جەرگىلىكتى حالىقتىڭ تالابى دا تۇسىنىكتى. ولار قوقىس پوليگونىن بىزدەن اۋلاقتاتسا دەگەندى العا تارتادى. دەرەكتەرگە سەنسەك, مۇندا جىلىنا 8 توننا قوقىس جينالادى ەكەن. ال جينالعان وندىرىستىك قالدىقتار ورتەنگەن كەزدە ماڭايداعى اۋىلعا ءيىسى جەلمەن جەدەل جەتەدى. ءوز كەزەگىندە جاعىمسىز اۋانى جۇتۋعا ءماجبۇر بولعان حالىق ءتۇتىن ءيىسى دەنساۋلىققا كەرى اسەر ەتەتىنىن جاسىرمايدى. ءبىر سوزبەن ايتقاندا, قوقىستىڭ قۇرساۋىندا قالعان قۋساقتىقتاردىڭ ماسەلەسى كۇننەن كۇنگە كۇردەلەنىپ بارادى.
ء«بىزدىڭ اۋىلمەن ەشكىمنىڭ شارۋاسى جوق. ءوز باسىم دەمىكپە اۋرۋىنا شالدىققانمىن. ءدارىنىڭ كومەگىمەن جۇرگەن اداممىن. قوقىستىڭ ءيىسى ءبىزدى ابدەن اۋرۋ قىلىپ ءبىتتى. «جاعدايلارىڭ قالاي؟» دەپ سۇرايتىن ەشقانداي قۇزىرلى ورگاندى كورگەن جوقپىز. ال كەشقۇرىم كانىگى «قۇدالارىمىز» سەكىلدى قاڭعىباس يتتەر قاپتاپ كەلەدى. ولار اۋلامىزعا كىرىپ كەتەدى. قىسقاسى, 40 ءۇيدىڭ تۇرعىنى سول يەسىز يتتەردى كۇتىپ الامىز. ال مىنا ءيىس دەگەن ابدەن تىنىسىمىزدى تارىلتىپ ءبىتتى», دەيدى اۋىل تۇرعىنى شىرىنكۇل ەردەنبەتوۆا جاعدايدى ءتۇسىندىرىپ.
وسىلايشا, بايزاق اۋدانىنا قاراستى شاعىن اۋىل تۇرعىندارى قوقىستان قالاي قۇتىلاتىنىن بىلمەي شاعىم ايتىپ وتىر. جەرگىلىكتى جۇرتشىلىق بالالارىنىڭ اللەرگيالىق اۋرۋلارعا شالدىعا باستاعانىن دا جاسىرمادى.
«قوقىس ماسەلەسىن ايتا-ايتا شارشادىق. بالالاردىڭ دەنەسىندە جارا پايدا بولا باستادى. جەل تۇرعان كۇنى قاراساڭ, دەمالۋ بىلاي تۇرسىن, ءبىر-ءبىرىمىزدى تابۋىمىز بەن تانۋىمىز مۇڭعا اينالىپ كەتەدى. بۇل ماسەلەنى قاشانعى كوتەرەتىنىمىزدى كىم ءبىلسىن؟! ناقتى قاي كەزدە دۇرىس شەشىلەتىنىن دە بىلمەي دال بولىپ وتىرمىز» دەيدى اشۋعا بۋلىققان اۋىل تۇرعىنى پەرنەگۇل تۇرلىباەۆا.
تاراز قالاسىنىڭ ىرگەسىندە ورنالاسقان بايزاق اۋدانىنداعى «قۋساق-2» ەلدى مەكەنىنىڭ تۇرعىندارى ازىرگە تۇتىنگە تۇنشىققانى تۇنشىققان سەكىلدى. ويتكەنى بۇل وتكىر ماسەلە جۋىق ارادا شەشىلە قوياتىنعا ۇقسامايدى.
ماسەلەنىڭ ءمان-جايىن تۇسىندىرمەك بولعان تۇرمىستىق قاتتى قالدىقتاردى قابىلداۋ ورنىنىڭ باسشىسى ابدىسەيىت مومباەۆ: ء«بىز ءورتتى شامامىز كەلگەنشە سوندىرەمىز. الايدا ءورت تولىق وشەدى دەپ ايتۋ قيىن. ويتكەنى ونىڭ تەرەڭدىگى بىرنەشە مەترگە دەيىن جەتەدى», دەيدى.
شاعىن اۋىلداعى 40 ءۇيدىڭ حالقى قالاي بولعان كۇندە دە قولقانى قاباتىن جاعىمسىز يىستەن قالاي بولسا دا قۇتىلعىسى كەلەدى. سول ءۇشىن دە «قۋساق-2» ەلدى مەكەنىن قوقىس زاردابىنان قۇتقارىڭىزدار», دەپ دابىل قاعىپ وتىر. بىراق جەرگىلىكتى بيلىك وكىلدەرى بۇل ماسەلە وڭىنان شەشىلۋى ءۇشىن ءبىراز ۋاقىت كەرەك ەكەنىن ايتادى. وسى ماسەلە بويىنشا اۋدان اكىمىنىڭ ورىنباسارىنا حابارلاسىپ, حالىقتىڭ قالاۋى قاشان ورىندالاتىنىن سۇراعان ەدىك.
«قوقىس ماسەلەسىمەن اينالىساتىن جەكەمەنشىك كومپانيا بۇل جەردى 25 جىلعا جالعا العان. سوندىقتان بۇل ماسەلە قازىرگى تاڭدا جان-جاقتى قاراستىرىلىپ جاتىر. الدا قىس كەلە جاتىر. ءورت ەندى باسىلدى. ولارعا ءدال قازىر جەر بەرگەن كۇننىڭ وزىندە قوقىسپەن بىرگە كوشىپ كەتە المايدى. الايدا جەر بەرۋ ماسەلەسى نازارىمىزدان تىس قالعان ەمەس. حالىقتىڭ تالابىن تۇسىنەمىز. الايدا قۋساقتىقتاردىڭ ماسەلەسى ناقتى مىنا كۇنى شەشىمىن تابادى دەپ قولمەن قويعانداي ايتا المايمىز. جەكەمەنشىك كومپانيا ايتارلىقتاي تابىس تاپپاعان سوڭ كەتۋگە دە بەل بۋعان ەدى. وزەكتى ماسەلەنى الداعى ۋاقىتتا تولىق شەشۋ جولىندا جۇمىس جۇرگىزىلەدى», دەيدى جاعدايدى تۇسىندىرگەن اۋدان اكىمىنىڭ ورىنباسارى تالعات جامالوۆ.
سوعان قاراعاندا «قۋساق-2» ەلدى مەكەنىنىڭ تۇرعىندارىنا ءالى ءبىراز ۋاقىت جاعىمسىز يىسكە توزۋىنە تۋرا كەلەتىن سەكىلدى. ارينە, قىستا ءورتتىڭ تۇتانا قويۋى ەكىتالاي. الايدا كەلەر جاز قۋساقتىقتار قوقىستان شىققان تۇتىنگە قايتا تۇنشىقسا, بۇل ماسەلە تىم كۇردەلەنە تۇسەرى تۇسىنىكتى.
جامبىل وبلىسى,
بايزاق اۋدانى
