دارىگەر تاپشىلىعى قايتسە شەشىلەدى؟

وسىدان ءبىرشاما ۋاقىت بۇرىن مىڭداعان دارىگەردىڭ شەكارا اسىپ كەتەتىنىنەن حاباردار بولعانىمىزدا تاڭ­عالعان ەدىك. ال جۇمىس ىستەپ جۇرگەن مامانداردىڭ 30 پايىزى زەينەت جاسىنا جەتكەنى كوپشىلىكتى ويلاندىرماي قويمايدى. ءتىپتى ەسەپ كوميتەتى ەلى­مىز بويىنشا مەديتسينا كادرلارىنىڭ تاپ­شىلىعى 23 مىڭعا جەتىپ, كادرلىق دە­فيتسيت ەكى ەسەگە دەيىن ارتقانىن حابار­­لا­­عان بولاتىن. ال وڭىرلەردە جاعداي قا­لاي؟ كادر تاپشىلىعىن جويۋدا جامبىل ­وبلىسىندا قانداي جۇمىس اتقارىلىپ جاتىر؟

ماسەلەنىڭ ءمانىسىن ءبىلۋ ءۇشىن وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆكە ارنايى جولىققان ەدىك. ونىڭ ايتۋىنشا, وڭىردە كادر تاپشىلىعى سەزىلەدى. الايدا جىل وتكەن سايىن اتالعان ماسەلەنى جويۋ جولىندا ايتارلىقتاي جۇمىس اتقارىلىپ جاتىر. جەرگىلىكتى بيۋدجەت ەسەبىنەن جوعارى وقۋ ورنىنا تۇسكەن ستۋدەنتتەر جىل سايىن وڭىرگە ورالۋدا.

«جالپى, وبلىستا جىل باسىنان بەرى دارىگەرلەر تاپشىلىعى 2021 جىلعى ەسەپتى كەزەڭمەن سالىستىرعاندا 1,9 ەسە تومەندەگەن. الايدا بىلىكتى دارىگەرلەردىڭ دەفيتسيتى ءالى دە ساقتالىپ وتىر. بۇگىنگى تاڭدا وڭىرگە 125 دارىگەر قاجەت بولىپ وتىر. جالپى, قالانى ەسەپكە قوسپاعاندا اۋىلدى جەرلەردە 61 دارىگەر جەتىسپەيدى. بۇگىنگە دەيىن وڭىرگە 23 جاس مامان كەلدى. اتالعان جاس مامانداردىڭ بەسەۋى قالاعا قونىستانسا, قالعان 18 جاس مامان اۋداندارعا جۇمىسقا ورنالاستى. ولاردىڭ ۇشەۋى بايزاق اۋدانىنا, بەسەۋى جامبىل اۋدانىنا, جەتەۋى قوردايعا, بىرەۋى تۇرار رىسقۇلوۆ اۋدانىنا, ەكەۋى مەركى اۋدانىنا جۇمىسقا ورنالاستى», دەيدى باسقارما باسشىسى جاعدايدى ءتۇسىندىرىپ.

ءا.قاليەۆتىڭ ايتۋىنشا, وڭىرگە كەلگەن جاس ماماندار الەۋمەتتىك قولداۋدان قۇر الاقان قالعان ەمەس. اسىرەسە اۋىلدىق جەرلەردە جۇمىس ىستەۋگە بەكىنگەن جاس دارىگەرلەرگە جان-جاقتى قولداۋ كورسەتىلىپ جاتىر ەكەن. بۇل جۇمىستار الداعى ۋاقىتتا دا ساتىمەن جالعاسىن تاپپاق.

ء«وڭىردىڭ اۋىلدىق جەرلەرىنە جۇمىس ىستەۋگە بارعان قىزمەتكەرلەرگە قولدان كەلگەن كومەكتىڭ بارلىعى كورسەتىلىپ جاتىر. ويتكەنى كادر تاپشىلىعىمەن كۇرەسۋ – ءبىزدىڭ مىندەتىمىز. اتاپ ايتار بولساق, الەۋمەتتىك قولداۋ كورسەتۋ ماقساتىندا جەرگىلىكتى بيۋدجەت ەسەبىنەن 64 مامانعا 800,0 مىڭ تەڭگە كولەمىندە اقشالاي كوتەرمەاقى ءبولىندى.

دەنساۋلىق ساقتاۋ سالاسىنىڭ 81 قىز­مەتكەرىنە (2021 جىلى – 58) رەسپۋب­لي­كالىق بيۋدجەت ەسەبىنەن تۇرعىن ءۇي ساتىپ الۋ نەمەسە سالۋ ءۇشىن الەۋمەتتىك قولداۋ كورسەتىلۋدە. ناقتىلاپ ايتار بولساق, 1 500 اەك-تەن اسپايتىن سومادا بيۋدجەتتىك نەسيە ءبولىندى (بايزاق اۋدانى - 14, جامبىل - 8, جۋالى - 7, قورداي - 6, مەركى - 11, مويىنقۇم - 5, ت.رىسقۇلوۆ - 6, سارىسۋ - 4, تالاس - 4, شۋ - 16).

