ەلەكتورالدىق وقىتۋ ورتالىعىنىڭ بازاسىندا رەسپۋبليكالىق جانە وڭىرلىك بۇقارالىق اقپارات قۇرالدارىنىڭ 60-تان استام وكىلى «قازاقستان رەسپۋبليكاسىنداعى سايلاۋ پروتسەسى: تەوريا جانە پراكتيكا» تاقىرىبىنداعى وقىتۋ كۋرسىنا قاتىستى. ورتسايلاۋكوم تاراپىنان سپيكەرلەر رەتىندە وسك توراعاسىنىڭ ورىنباسارى كونستانتين پەتروۆ, ورتسايلاۋكوم مۇشەلەرى ءسابيلا مۇستافينا, اناستاسيا ششەگورتسوۆا, اسىلبەك سماعۇلوۆ, سونداي-اق اپپارات قىزمەتكەرلەرى تاڭدالىپ, سايلاۋعا قاتىستى تاجىريبەلەرىمەن ءبولىستى.
وقىتۋ كۋرسى باق وكىلدەرىنە پرەزيدەنت سايلاۋىن وتكىزۋدىڭ ەرەكشەلىكتەرىن, اعىمداعى ەلەكتورالدى ناۋقاننىڭ نەگىزگى كەزەڭدەرىن, باق-تىڭ پرەزيدەنتتىككە كانديداتتاردىڭ سايلاۋ الدىنداعى ۇگىت پەن سايلاۋدى اقپاراتتىق قامتاماسىز ەتۋدەگى ءرولىن, ەلەكتورالدىق ناۋقان كەزەڭىندەگى فاكتچەكينگتىڭ ءرولىن, سايلاۋ پروتسەسىندەگى جۋرناليستەردىڭ قۇقىقتارى مەن مىندەتتەرىن, سايلاۋدى اقپاراتتىق جاريا ەتۋدىڭ حالىقارالىق ستاندارتتارى مەن قاعيداتتارىن تۇسىندىرۋگە باعىتتالعان.
سەميناردا قاتىسۋشىلار سايلاۋ پروتسەسىنە قاتىسۋشىلاردى وقىتۋ, مۇگەدەكتىگى بار ادامداردىڭ سايلاۋ قۇقىقتارىن قامتاماسىز ەتۋ, پرەزيدەنت سايلاۋىن مەملەكەت تاراپىنان جانە مەملەكەتتىك ەمەس كوزدەردەن قارجىلاندىرۋ, سايلاۋ زاڭناماسىن بۇزعانى ءۇشىن قۇقىقتىق جاۋاپكەرشىلىك ماسەلەلەرىمەن جانە «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭعا ەنگىزىلەتىن جاڭاشىلدىقتارمەن تانىستى.
ەلەكتورالدىق وقىتۋ جونىندەگى جوسپارعا سايكەس, بۇل 2022 جىلعى 20 قاراشاعا تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى كەزەڭىندە جوسپارلانعان سايلاۋ پروتسەسىنە قاتىسۋشىلار ءۇشىن ورتالىق سايلاۋ كوميسسياسى ۇيىمداستىراتىن 10 سەميناردىڭ ءبىرى. بۇعان دەيىن 21-23 قىركۇيەكتە ەلىمىزدىڭ بارلىق وڭىرىنەن كەلگەن جاستار ۇيىمىنىڭ وكىلدەرى ءۇشىن سەمينار وتكىزىلگەن بولاتىن. وسك كەلەسى سەميناردى وسى جىلدىڭ 5-7 قازان ارالىعىندا قازاقستان رەسپۋبليكاسىندا تىركەلگەن ساياسي پارتيالاردىڭ وكىلدەرىنە ارناپ وتكىزۋدى جوسپارلاپ وتىر.
