«شالعاي اۋىلداردىڭ تۇرعىندارى ءۇشىن مەديتسينالىق قىزمەتتەردىڭ قولجەتىمدىلىگىن قامتاماسىز ەتۋ ماقساتىندا كولىك مەديتسيناسى دامىعان. كومەك جانە كونسۋلتاتسيالىق-دياگنوستيكالىق قىزمەت كورسەتەتىن 149 جىلجىمالى مەديتسينالىق كەشەن جۇمىس ىستەيدى», دەدى اجار عينيات.
ەلىمىزدىڭ 10 وڭىرىندە, اتاپ ايتقاندا اتىراۋ, اقتوبە, الماتى, اباي, جەتىسۋ, باتىس قازاقستان, شىعىس قازاقستان, قىزىلوردا, پاۆلودار, ماڭعىستاۋ وبلىستارىنداعى 64 مىڭ تۇرعىنعا مەديتسينالىق كومەك كورسەتكەن «جاردەم» جانە «سالاماتتى قازاقستان» مەديتسينالىق پويىزدارىنىڭ جۇمىسى قايتا جانداندى. مەديتسينالىق اۆياتسيانى اۋىل تۇرعىندارىن تاسىمالدايتىن جانە شۇعىل كومەك كورسەتەتىن 33 اۋە كەمەسى, ونىڭ ىشىندە 20 ۇشاق پەن 13 تىكۇشاق جۇزەگە اسىرادى.
ءمينيستردىڭ ايتۋىنشا, جەدەل مەديتسينالىق كومەك كورسەتۋ ءۇشىن اۋىلداردا 595 بريگادا جۇمىس ىستەيدى. ولار وسىعان دەيىن 1,5 ملن شاقىرىلىمعا شىعىپ, قىزمەت كورسەتكەن.