اۋىلدار مەن اۋداندارعا قىز­مەت­كە ورنالاسقان دارىگەرلەر جەر­گىلىكتى اتقارۋشى بيلىك تاراپىنان قاراس­تىرىلاتىن كومەكتەن تىس قالمايدى. اۋدان اكىمدىكتەرى تاراپىنان جاڭادان كەلگەن ماماندار ءۇشىن كوممۋنالدىق قىزمەتتەرگە, وتىن, سۋ, كومىرگە ارنالعان شىعىنداردى وتەۋ ماقساتىندا ارنايى قاراجات قاراستىرىلعان», دەيدى باسقارما باسشىسى ماسەلەنىڭ مانىسىنە بويلاپ.

باسقارما باسشىسى كەلتىرگەن دەرەكتەرگە سۇيەنسەك, جاس مامانداردى تۇرعىن ۇيمەن قامتاماسىز ەتۋ ماسەلەسى نازاردان تىس قالماعان كورىنەدى. بۇل جۇمىس اۋدانداردا ناقتى قولعا الىنعان.

«تالاس اۋدانىنا كەلگەن جاس مامانداردى قاجەتتىلىگىنە قاراي تۇرعىن ۇيمەن قامتاماسىز ەتۋ جوسپارلانىپ وتىر. ودان بولەك, قورداي اۋدانىنىڭ اكىمدىگى جالدامالى پاتەردى قاجەت ەتەتىن مامان­دار­عا جاعداي جاساۋدى قولعا الماق. ءبىرىنشى جۇمىس ىستەگەن جىلى ءۇشىن اي سايىنعى جالداۋ قاراجاتى تولەنەدى. الايدا بۇل ماسەلە بويىنشا قولداۋ كورسەتۋ جاعى وبلىس ورتالىعى تاراز قالاسىندا قاراس­تىرىلماعان», دەيدى ول.

جالپى, وبلىسىمىزدا كەزدەسەتىن ەڭ تاپشى ماماندىقتاردىڭ ماسەلەسىن شەشۋ بويىنشا دا ناقتى جۇمىستار قولعا الىنعان. اتاپ ايتار بولساق, ءبىلىم بەرۋ گرانتتارىن كوبەيتۋ ماسەلەسى كۇن تارتىبىنەن تۇسكەن ەمەس. اتقارىلىپ جاتقان جۇمىستار قانشالىقتى ناتيجەلى بولاتىنىن ۋاقىت كورسەتە جاتار.

«جالپى, وبلىسىمىزداعى ەڭ تاپشى دەلىنگەن ماماندىقتاردىڭ ماسەلە­سىن مايشاممەن قاراپ وتىرعان جايىمىز بار. رەزيدەنتۋرانىڭ ءبىلىم بەرۋ گرانتتارىنىڭ سانىن ۇلعايتۋ باعىتىندا جەرگىلىكتى اتقارۋشى ورگاننىڭ گرانتىمەن س.اسفەندياروۆ اتىنداعى قازۇمۋ-دە جوعارى ءبىلىمدى كادرلاردى دايارلاۋ ءۇشىن جالپى مەديتسينا ماماندىعى بو­يىنشا 32 ازامات وقيدى. ولاردىڭ ون ەكىسى 2019 جىلى, ونى 2020 جىلى, تاعى ونى 2021 جىلى وقۋعا جىبەرىلگەن بولاتىن. جەرگىلىكتى اتقارۋشى ورگان­­نىڭ گرانتىمەن ءبىلىمىن ارتتىرۋعا بارعان سول قىز-جىگىتتەر جوعارى وقۋ ورنىندا تاجىريبەسىن تولىستىرعاننان كەيىن وبلىستىڭ مەملەكەتتىك مەديتسينا­لىق ۇيىمدارىندا 5 جىل جۇمىس ىستەۋ مىن­دەتتەمەسىن الادى. سونىمەن قاتار, جو­عارى وقۋ ورنىنان كەيىنگى ءبىلىمى بار كادرلاردى دايارلاۋ ءۇشىن 50 دارىگەر رەزيدەنتۋرادا وقيدى. ولاردىڭ قاتا­رى­نا 2019 جىلى وقۋعا تۇسكەن 12, 2020 جىلى قولداۋعا يە بولعان 10, 2021 جىلى وقۋ ورنىنا تۇسكەن 28 دارىگەر وقيدى. دەنساۋلىق ساقتاۋ مينيسترلىگىنە تاپشى ماماندىقتار بويىنشا 2022 جىلعا رەسپۋبليكالىق گرانتپەن 70 دارىگەردى رەزيدەنتۋرادا وقىتۋعا تاپسىرىس بەرىلگەن بولاتىن. ال جەرگىلىكتى بيۋدجەتتەن 30 دارىگەردى وقىتۋ جوسپارلانعان», دەيدى ءا.قاليەۆ.

البەتتە, جاۋاپتى مينيسترلىك پەن جەرگىلىكتى اتقارۋشى بيلىك تاراپىنان ناقتى جۇمىستار قولعا الىنىپ جاتىر. الايدا زەينەت جاسىنداعى كادرلار مەن زەينەت جاسىنا جاقىنداعان دارىگەرلەر الداعى ۋاقىتتا ورنىن بوساتاتىنىن, ال جوعارى وقۋ ورنىنا تۇسكەن ماماندار ۇزاق جىلدار بويى ءبىلىم نارىمەن سۋسىندايتىنىن ەسكەرسەك, كادر تاپشىلىعىن جاقىن ارادا تولىق شەشۋ مۇمكىن ەمەس.

جامبىل وبلىسى