اممان قالاسىنىڭ مەرىمەن اڭگىمە

قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ اممان قالاسىنىڭ مەرى اكەل بەلتاد­جي­مەن كەزدەستى, دەپ حابارلادى وسى پالاتانىڭ ءباسپاسوز قىزمەتى. يوردانيا استاناسىنىڭ مەرى, بۇرىنعى سەناتور استاناعا كورول حۋسەين بەن تالال اتىنداعى كوشەنىڭ اشىلۋ سالتاناتىنا قاتىسۋ ءۇشىن كورول ابداللا ءىى-ءنىڭ ارناۋلى ۋاكىلى رەتىندە كەلگەن بولاتىن. «مەن 1990 جىلداردىڭ سوڭىندا كورول حۋسەينمەن جۇزدەسۋ مارتەبەسىنە يە بولدىم, ءارى ونىڭ تاماشا سوزدەرىن, اتاپ ايتقاندا, يزرايل پرەمەر-ءمينيسترى يتسكاح رابينمەن قوشتاسۋ راسىمىندەگى تولعاقتى ويلارىن ەستىدىم. كوپتەگەن جىلدار بويى يوردانيا تاياۋ شىعىستاعى جاعدايدى رەتتەۋدە ەرەكشە رولگە يە بولىپ كەلەدى, ءوز ەلىنىڭ اۋماعىنا كورشى ەلدەردەن ءجۇز مىڭداعان بوسقىنداردى قابىلدادى», دەپ اتاپ ءوتتى ق.توقاەۆ. سەنات توراعاسىنىڭ پىكىرىنشە, پرەزيدەنت نۇرسۇلتان نازارباەۆتىڭ امماندا جانە كورول حۋسەيننىڭ قۇرمەتىنە استانادا كوشەلەردىڭ اشىلۋى ءوزارا تۇسىنىستىك پەن ارىپتەستىك رۋحىندا دامىپ كەلە جاتقان ەكى ەلدىڭ دوستىق قاتىناستارىنىڭ نىعايا ءتۇسۋىنىڭ كورىنىسى بولىپ تابىلادى. ول باۋىرلاس ەكى قالانىڭ اراسىندا ورناعان بايلانىستاردىڭ ەكى حالىقتىڭ يگىلىگى جولىندا ودان ءارى دامي بەرەتىنىنە سەنىم ءبىلدىردى. جۇزدەسۋشىلەر قازاقستان مەن يوردانيانىڭ پارلامەنتارالىق بايلانىستارىن دامىتۋ ماسەلەلەرىن تالقىلادى. يوردانيا سەناتىنىڭ توراعاسى ابد ار-راۋف ار-راۋابدەنىڭ وسى جىلعى ماۋسىمعا جوسپارلانعان استاناعا ساپارى ەكىجاقتى ىنتىماقتاستىققا سەرپىن بەرۋى ءتيىس ەكەنى ايتىلدى.