اۋىلداردىڭ اكىمدەرى قايدا؟

بۇل كۇندەرى وبلىستاعى اعاشورىن, سىلەتى, قاراتومار, اقشيمان, قوڭىروزەك,  كوۆالەۆكا اۋىلدارى  اكىمسىز  وتىر. ءتىپتى, وبلىس ورتالىعىنا قاراستى  مويىلدى اۋىلىنىڭ اكىمى  «استاناعا شاقىرتىپ جاتىر» دەپ ءوتىنىشىن جازىپ, اپىل-عۇپىل جينالىپ, كەتىپ قالىپتى. بىلتىر عانا سايلانعان اكىمدەر قايدا كەتىپ قالىپتى دەپ تاڭعالىپ وتىرعان شىعارسىزدار. ءبىز دە ءدال سول كۇيدەمىز. ال اكىمدەر ارىزدارىن جازىپ, اۋىلدارىمەن قوشتاسىپ, كەتىپ قالعان كورىنەدى. ءبىز مۇنى جاقىندا ەرتىس اۋدانى اعاشورىن اۋىلىنا بارعاندا ەستىپ, بىلدىك. ەكى-ءۇش ايداي بولدى, اكىمسىز وتىرمىز, ورنىندا مىندەتىن اتقارۋ­شى­لار ءجۇر, دەدى اۋىلدىق­تار. ءسويت­سەك, وسى اۋداننىڭ شالعاي­دا­عى سىلەتى اۋىلىنىڭ اكىمى ساتى­بالدى جۇسىپباەۆ تا اعاشورىن اۋىلىنىڭ اكىمى نۇرلان احمەتوۆ سياقتى «وتباسى جاعدايىمەن» دەپ قىزمەتتەرىنەن ءوز وتىنىشتەرىمەن كەتىپتى. سايلانعاندارىنا ءبىر جىلدا بولماعان اكىمدەردىڭ اۋىلدان «قاشىپ» كەتكەندەرى تۇسىنىكسىز, ارينە. سوندا بۇل اكىمدەرگە حالىقتىڭ اتىنان سەنىم ءبىلدىرىپ سايلاعان اۋداندىق ءماسليحات دەپۋتاتتارى ەلگە ەندى نە دەمەك؟.. ءماسليحات دەپۋتاتتارى اۋىلدىڭ حالقىنا جاقىن, تۇرمىس-تىرشىلىگىن, شارۋاشىلىعىن جاقسى بىلەتىن ادامدى سايلاۋلارى كەرەك ەمەس پە ەدى؟! اۋىل – ەلدىڭ تىرەگى. اكىمدەردى سايلاۋ وڭاي. ال, ولار حالىقپەن جۇمىس جاساي­­ الا ما, جوق پا, جۇمىسىن جاۋ­اپ­­كەرشىلىكپەن اتقاراتىن ادام با, ول جا­عىنا دەپۋتاتتار مۇلدە ۇڭىلمەگەن سەكىلدى. بۇل ادامداردى «اۋىل اكىمى بولا الادى» دەپ ۇكىلەپ, ۇسىنىس تاستاعان اۋدان اكىمدەرى ەندى نە قاراپ وتىر دەگەن ساۋال دا ەرىكسىز كولبەڭدەيدى. ايتپاقشى, وبلىس ورتالىعىنا قاراستى مويىلدى اۋىلىنىڭ اكىمى ايدىن تۇگەلباەۆ تا قىس ىشىندە ارىز جازىپ, قىزمەتىن تاستاپ كەتكەن بولاتىن. ءتورت جىلعا سايلانعان مويىلدىنىڭ اكىمى ءسويتىپ بار-جوعى 5-اق اي جۇمىس ىستەدى. ال اكىمسىز قالعان اۋىل قايتا سايلاۋ وتكىزۋگە ءماجبۇر بولعان ەدى. باياناۋىل اۋدانىنداعى قاراتومار اۋىلىنىڭ اكىمى راحات قاسەنوۆ بىلتىر قىركۇيەك ايىندا جول اپاتىنا ۇشىرادى. دەنساۋلىعىنا بايلانىستى ەمدەلۋدە. ۋسپەن اۋدانىنا قاراستى قوزىكەتكەن اۋىلىنىڭ اكىمى تيمۋر جانعازينوۆ تا جول-كولىك اپاتىنا ءتۇسىپتى. قوس اكىمىنىڭ دەنساۋلىقتارى وڭالا قويماسا, وندا قايتا سايلاۋ بولۋى مۇمكىن. وسى اۋدانداعى كوۆالەۆكا اۋىلىنىڭ اكىمى ەلەنا نەزناموۆا دا جۋىردا عانا وتىنىشىمەن قىزمەتىنەن كەتكەن ەكەن, قازىر ونىڭ ورنىندا يرينا بولوتنيكوۆا اكىمنىڭ مىندەتىن اتقارۋدا. ماي اۋدانىنداعى اقشيمان اۋىلىنىڭ اكىمى روزا سەرعازينا اي-كۇنى جاقىن قالعاندا ءوتىنىشىن جا­­زىپ كەتكەن سوڭ, ءسابيلى دە بولىپ ءۇل­گەرىپتى. ورنىندا قازىر اكىمنىڭ ءمىن­دەتىن اتقارۋشى باۋىرجان وتەپ­بەرگە­نوۆ ءجۇر. فاريدا بىقاي, «ەگەمەن قازاقستان». پاۆلودار وبلىسى.