فورۋمعا قاتىسۋشىلار شارا باستالماس بۇرىن بەكاسىل بابا كەسەنەسىنە بارىپ, قۇران باعىشتادى. مۋزەيىمەن تانىستى. كەڭەسارىق اۋىلىنداعى ەسكەرتكىشىنە گۇل شوقتارىن قويدى.
قاسقاسۋدا قازاق-قىرعىز زيالىلارى باس قوسقان بەكاسىل بيبولات ۇلىنىڭ 200 جىلدىق مەرەيتويىنا قازاقستان پرەزيدەنتىنىڭ كەڭەسشىسى مالىك وتارباەۆ ارنايى كەلىپ, پرەزيدەنتتىڭ قۇتتىقتاۋىن جەتكىزدى.
«قاسيەتتى تۇركىستان توپىراعىندا دۇنيەگە كەلىپ, ۇلت رۋحانياتىنىڭ دامۋىنا زور ۇلەس قوسقان عۇلامانىڭ «زيكزال» اتتى ەڭبەگى حالقىمىز ءۇشىن اسىل مۇرا. قازاق رۋحانياتىنداعى الىپ تۇلعالاردىڭ ءبىرى ءماشھۇر ءجۇسىپ كوپەي ۇلى عۇلاما بەكاسىل بيبولات ۇلىن اسا قۇرمەتپەن ۇستاز دەپ مويىنداپ, ونىڭ «زيكزال» اتتى ەڭبەگىن باعا جەتپەس قۇندى عىلىمي تۋىندى دەپ باعالاعان» دەلىنگەن پرەزيدەنت قۇتتىقتاۋىندا.
سونداي-اق اتاۋلى شاراعا بەلگىلى قالامگەر, ءماجىلىس دەپۋتاتى ساۋىتبەك ابدراحمانوۆ, مەملەكەت جانە قوعام قايراتكەرى امالبەك تشانوۆ, قىرعىزستاننان كەلگەن دەلەگاتسيانىڭ باسشىسى, حالىق اقىنى كوجوگەلدى كۇلتەگىن مەن وسى ەل جوعارعى كەڭەسىنىڭ ەكس سپيكەرى زاينيدين قۇرمانوۆ, تۇركىستان وبلىسى اكىمىنىڭ ورىنباسارى ساكەن قالقامانوۆ قاتىسسا, فورۋم مودەراتورى قازاقستان جازۋشىلار وداعى توراعاسىنىڭ ورىنباسارى اقبەرەن ەلگەزەك بولدى. سپيكەرلەر بابا مۇراسى تۋرالى وي قوزعاپ, رۋحاني ءىس-شارانىڭ دەڭگەيىن كوتەردى.
بەكاسىل بيبولات ۇلىنىڭ «زيكزال» اتتى تاعىلىمى مول شىعارماسى جايىندا ءزارىپباي ورازباي, اڭىز-اڭگىمەلەرى جايىندا ساۋىتبەك ابدراحمانوۆ, التىنبەك قۇرمانوۆ ارنايى بايانداما جاسادى. اناربەك ورمان «زيكزال» ەڭبەگىنىڭ پراكتيكالىق ءمانى تۋرالى پىكىرىن ورتاعا سالدى.
