ەلىمىزدە قاتىستى قۇلاق ەستىپ, كوز كورمەگەن كونە قۇجاتتار تابىلدى

استانا. 22 مامىر. تاريحشىلارىمىز اتا-بابالارىمىزدىڭ ەجەلدەن ديپلوماتيالىق قارىم-قاتىناستى جوعارى دەڭگەيدە دامىتقانىن دالەلدەيتىن تىڭ دەرەكتەر تاپتى. اتالعان قۇجاتتار ءۇندىستان, يران مۇراعاتتارىندا ساقتالىپ كەلگەن. بۇل تۋرالى «الماتى» تەلەارناسى حابارلادى. قازاق حاندىعى تاريحىنا بايلانىستى تىنباي ەڭبەك ەتىپ جۇرگەن عالىم, الماتىداعى شىعىستانۋ ينستيتۋتىنىڭ عىلىمي قىزمەتكەرى عاليا قامباربەكوۆانىڭ ايتۋىنشا, قازاق حاندارى مەن شىعىس بيلەۋشىلەرىنىڭ اراسىندا پارسى تىلىندە حات الماسۋلار بولعان. ونى ءۇندىستان مەن يران مۇراعاتتارىنان تابىلعان سيرەك قولجازبالار راستايدى.  ناقتىسىن ايتقاندا, تاۋكە حان, قاسىمحان حان, ءجالاڭتوس ءباحادۇر جايلى بۇرىن-سوڭدى عىلىمي اينالىمعا تۇسپەگەن, ايتىلماعان دەرەك-قۇجاتتاردىڭ كوشىرمەلەرى قازاق جەرىندە ديپلوماتيالىق بايلانىستاردىڭ جوعارى دەڭگەيدە دامىعانىن دالەلدەيدى. عاليا قامباربەكوۆا: «مونشا اتتىڭ ىشىنەن تاۆاكۋل حان دەگەندى كەزدەستىرىپ قالدىم. تاريحتىڭ ءتۇب تامىرىنا ءۇڭىلۋ ءۇشىن جان-جاقتى زەرتتەي باستادىم. ناتيجەسىندە تاۆاكۋل حان قازاق دەگەندى بىلدىرەتىنىنە كوزىم جەتتى», – دەدى.  . سوناۋ ءۇندىستان, يران مۇراعاتتارىنان وزىمىزگە قاتىستى تاريحي تىڭ قۇجاتتاردىڭ تابىلۋى تاريحشىلارىمىزدى ءبىر سەرپىلتىپ تاستادى. ولار بۇل ءىستى ۇلكەن زەرتتەۋ جۇمىستارىنىڭ العاشقى قادامى دەپ وتىر. وسىعان بايلانىستى تاريح عىلىمدارىنىڭ كانديتاتى ايتجان نۇرمانوۆا: «بۇل حاتتار حالىق جانە تاريح ءۇشىن ماڭىزدى. ويتكەنى, ءبىز ءۇشىن پارسى ءتىلدى قولجازبالار وتە قۇندى. سەبەبى, ءبىزدىڭ تاريحتا اشىلماي جاتقان اقتاڭداقتار وتە كوپ», – دەدى. ەندى ماماندار ءالى تولىعىمەن زەرتتەلىپ بىتپەي جاتقان كونە جازۋلاردى ارنايى ماماننىڭ كومەگىنە جۇگىنە وتىرىپ اۋدارۋدى كوزدەپ وتىر. جولدىباي بازار. دەرەككوز: «الماتى» تەلەارناسى. فوتو: «الماتى» تەلەارناسى.