جاڭا جولداۋىندا مەملەكەت باسشىسى قاسىم-جومارت توقاەۆ ەلىمىزدىڭ الەۋمەتتىك-ەكونوميكالىق دامۋ باعىتىن بەلگىلەپ, ەكونوميكالىق ساياساتتىڭ جاڭا فورماتىن ۇسىنىپ وتىر. بۇل ورايدا كوپتەگەن فاكتورلار – ەلىمىزدىڭ سالىق جۇيەسىن تسيفرلاندىرۋ, ەلەكتر جانە كارىز جۇيەسىن جاڭعىرتۋ, تاريفتەردى رەتتەۋ بويىنشا كوپتەگەن كۇردەلى ماسەلەلەر كوتەرىلدى. اتاپ ءوتۋ كەرەك, مەملەكەت پەن جەكەمەنشىك سەكتوردىڭ بىرلەسە جۇمىس ىستەۋى, جەكە كاسىپكەرلىككە مەملەكەت تاراپىنان قولداۋ كورسەتۋ – بۇرىننان باسىمدىققا يە سالا بولاتىن. قازىرگى تاڭدا ۇلانعايىر دالامىزدىڭ باستى ماسەلەسى – رەسپۋبليكا جانە جەرگىلىكتى دەڭگەيدەگى اۆتوجولداردىڭ سىن كوتەرمەس جاعدايى بولىپ تۇر. اسىرەسە ءبىزدىڭ باتىس قازاقستان وبلىسىندا كۇيىپ تۇرعان تاقىرىپ! مەملەكەت باسشىسى جولداۋىندا قالاارالىق, اۋىلارالىق جول قۇرىلىسى بويىنشا ناقتى تاپسىرمالار بەردى. قازىرگى تاڭدا اق جايىق ءوڭىرى تۇرعىندارىن تولعاندىرىپ, حالىقتىڭ زار-مۇڭىنا اينالعان وسى ماسەلە تەزىرەك شەشىلسە دەيمىز.
كەز كەلگەن مەملەكەتتىڭ تىرەگى, كەلەشەگى – جاستار. قازىرگى تاڭدا بالا تاربيەسى, ۇرپاق تاربيەسى ءبىز ءۇشىن وتە ماڭىزدى. ويتكەنى ەلىمىزدىڭ ارى قاراي دامۋى, وركەندەۋى بولاشاق جاستاردىڭ قولىندا. بۇل جونىندە مەملەكەت باسشىسى اتاپ ايتتى. ءوز باسىم مەكتەپكە دەيىنگى ءبىلىم بەرۋ جۇيەسىنە ەڭ جوعارى دەڭگەيدە نازار اۋدارىلعانىنا قۋاندىم. وسكەلەڭ ۇرپاق بويىنا ءبىلىم مەن تاربيەنىڭ ىرگەتاسىن قۇياتىن جەر – بالاباقشا. الداعى كۇندەرى بالاباقشا تاربيەشىلەرىنىڭ مارتەبەسى كوتەرىلەتىنىنە قۋانىشتىمىز.
الەۋمەت ءۇشىن ەرەكشە اسەرى بار جاڭالىق – ەڭ تومەنگى جالاقى مولشەرىنىڭ ءوسۋى دەر ەدىم. مىسالى, وسىدان ءبىر جىل بۇرىن ەڭ تومەنگى جالاقى 60 مىڭ تەڭگە بولاتىن, ەندى ول 70 مىڭ تەڭگەگە دەيىن كوتەرىلەتىن بولدى. مەن وڭىردەگى جاستار رەسۋرستىق ورتالىعىنىڭ باسشىسى رەتىندە بۇل وزگەرىستىڭ ناقتى قانداي اسەرى بولارىن جاقسى بىلەمىن. ويتكەنى ەڭ تومەنگى جالاقى الاتىن توپتىڭ ەلەۋلى ءبىر بولىگى – جاستار. مىسالى «جاسىل ەل» قۇرىلىس جاساقتارى جاز مەزگىلىندە ءتۇرلى باعدارلاما بويىنشا قىزمەت ەتەدى. جالاقىنىڭ ءوسۋى جاستارعا قوسىمشا موتيۆاتسيا بولاتىنى انىق.
پرەزيدەنت الداعى جىلدا 100 مىڭعا جۋىق جاس جاڭادان جۇمىسپەن قامتىلاتىنىن ايتتى. قازىرگى تاڭدا باتىس قازاقستان وبلىسى جاستارىنىڭ 3,9 پايىزى جۇمىسسىز سانالادى. ەگەر مەملەكەت باسشىسىنىڭ تاپسىرماسى تولىعىمەن جۇزەگە اسسا, ءبىز ءبارىمىز وسى ىسكە جۇمىلساق, اقجايىق وڭىرىندە جۇمىسسىز جاس قالمايدى دەگەن ويدامىن.
قازىرگى تاڭدا جاستار اراسىنداعى كاسىپكەرلىكتى دامىتۋ, جاس كاسىپكەرلەردى مەملەكەت تاراپىنان قورعاۋ, قولداۋ بار ەكەنىن بىلەمىز. بىراق پرەزيدەنت جولداۋىندا ايتىلعانداي, جاستار كاسىبىن مەملەكەت تاراپىنان 2,5 پايىزدىق وسىممەن نەسيەلەندىرۋ – وتە ۇلكەن كومەك, قولداۋ بولماق. تەك بۇل باعدارلامانى جان-جاقتى تالقىلاپ, ءار وڭىردەن ۇسىنىس-پىكىردى جيناپ, ناقتى شەشىم قابىلداۋ كەرەك دەپ ەسەپتەيمىن.
جولداۋدا كوتەرىلگەن ەڭ ەرەكشە ءارى ماڭىزدى جاڭالىق – ەل پرەزيدەنتىنىڭ كەزەكتەن تىس سايلاۋى تۋرالى. قازىرگى گەوساياسي كۇردەلى كەزەڭدە بۇل وتە دۇرىس شەشىم. سەبەبى ناقتى رەفورمانى باستاپ, جۇزەگە اسىرۋ ءۇشىن جەتى جىل – جەتكىلىكتى ۋاقىت. ودان كەيىن ءماسليحات پەن پارلامەنت ءماجىلىسى دەپۋتاتتارىن سايلاۋ ناۋقانىندا ارەناعا جاڭا كادر, جاس بۋىن كوبىرەك شىعادى دەپ كۇتەمىن. بىزدە الەمدىك دەڭگەيدە ءبىلىمدى, ساپالى جاستار بار. حالىقتىڭ مۇڭ-زارىن تىڭداي بىلەتىن جاستار بار. جاڭا تولقىن دەپۋتاتتارى اراسىندا سولاردىڭ ۇلەسىن مولىراق كورگىم كەلەدى.
اسىلان تاپيشەۆ,
«باتىس قازاقستان وبلىسىنىڭ ازاماتتىق اليانسى» زاڭدى تۇلعالار قاۋىمداستىعىنىڭ پرەزيدەنتى,
باتىس قازاقستان
