قاۋىمداستىق پرەزيدەنتتىك باعدارلاما تۇلەكتەرىنىڭ مۇددەلەرىن بىلدىرە وتىرىپ, ەلىمىزدىڭ تابىستى قوعامدىق ۇيىمدارىنىڭ ءبىرى بولىپ سانالادى. وسى باعدارلاما بويىنشا بۇگىنگە دەيىن 12 مىڭنان استام ستيپەنديات ءبىلىم الدى.
2001 جىلدان باستاپ قاۋىمداستىقتىڭ مۇشەلەرى ءبىلىم بەرۋ, بىلىمدەردى تاسىمالداۋ, ساراپتامالىق الەۋەتتى قالىپتاستىرۋ, ۇلتتىق مادەنيەت پەن مەملەكەتتىك ءتىلدى دامىتۋ سالالارىندا 150-دەن استام ءىرى الەۋمەتتىك جوبانى جۇزەگە اسىردى.
قاۋىمداستىق – بۇل تۇراقتى دامۋ ساياساتىن جۇزەگە اسىرۋعا, قىزمەتكەرلەردىڭ ساباقتاستىعىن قامتاماسىز ەتۋگە, جاڭاشىلدىق جولىمەن وتكەننىڭ داستۇرلەرىن ساقتاپ قالۋعا بىرىككەن مۇددەلەس ازاماتتار قوعامى. «بولاشاقتىڭ» باستى ماقساتتارىنىڭ ءبىرى – وتانىمىزدىڭ ەكونوميكالىق, الەۋمەتتىك جانە ساياسي دامۋىنا ۇلەس قوسۋ. ەلىمىز, ونىڭ ىشىندە جاستار بۇگىندە ەلىمىزگە جاھاندىق ۇدەرىستەرگە قاتىسۋ ءۇشىن ىشكى تۇراقتىلىق قاجەت ەكەنىن تۇسىنەدى.
«قازاقستاننىڭ ىشكى ساياساتىن تالداي وتىرىپ جانە ەلدى دامىتۋ ءۇشىن بەرىلگەن ستراتەگيالىق باعىتتى نازارعا الا كەلە قاسىم-جومارت توقاەۆتىڭ كوپۆەكتورلى ساياساتى ەل ەكونوميكاسىنىڭ جان-جاقتى دامۋىن, رەسپۋبليكامىزدىڭ حالىقارالىق مارتەبەسىن نىعايتۋدى قولدايدى دەپ سانايمىز.
قازاقستانداعى ساياسي جاعداي تۇراقتىلىقتىڭ, كونفەسسياارالىق كەلىسىمىنىڭ, ەلدىڭ بارلىق ازاماتىنىڭ مۇددەسى ءۇشىن دەموكراتيا مەن مەملەكەتتىك ينستيتۋتتاردىڭ دامۋىنىڭ بىرەگەي ۇلگىسىن بۇكىل جاھانعا كورسەتەدى. قازاقستاننىڭ تۇراقتى ساياسي دامۋى الەمدىك قوعامداستىق ءۇشىن تەڭگەرىمدى باستامالاردىڭ كوزى رەتىندە ەلدىڭ دامۋىندا ماڭىزدى ءرول اتقارا الادى جانە اتقارۋعا ءتيىس», دەيدى بولاشاقتىقتار.
«بۇگىندە ءبىز ىشكى جانە سىرتقى ساياساتىمىزدىڭ ساباقتاستىعىن, تۇراقتىلىعىن راستاۋىمىز كەرەك. ەلىمىزدە الەۋمەتتىك جانە ساياسي ۇيلەسىمدىلىكتى قولداۋ ماقساتىندا مەملەكەتتىك ستراتەگيالارىن جانە الەۋمەتتىك باعدارلامالارىن تابىستى ىسكە اسىرۋدى جالعاستىرۋ قاجەت. سايلاۋ ءبىزدىڭ ەلىمىزدىڭ دامۋىنا, گەوساياسي جانە ەكونوميكالىق تۇراقسىزدىقتىڭ جاعىمسىز اسەرىن بولدىرماۋعا, حالىقتىڭ بىرلىگىن نىعايتۋعا مۇمكىندىك بەرەدى دەپ سەنەمىز. ولاي بولسا, سايلاۋدى اعىمداعى جىلدا وتكىزۋ تاۋەلسىز قازاقستاننىڭ گۇلدەنۋى ءۇشىن الدىمىزعا قويىپ وتىرعان مەملەكەتتىك باعىتتىڭ شەشۋشى جالعاسى بولىپ تابىلادى. ءبىزدىڭ تاڭداۋىمىز وتانسۇيگىشتىكتىڭ, مەملەكەتتىڭ جانە قوعامنىڭ بولاشاعى ءۇشىن جوعارى ازاماتتىقتىڭ جانە جاۋاپكەرشىلىكتىڭ ۇلگىسى بولۋعا ءتيىس», دەيدى قاۋىمداستىقتىڭ كەڭەس توراعاسى الماس قۇدايبەرگەن.
