ارداگەرلەر اراسىنداعى الەم چەمپيونى

اۋىر اتلەتيكاعا ۇقساس وسى سپورت قازاق­ستاندا دا دامي باستادى. ەلىمىزدە قول كۇرەسى مەن گىر سپورتىنىڭ نەگىزىن قالاۋشى, 1992-2004 جىلدارى حالىقارالىق گىر سپورتى فەدەراتسياسىنىڭ ۆيتسە-پرەزيدەنتى, 2004-2012 جىلدار ارالىعىندا بۇكىلالەمدىك ارمرەستلينگ فەدەراتسياسىنىڭ ۆيتسە-پرەزيدەنتى قىزمەتىن اتقارىپ, قول كۇرەسىنەن دۇنيە ءجۇزىنىڭ ءۇش دۇركىن چەمپيونى اتانعان, الماتىدا, وسكەمەندە قول كۇرەسى مەن گىر سپورتىنان الەم, ازيا بىرىنشىلىكتەرىن ابىرويمەن وتكىزىپ, وسى سپورت تۇرلەرىنىڭ قازاقستاندا, ازيادا, الەمدە وركەندەۋىنە ەرەكشە ۇلەس قوسقان مۇحامەدوللا اعزاموۆ جاسى جەتپىستەن اسسا دا الپىس جاستاعى ارداگەرلەر اراسىندا 95 كيلو سالماقتا سترەندليفتينگتەن الەم چەمپيونى اتاندى. ايتا كەتۋ كەرەك, م.اعزاموۆ – سپورتتىڭ ءارتۇرلى, ءوزارا ۇقساس ەمەس ەكى تۇرىنەن الەم چەمپيونى اتانعان قازاقستانداعى جالعىز اتلەت.

قىركۇيەكتىڭ 5-ءى مەن 10-ى ارالىعىندا ىس­تىقكولدە جالاۋى جەلبىرەگەن الەم چەمپيوناتىندا قازاق ەلىنەن بارعان ءۇش سپورتشى دا نامىستى قولدان بەرمەي, التىننان القا تاقتى. اتاپ ايتقاندا, مۇحامەدوللا اعزاموۆتىڭ جەڭىستى جولىن مارات ماردەنوۆ پەن يۆان مالكوۆ 68 جانە 76 كيلو سالماقتاردا جالعاستىردى. م.اعزاموۆتىڭ ۇلى ءجۇرسىن اعزاموۆ ەرەسەكتەر اراسىندا 115 كيلو سالماقتا قولا مەدال يەلەندى. تالانتتى ۇستازدىڭ ۇلى وسى جولى تاعى ءبىر قۇرمەتكە يە بولدى. دۇنيەجۇزىلىك سترەندليفتينگ فەدەراتسياسىنىڭ پرەزيدەنتى بابۋل بيكاس پاترابانيستىڭ ۇسىنىسىمەن ءجۇرسىن اعزاموۆ وسى فەدەراتسيانىڭ ۆيتسە-پرەزيدەنتى بولىپ سايلاندى. دەمەك, بولاشاعى زور سپورت ءتۇرى قازاقستاندا دامي تۇسپەك.

– سترەندليفتينگ – بولاشاعى زور سپورت. ول ءۇندىستاندا دۇنيەگە كەلدى. قازىردىڭ وزىندە الەمنىڭ ەلۋدەن استام مەملەكەتىنىڭ ادام­دارى سترەندليفتينگپەن شۇعىلدانادى. اۋىر اتلەتيكامەن اعايىنداس, بىراق ودان دا كۇردەلى سپورت ءتۇرى بولاشاقتا وليمپيادا باعدار­لاماسىنا ەنىپ جاتسا, تاڭعالماۋ كەرەك. ياعني سپورتتىڭ وسى ءتۇرىن قازاق ەلى دە جاتسىنباۋى كەرەك, – دەيدى م.اعزاموۆ.

وڭداسىن ەلۋباي,

جۋرناليست

وسكەمەن