زەينەت جاسىنا جاقىنداپ قالسا دا, شاحنوزا اسيلينا ەكى وكپەسىن قولىنا الىپ, مەكتەپتە زىر جۇگىرىپ جۇرەدى. ونىڭ جارقىن شىققان داۋىسى دالىزدە كەتىپ بارا جاتقان ادامدى سەلت ەتكىزبەي قويمايدى. بار ىنتا-شىنتاسىمەن بەرىلىپ, وقۋشىلارىنىڭ ساناسىنا ءبىلىم نۇرىن قۇيىپ جاتقان ۇستازدىڭ ماماندىعىنا دەگەن ادالدىعىنا رازى بولماۋ مۇمكىن ەمەس.
«راسىندا, «باسقالاردى ۇيرەتە وتىرىپ, ءوزىمىز دە ۇيرەنەمىز» دەگەن ءسوزدى سەنەكا تەككە ايتپاعانى داۋسىز. ءاربىر وقۋشىمەن جەكە جۇمىس ىستەگەن ۇستازدىڭ ءىسى العا باسادى. ويتكەنى ءار بالا – جەكە ءبىر الەم, بولەك پسيحولوگيا. وقۋشىنىڭ ىشكى الەمىنە ۇڭىلسەڭ عانا بولمىسىمەن تانىسا تۇسەسىڭ. ناشار ۇستاز بولۋى مۇمكىن, بىراق جامان وقۋشى بولمايدى. ونىڭ وقۋعا دەگەن زەيىنىن, بىلىمگە دەگەن قۇشتارلىعىن اشۋ جولىندا ۇستازدار جاڭا ادىستەمەلىك تاسىلدەردى ساتىمەن پايدالانعانى ءجون. مۇعالىم جاڭاشىلدىققا ۇمتىلماسا, وقۋ پروتسەسى كەزىندە ءبىلىم الۋشىلاردىڭ قىزىعۋشىلىعىن وياتا الماسا, ءبارى بەكەر», دەيدى ول.
بۇگىندە الپىستىڭ اسقارىنا شىققان ۇستاز كەزىندە رەسەيدىڭ تامبوۆ مەملەكەتتىك ينستيتۋتىندا ورىس ءتىلى ءپانىنىڭ مۇعالىمى ماماندىعى بويىنشا ءبىلىم العان. 1985 جىلى جوعارى وقۋ ورنىن اياقتاعان ول ءوزى تۇلەپ ۇشقان اقىرتوبە اۋىلىنا كەلىپ, اۋىل بالالارىنا ساباق بەرەدى. 1987-1990 جىلدارى اۋداندىق كومسومول كوميتەتىنىڭ ءىىى حاتشىسى, 2003-2013 جىلدار ارالىعىندا قۇلان اۋىلىنداعى شوقان ءۋاليحانوۆ اتىنداعى ورتا مەكتەپتە ديرەكتوردىڭ وقۋ ءىسى جونىندەگى ورىنباسارى قىزمەتىن ابىرويمەن اتقاردى. قازىرگى تاڭدا اتالعان مەكتەپتە ورىس ءتىلى مەن ادەبيەتى ءپانىنىڭ مۇعالىمى رەتىندە ەڭبەك جولىن جالعاستىرىپ ءجۇر.
ءبىلىم سالاسىندا 35 جىلدان استام ۋاقىت بويى ۇزدىكسىز ەڭبەك ەتىپ كەلە جاتقان ۇستازدىڭ ماقساتى دا ايقىن. ول جۇمىسىنا شىعارماشىلىق ىزدەنىسپەن قاراعاندى ماقۇل كورەدى. سول ارقىلى بالالاردىڭ اراسىندا دا شىعارماشىلىق ورتا قالىپتاستىرۋعا كۇش سالىپ كەلەدى. كوپتەگەن ينتەللەكتۋالدىق جوباعا قاتىسىپ, ۇزدىكتەردىڭ قاتارىنان كورىنگەن ۇلاعاتتى ۇستاز قاراپايىم قالپىنان تانعان ەمەس. الايدا قاراپايىمدىلىق قارابايىرلىق ەمەس. ويتكەنى ىزدەنگەن ادام مۇراتىنا جەتەتىنىن, جالقاۋدىڭ كەرى كەتەتىنىن جاقسى بىلەدى.
مەيىرىمدى مۇعالىمنىڭ ء«بىلىم ساپاسىن ارتتىرۋ: جاڭا يدەيالار, جاڭا تاسىلدەر» تاقىرىبىندا وتكەن كونفەرەنتسياعا ازىرلەگەن ەڭبەگى عىلىمي جيناققا ەنسە, بىرەر جىل بۇرىن تاعى ءبىر جازباسى حالىقارالىق «مير ۋچيتەليا» پورتالىندا جاريالانىپ, ماماندار تاراپىنان قىزۋ تالقىعا ءتۇستى. مۇعالىمنىڭ ەڭبەگى ەلەنىپ, ۇزدىك ۇستاز رەتىندە ارنايى ماراپاتتارعا دا يە بولدى.
ايتا بەرسەك, شاحنوزا اسيلينانىڭ قول جەتكىزگەن جەتىستىكتەرى از ەمەس. ۇزدىك ۇستازدار اراسىنداعى ءىرى بايقاۋلاردا سان مارتە توپ جاردى. قازاق جانە ورىس تىلدەرىندە جارىق كورەتىن رەسپۋبليكالىق, حالىقارالىق جانە سالالىق باسىلىمداردا كوپتەگەن عىلىمي ەڭبەگى جاريالانىپ, كەي جاعدايدا جازبالارى ءۇشىن ءتۇرلى دارەجەدە ماراپاتتالدى.
وتىز جىلدان استام ەڭبەگىنىڭ ەلەنگەنى شىعار, بىرەر جىل بۇرىن بۇرىنعى ءبىلىم جانە عىلىم مينيسترلىگى ءبىلىم جانە عىلىم سالاسىنداعى جەتكەن تابىسى ءۇشىن ۇلاعاتتى ۇستازدى ىبىراي التىنسارين اتىنداعى توسبەلگىمەن ماراپاتتادى.
«وقۋشىلارىمنىڭ ءبارىن ماقتان تۇتامىن. ولاردىڭ ءبىرى وزدى, ءبىرى كوشتەن قالىپ جاتىر دەۋگە بولمايدى. ويتكەنى ادام بالاسى كەز كەلگەن ساتتە ءوزىن باسقا قىرىنان كورسەتۋى ىقتيمال. جالپى, مۇعالىم بىتكەن ۇستازعا ۇستانىم, بالاعا مەيىرىم كەرەك ەكەنىن قاپەردەن شىعارماسا دەيمىن. ۇيىندە اتا-اناسىنىڭ, مەكتەپتە ۇستازدارىنىڭ مەيىرىم-قايىرىمىنا قانىعىپ وسكەن وقۋشىدان جامان ازامات شىعۋى مۇلدە مۇمكىن ەمەس», دەيدى شاحنوزا اسيلينا.
جامبىل وبلىسى,
تۇرار رىسقۇلوۆ اۋدانى
