سۋرەتتى تۇسىرگەن نۇربولات نۇرجاۋباي
كورمەنى قالا اكىمىنىڭ ورىنباسارى اقزيرا قاسىموۆا اشىپ, كوپ الدىندا فوتوسۋرەتشىگە شاپان جاۋىپ, قۇرمەت كورسەتتى. ءوڭىردىڭ جارتىعاسىرلىق تاريحىن فوتوعا اينالدىرعان كەش يەسىن قۇتتىقتاعان «سىر مەديا» جشس باس ديرەكتورى امانجول وڭعارباەۆ فوتوسۋرەتشى ەڭبەكتەرىنەن كولەمدى البوم ازىرلەنىپ جاتقانىن جەتكىزدى.
ەڭبەك جولىن اۋداندىق باسىلىمنان باستاعان بولات شاما ۇلى 45 جىل وبلىستىق «سىر بويى» گازەتىندە ەڭبەك ەتتى. ءار جىلدارى رەسپۋبليكالىق باسىلىمدار جاريالاعان فوتوكونكۋرستار بايگەسىن يەلەنىپ, الماتى مەن ماسكەۋ قالالارىندا, پولشا, ۋكراينا مەملەكەتتەرىندە كورمەسى ۇيىمداستىرىلعان. وتكەن عاسىردىڭ سەكسەنىنشى جىلدارى سىربويلىق فوتوسۋرەتشى تۋىندىلارى «سوۆەتسكوە فوتو» جۋرنالى مەن «يزۆەستيا» گازەتتەرىندە جارىق كوردى. قازاقستان فوتوجۋرناليستيكاسىنا سىڭىرگەن ەڭبەگى ءۇشىن «فوتوونەر قايراتكەرى» مەدالىمەن ماراپاتتالىپ, ەكسپو-2017 حالىقارالىق كورمەسى اياسىندا ەلورداداعى ۇلتتىق مۋزەيدە سۋرەتتەرى قويىلدى.
كورمەدەگى كوپ ەڭبەكتىڭ اراسىنان ەل تاريحىنا جازىلعان ايتۋلى وقيعالار مەن تانىمال تۇلعالاردىڭ ءومىرىنىڭ ءبىر ءساتىن عانا بەينەلەگەن فوتولار كوزگە شالىنادى. تاعى ءبىر قاتاردا اۋىل ءومىرى, ەڭبەك ادامدارىنىڭ تىرشىلىگى تاڭبالانعان تۋىندىلار ءتىزىلىپتى. فوتووبەكتيۆكە ىلىنگەن تابيعات قۇبىلىستارى دا كورمەدەن ورىن الىپتى.
قالالىق مادەنيەت جانە تىلدەردى دامىتۋ ءبولىمىنىڭ باسشىسى جاعىپار ءتاجماحانوۆتىڭ ايتۋىنشا, كورمە ساۋدا ورتالىعىندا اپتاعا جۋىق ۋاقىت تۇرادى, الداعى ۋاقىتتا ونى وبلىستىق كوركەمسۋرەت گالەرەياسىندا جالعاستىرۋ جوسپارلانىپ وتىر.
قىزىلوردا
