ءبىرىنشى تەرىمنىڭ وزىندە ونىمدىلىك گەكتارىنا ورتا ەسەپپەن 18 تسەنتنەردى قۇراپ وتىر. سالا ماماندارىنىڭ ايتۋىنشا, بيىلعى ناۋقاندا ماقتالىقتىڭ 80 پايىزعا جۋىعىن تەحنيكامەن تەرۋ جوسپارلانىپ وتىر. جالپى, ءشيتتى ماقتانىڭ تۇسىمدىلىگى گەكتارىنان 27,3 تسەنتنەردەن بولىپ, 333,4 مىڭ توننا جينالادى دەپ بولجانۋدا. قولدا بار 595 بىرلىك كومبايننىڭ 92%-ى
جيىن-تەرىن جۇمىستارىنا دايىن. بۇل سالادا جالپى 25 مىڭنان استام اگروقۇرىلىم ەڭبەك ەتەدى. اق ۇلپانى تەحنيكامەن تەرۋدى باستاعانداردىڭ ءبىرى – جەتىساي اۋدانىنداعى ىنتىماق اۋىلدىق وكرۋگىندە ورنالاسقان «باقداۋلەت» شارۋا قوجالىعى. يەلىگىندەگى 20 گەكتار جەرگە قوسىمشا 30 گەكتار ەگىستىكتى جالعا العان قوجالىق توراعاسى سەرىكباي احىنوۆ «ماقتاارال 40-11» سۇرىپتى شيت سەۋىپ, گەكتارىنان 20 تسەنتنەردەن ءونىم الۋدا.
«قازىرگى تاڭدا ديقاندارىمىز ماقتاعا قاجەتتى اگروتەحنيكالىق شارالاردى اياقتاپ, جاپپاي ماقتا جيناۋ ناۋقانىن باستاپ كەتتى. اۋدان بويىنشا 29 673 مىڭ گەكتار ماقتالىق القاپقا دەفولياتسيا جۇمىستارى جۇرگىزىلگەن. ماقتا جيناۋ تەحنيكالارى, 7 ماقتا زاۋىتى مەن 81 ماقتا قابىلداۋ پۋنكتى بيىلعى ناۋقانعا تولىقتاي دايىن تۇر. كۇزگى جيىن-تەرىن ناۋقانىن جاۋىن-شاشىنعا قالدىرماي, ىسىراپسىز ءساتتى وتكىزۋ – بارشامىزدىڭ ورتاق مىندەتىمىز», دەيدى اۋداندىق اۋىل شارۋاشىلىعى جانە جەر قاتىناستارى ءبولىمىنىڭ باسشىسى مارات ابۋوۆ.
ودان بولەك, اۋدان بويىنشا كۇزگى دالا جۇمىستارىنا قاتىساتىن 1 897 اۋىلشارۋاشىلىق تەحنيكاسىنىڭ 224-ءى ماقتا تەرىمگە ارنالعان كومبايندار بولسا, ءبىر عانا ىنتىماق اۋىلدىق وكرۋگىندە 151 اۋىل شارۋاشىلىعى تەحنيكالارى مەن اگرەگاتتارى ناۋقانعا دايىن تۇر.
وبلىستىق اۋىل شارۋاشىلىعى باسقارماسىنىڭ مالىمەتىنشە, بيىل وبلىستا ماقتا داقىلى 126,3 مىڭ گەكتارعا ەگىلگەن. سونداي-اق ماقتا باعاسى بيىل 400 تەڭگە كولەمىندە بولاتىنى بولجانعان ەدى. ازىرگە باعا ودان تومەن بولىپ تۇر. ءشيتتى ماقتانىڭ وتكىزۋ باعاسى الەمدىك نارىقتاعى ماقتا تالشىعىنىڭ باعاسىنا تىكەلەي تاۋەلدى جانە ليۆەرپۋل ماقتا بيرجاسىنىڭ يندەكسىنە سايكەس بەلگىلەنەدى. بىلتىر ءشيتتى ماقتانىڭ تونناسى 320 مىڭ تەڭگەدەن قابىلداندى. بۇگىندە 1 تونناسى 374 مىڭ تەڭگە بولىپ وتىر. ماقتانى 18 وڭدەۋ زاۋىتىنىڭ 209 بەكەتى قابىلدايدى. زاۋىتتار تاراپىنان تاۋار وندىرۋشىلەرگە جيىن-تەرىن جۇمىستارى ءۇشىن 150– 250 مىڭ تەڭگەدەن الدىن الا تولەم جاسالۋدا. ال مەملەكەت تاراپىنان كۇزگى جيىن-تەرىن جۇمىستارى ءۇشىن 48 مىڭ توننا جانار-جاعارماي جانە 522 ءتۇرلى مينەرالدى تىڭايتقىش قۇنىنىڭ 50%-ىن سۋبسيديالاۋعا بيۋدجەتتەن 6 ملرد تەڭگە ءبولىندى. سونىمەن قاتار 653 ءتۇرلى وسىمدىك زيانكەستەرى مەن اۋرۋلارىنا قارسى قولدانىلاتىن پەستيتسيدتەر مەن بيوپرەپاراتتاردىڭ قۇنىن سۋبسيديالاۋعا 521,4 ملن تەڭگە قارجى قارالسا, اگروقۇرىلىمداردىڭ ساتىپ العان تۇقىمىنىڭ قۇنىن ارزانداتۋعا 600 ملن تەڭگە بولىنگەن.
نەگىزگى كۇنكورىسى مەن الەۋمەتتىك-ەكونوميكالىق دامۋى اگرارلى سەكتورعا تىكەلەي بايلانىستى اۋدانداردىڭ ديقاندارى ءۇشىن اۋا رايىنىڭ ءاربىر قولايلى ءساتىن ءتيىمدى پايدالانۋ اسا ماڭىزدى. سونداي-اق ديقاندار وندىرىلگەن بارلىق ماقتا شيكىزاتىن ەلىمىزدە تولىق تەرەڭ وڭدەۋگە مۇمكىندىك جاسالىپ, جەڭىل ونەركاسىپ دامىسا, حالىق تىعىز ورنالاسقان وڭىردە جاڭا جۇمىس ورىندارى كوپتەپ اشىلاتىنىن ايتۋدا. ەرتە كوكتەمنەن باستالاتىن ەڭبەك ەش كەتپەۋى ءۇشىن ءونىم باعاسى كوتەرىلەتىنىنەن ءۇمىتتى ديقاندار قىرماننىڭ بەرەكەلى بولۋىن دا تىلەپ وتىر.
تۇركىستان وبلىسى
