EcoStudentKZ: جاستار جۇدىرىقتاي جۇمىلدى

شىمكەنت قالاسىنان باستاۋ العان چەللەندج ەستافەتاسى بۇگىندە ەلىمىزدىڭ ءار قيىرىندا جالعاسىن تاۋىپ جاتىر. تارازدا ۇيىمداستىرىلعان تازالىق اكتسياسىنا جينالعان ستۋدەنتتەر مەن ەرىكتى جاستار توتىداي تارانعان تارازدىڭ تازالىعى ءۇشىن جەرگىلىكتى اتقارۋشى بي­لىك قانا ەمەس، تۇتاس قالا حالقى جاۋاپتى دەپ ەسەپتەيدى.

«ەكى مىڭ جىلدان استام تاريحى بار تاراز قالاسى – ءبىزدىڭ ماقتانىشىمىز. وركەنيەت كوشىنە ىلەسكەن شاھاردىڭ بۇگىنگى كەلبەتىنە كوز تويادى. ەلىمىزدەگى ەڭ كورىكتى جاسىل قالانىڭ مۇنتازداي تازا بولۋى ءۇشىن اكىمدىك قىزمەتكەرلەرى  نەمەسە جاۋاپتى مەكەمە وكىلدەرى عانا ەمەس، بارشامىز جاۋاپتى بولۋعا ءتيىسپىز. ويت­كەنى تاراز – ءبىزدىڭ سۇيىكتى قالامىز»، دەيدى چەللەندجگە قاتىسقان ستۋدەنتتەر جۇز­دەرى بال-بۇل جانىپ.

تاراز شاھارى بۇگىنگى تاڭدا بۇرىن­عىداي لاستانبايدى. بىرىنشىدەن، ادام­داردىڭ ساناسى وزگەرسە، ەكىنشىدەن، تازا­لىققا جاۋاپتى مەكەمەلەردىڭ جۇ­مىسى جولعا قويىلعان.

«بۇگىنگى تاڭدا وبلىستا بارلىعى 163 پوليگون جانە قوقىس توگۋگە ار­نال­عان ۇيىندىلەر جۇمىس ىستەپ تۇر. ونىڭ 5-ءى جەكە مەنشىكتە بولسا، 158-ءى كوم­مۋنالدىق مەنشىكتە. پولي­گون­دار­دىڭ بارلىعى قورشاعان ورتاعا ارنالعان ەميسسياعا رۇقساتى راسىم­دەلگەن، سانيتاريالىق تالاپتارعا ساي. قالدىقتاردى جيناۋ، تاسىمالداۋ جانە سۇرىپتاۋ قىزمەتتەرىمەن اينالىساتىن 43 مەكەمەنىڭ جۇمىسى ۇيلەستىرىلگەن. ولار 191 ارنايى تەحنيكامەن قامتىلعان. اۋدان ورتالىقتارىندا ورنالاسقان پوليگونداردا قالدىقتار نەگىزىنەن 5 كوم­پونەنتكە سۇرىپتالادى. جينالعان قاتتى تۇرمىستىق قالدىقتار تەكسەرۋدەن وتكىزىلىپ، شيكىزات الۋ ءۇشىن قايتا وڭدەۋگە جىبەرىلەدى»، دەيدى وب­لىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى مۇراتحان شۇكەەۆ.

جالپى، وڭىردە جىل سايىن ەكى مارتە تازالىق ايلىعى جۇرگىزىلەدى. ەكى ايعا سوزىلاتىن اتالعان ءىس-شاراعا وبلىستاعى بارلىق جاستار مەن مەكەمە باسشىلارى، قىزمەتكەرلەر ەرىكتى تۇردە ءۇن قوسادى. سودان دا بولسا كەرەك، تاراز قالاسىنىڭ ىشكى كورىنىسى قوقىس اتاۋلىدان كادىمگىدەي تازارىپ قالعان دەۋگە بولادى.

EcoStudentKZ چەللەندجى اياسىندا م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ اينالاسىن، ورتالىق كوشەنى قوقىستان تازارتۋعا قاتىسقان ستۋ­دەنتتەردىڭ قاتارى قالىڭ بولعانى قۋانت­تى. ءتىپتى بۇل ىسكە ءوز ەركىمەن قو­سىل­عان جاستاردى كورگەندە ءدان ريزا بولىستىق.

«ەكولوگيالىق سانانى قالىپتاستىرۋ ماقساتىندا شىمكەنت قالاسىنان باس­تاۋ العان چەللەندجگە ستۋدەنتتەر ءوز ەركىمەن قاتىسىپ، قولداۋ ءبىلدىرىپ وتىر. سول ءۇشىن دە ولارعا دەگەن العىسىمىز شەكسىز. جالپى، تاراز قالاسىنىڭ تازا بولۋى ءۇشىن ءاربىر ازامات جاۋاپ­تى ەكەنىن قاپەردە ۇستاعان ءجون. جاستار بۇگىن وقۋ ورداسىنىڭ اينالاسىن عانا ەمەس، كو­شەنىڭ دە اۋلالارىن تازالاپ، ساۋاپتى ىسكە ءۇن قوسىپ وتىر. الداعى ۋاقىتتا دا مۇنداي ەكولوگيالىق اك­تسيا­لاردىڭ وتۋىنە مۇرىندىق بولىپ، سەنبىلىكتەر ۇيىمداستىرامىز. ابات­تان­دىرۋ جۇمىستارىن دا قولعا الساق دەگەن نيەتىمىز بار»، دەيدى م.ح.دۋ­لاتي اتىنداعى تاراز وڭىرلىك ۋنيۆەر­سيتەتى تاربيە جۇمىسى ءبولىمىنىڭ قىزمەت­كەرى ءاليحان نارەگەەۆ ءوز ويىمەن ءبولىسىپ.

ورتالىق كوشەدەگى بىرقاتار اۋلانى، جوعارى وقۋ ورنىنىڭ اينالاسىن تۇتاستاي قوقىستان تازارتقان تارازدىق ستۋ­دەنتتەر چەللەندجدى ءارى قاراي پەترو­پاۆل جانە وسكەمەن قالالارىنىڭ جاستارىنا جولدادى.

تاراز