قازاق ءتىلىنىڭ قولدانىس اياسىن كەڭەيتۋ ماقساتىندا ۇيىمداستىرىلعان بۇل بايقاۋعا ەلىمىزدىڭ وڭىرلەرى مەن استانا, الماتى, شىمكەنت قالالارىنان ىرىكتەلگەن 12 ۇمىتكەر قاتىستى.
شارانى اشىپ ءسوز سويلەگەن اكادەميك ەۆنەي بوكەتوۆ اتىنداعى قاراعاندى ۋنيۆەرسيتەتىنىڭ الەۋمەتتىك-مادەني دامۋ جونىندەگى پرورەكتورى مەيىرجان سىزدىقوۆ: «الەمدەگى جاھاندانۋ پروتسەسى ءار حالىقتىڭ الدىنا وزدەرىنىڭ ۇلتتىق رۋحاني-مادەني قۇندىلىقتارىن جانداندىرۋ مىندەتىن قويىپ وتىر. وسى رەتتە بىزدەر ءۇشىن قازاق ءتىلىنىڭ الەۋمەتتىك مارتەبەسىن جوعارىلاتۋ, مەملەكەتتىك ءتىلدى رۋحاني-مادەني قۇندىلىق رەتىندە دارىپتەۋ اسا ماڭىزدى. بيىلعى بايقاۋ مەديتسينا سالاسىندا جۇرگەن وزگە ۇلت وكىلدەرىنىڭ اراسىندا ءوتىپ وتىر. ونىڭ وزىندىك ەرەكشەلىگى بار. بىرىنشىدەن, دەنساۋلىق سالاسى – حالىق ءجيى تۇتىناتىن سالا. نەلسون ماندەلا ايتقانداي, ەگەر ادامدارمەن ۇعىنىسا الاتىن تىلدە سويلەسسەڭىز, ءسوزىڭىز ونىڭ اقىل-ويىنا عانا ارنالعان بولىپ شىعادى. ال ونىڭ انا تىلىندە قارىم-قاتىناس ۇستاساڭىز, بىردەن جۇرەگىنە جول تاپتىم دەنىز دەگەنىندەي. ەكىنشىدەن, قازاق ءتىلىن تۇرمىستىق دەڭگەيدە مەڭگەرۋ ءوز الدىنا; ونىڭ سالت-ءداستۇرىن, ادەت-عۇرپىن, مادەنيەتى مەن ادەبيەتىن, ونەرىن تانىساڭىز, ءسىز ەلدىڭ كوز الدىندا جاندۇنيەسى باي ادامعا اينالىپ, زيالى قاۋىم وكىلى قاتارىنان تابىلاسىز, قاراپايىم ەڭبەك ادامدارىنىڭ قۇرمەتىنە بولەنەسىز», دەدى.
رەسپۋبليكالىق بايقاۋ ءتورت كەزەڭنەن تۇردى. العاشقىسىندا قاتىسۋشىلار ءوز ونەرلەرىن كورسەتسە, ەكىنشى بولىگىندە قازاقتىڭ ماقال-ماتەلدەرى بويىنشا ءبىلىم سىناستى. بۇدان كەيىن ەكرانداعى ۇياشىقتاردا كورسەتىلگەن تاقىرىپ توڭىرەگىندە وي ءوربىتتى. ەڭ سوڭىندا ءبىر مينۋت ىشىندە جيىرما سۇراققا جەدەل جاۋاپ بەرۋ بويىنشا سايىستى.
قازىلار القاسىنىڭ قىزۋ تالقىلاۋىنان كەيىن بايگەنىڭ باس جۇلدەسى استانالىق روزالينا ماحمۋدوۆانىڭ قانجىعاسىنا بايلانىپ, 300 مىڭ تەڭگە سىيلىققا يە بولدى. ءبىرىنشى ورىنعا شىمكەنتتىك ساردوربەك رۋستامجانوۆ لايىقتى دەپ تانىلدى. وعان 200 مىڭ تەڭگەنىڭ سەرتيفيكاتى تابىستالدى. ەكىنشى ورىندى تۇركىستان وبلىسىنان فاتيما مامەدوۆا جەڭىپ الدى. ول 150 مىڭ تەڭگەگە يە بولدى. ءۇشىنشى ورىندى سولتۇستىكقازاقستاندىق سايدالي يۋسۋپوۆ مەن الماتى وبلىسىنان رۋفات سايداليموۆ ءبولىستى. ولاردىڭ ارقايسىسىنا 100 مىڭ تەڭگە سىيلىق بەرىلەدى. بۇلاردان باسقا ءتورت ۇمىتكەر ارقايسىسى 15 مىڭ تەڭگەدەن ىنتالاندىرۋ سىيلىعىنا يە بولسا, قالعان قاتىسۋشىلار ارناۋلى ديپلوم, العىسحاتپەن ماراپاتتالدى. قازىلار القاسىنىڭ قۇرامىنا بەلگىلى عالىمدار, ءتىل سالاسىنىڭ بىلىكتى ماماندارى مەن قازاقستان حالقى اسسامبلەياسىنىڭ مۇشەلەرى ەندى.
