«بالا بارىسى» ايعا سوزىلعان قالا كۇنى مەرەكەسى اياسىنداعى «جاستار كارناۆالى», «سىردىڭ قىرىق قازانى» جوباسى, «كىتاپ FEST» كىتاپ فەستيۆالى, «نەگە ماعان جىرلاماسقا, سىردا تۋعان ەلىمدى» اتتى پوەزيا كەشى, «جاستىق شاعىمنىڭ كۋاسى – قىزىلوردا» رەترو اندەر فەستيۆالى سەكىلدى ءتۇرلى مادەني كوپشىلىك شارا لەگىن تۇيىندەگەن جارىس بولدى. بالالار اراسىندا ۇلتتىق سپورتتى ناسيحاتتاۋ باعىتىنداعى باستاماعا «اباي-داۋلەت», «ەر-ارۋ», «شاعان قۇرىلىس زاتتارى» كومپانيالارى قولداۋ تانىتتى.
بالالار بەلدەسۋى وتكەن «ەۆرازيا» سپورت كەشەنى جانكۇيەرگە تولى بولدى. جالپى, بۇل ايماق وسى ۋاقىتقا دەيىن سپورتتىڭ قاي تۇرىنەن دە جاقسى ناتيجە كورسەتىپ كەلە جاتىر.
وتكەن عاسىردىڭ سەكسەنىنشى جىلدارى سىر ۆەلوسپورتشىلارىنىڭ اتاعى الىسقا كەتكەنى بەلگىلى. توقسانىنشى جىلدارى گاندبولشى قىزدارىمىز تالاي جارىستان جۇلدەمەن ورالىپ ءجۇردى. قاتارىنان بىرنەشە چەمپيون شىعارعان ايماق اۋىر اتلەتيكاسى تۋرالى دا ايتارىمىز ءبىر بولەك. قازىر كوگالداعى حوككەيدەن سىر سپورتشىلارى ەل نامىسىن قورعاپ ءجۇر.
ۇلتتىق سپورت تۇرلەرىنەن دە ايماق سپورتشىلارىنىڭ مەرەيى ۇستەم شىعادى. اسىرەسە, توعىزقۇمالاقتان توپ باسىندا كەلەدى.
«قازاقستان بارىسى» سايىسى العاش ۇيىمداستىرىلعان 2011 جىلى قىزىلوردالىق ۇلان رىسقۇلوۆ توپ جاردى. ۇلاننىڭ جەڭىستى جولىن جالعاعان ەلامان ەرعاليەۆ, نۇرىم سالىمگەرەەۆ, ماقسات يساعابىلوۆتار بۇگىندە ۇلكەن ارەنالاردا ەل نامىسىن ابىرويمەن قورعاپ ءجۇر.
وسىنداي اعالارىنىڭ جولىن جالعاماققا تالپىنعان «بالا بارىسى» تۋرنيرىنە قاتىسۋشىلارعا قىزىلوردا قالاسىنىڭ اكىمى اسىلبەك شامەنوۆ ساتتىلىك تىلەدى.
– وسىنداي ورەندەر باردا قازاق كۇرەسىنىڭ كەلەشەگى كەمەل, بولاشاعى جارقىن بولارىنا سەنەمىن. الداعى ۋاقىتتا «بالا بارىسى» ءتۋرنيرىنىڭ ءداستۇرلى سيپات الۋىنا جۇيەلى جۇمىستار جاسالىپ, بۇل بايراقتى باسەكەدە تانىلعان جاس تۇلەكتەر كوپتەگەن ءدۇبىرلى دودادا الاشقا ولجا سالادى دەپ ويلايمىن, – دەدى قالا اكىمى.
جاس بالۋاندار بوزكىلەمگە سپورت كەشەنىنىڭ ىشىنە ءبىر-بىرىنە قاراما-قارسى تىگىلگەن قوس كيىز ۇيدەن شىعىپ, ءوز قارسىلاستارىن جەرەبە ارقىلى انىقتادى. سپورتشىلاردىڭ ءاربىر قيمىلى جوعارى تەحنولوگيالى VAR جۇيەسى ارقىلى باقىلانىپ, يۋتۋب ارناسىندا تىكەلەي ەفير جۇرگىزىلدى.
تارتىستى باسەكەنى تالانتتى اقىن اقجول تۇمەنباي جۇرگىزىپ, رۋحتى سوزدەرىمەن بالۋاندارعا دەم بەرىپ وتىردى. ءار بەلدەسۋى تارتىستى وتكەن ءتۋرنيردىڭ اقتىق سىنىندا كەشەن ءىشىن جانكۇيەرلەردىڭ قيقۋى كەرنەپ تۇردى.
تۋرنير ناتيجەسىندە قارماقشىلىق باقىتجان ارقار «كورەرمەن كوزايىمى» اتانسا, 50 مىڭ تەڭگە جانە «قولا بەلبەۋ» قىزىلوردا قالاسىنىڭ بالۋانى يسلامبەك بايمولداەۆقا بۇيىردى. جارتىلاي جەڭىس ۇپايىمەن الدا تۇرىپ, سوڭعى ساتتە عانا قارسىلاسىنا ەسە جىبەرگەن جاڭاقورعاندىق دىنمۇحامەد ەرجانوۆ 100 مىڭ تەڭگە مەن «كۇمىس بەلبەۋدى» قاناعات تۇتسا, 150 مىڭ تەڭگە جانە «التىن بەلبەۋدى» قارماقشىلىق ءاليحان الياسقاروۆ جەڭىپ الىپ, ارنايى جاسالعان اۋىسپالى «تايتۇياقتى» يەلەندى.
قالا اكىمدىگىنىڭ ۇيىمداستىرۋىمەن بۇل باسەكە جىل سايىن وتكىزىلەتىن ءداستۇرلى دوداعا اينالماق.
قىزىلوردا
