ء«بىلىمدى ۇلت: تەرەڭ ءبىلىم, ەڭبەكقورلىق جانە وتانشىلدىق قاسيەت» تاقىرىبىندا وتكەن وبلىستىق تامىز پەداگوگيكالىق كەڭەسىندە وبلىس اكىمى ومىرزاق شوكەەۆ وسىنداي دەرەكتەر كەلتىردى.
«مەملەكەت باسشىسىنىڭ تاپسىرماسىنا سايكەس «جايلى مەكتەپ» ۇلتتىق قاناتقاقتى جوباسى اياسىندا ءۇش اۋىسىمدى, اپاتتى مەكتەپتەردى تولىعىمەن جويۋ كوزدەلىپ وتىر. سونداي-اق 300, 600, 1 200 جانە 2 500 ورىندىق جاڭا مەكتەپتەر سالۋ جوسپارلاندى. وسى قۇرىلىستىڭ ناتيجەسىمەن وبلىستىڭ 65 مىڭعا جۋىق وقۋشىسى جاڭا ءتيپتى مەكتەپتە وقيدى. وبلىستىق بيۋدجەت جانە «اۋىل – ەل بەسىگى» باعدارلاماسى اياسىندا 32 مەكتەپتى كۇردەلى جوندەۋدەن وتكىزۋگە قارجى ءبولىندى. مەملەكەت تاراپىنان وبلىسىمىزدىڭ ورتا ءبىلىم بەرۋ ۇيىمدارىنا قاجەتتى قارجى قارالىپ, جاڭا وقۋ عيماراتتارىمەن, ماتەريالدىق-تەحنيكالىق جانە وقۋ قۇرالدارىمەن قامتاماسىز ەتىلىپ, جاعداي جاسالۋدا. بىلتىر قىركۇيەك ايىندا تۇركىستان قالاسىندا 720 ورىنعا ارنالعان حيميا-بيولوگيا باعىتىنداعى نازارباەۆ زياتكەرلىك مەكتەبى اشىلىپ, 500 وقۋشى قابىلداندى. قوسىمشا بىلىممەن قامتۋ وبلىستا 70 پايىزعا جەتتى. وسى باعىتتا بىلتىر تۇركىستان قالاسىندا «وقۋشىلار سارايى», «اقجايىق» ساز مەكتەبى جانە FabLab (لابوراتوريالار فابريكاسى) اشىلىپ, 3 500-گە جۋىق وقۋشى قوسىمشا بىلىممەن قامتىلۋدا. ءبىز مۇنىمەن توقتاپ قالمايمىز. ءار بالانىڭ بوس ۋاقىتىن ءتيىمدى پايدالانۋعا ەرەكشە كوڭىل بولەمىز. وسىنداي يگى شارالاردىڭ ناتيجەسىندە وڭىردە جاسوسپىرىمدەر اراسىنداعى قىلمىس پەن قۇقىقبۇزۋشىلىق 26 پايىزعا تومەندەدى. بۇدان بولەك, ۇلتتىق قۇندىلىقتاردى, وتباسىلىق, رۋحاني-ادامگەرشىلىك تاربيەنى دامىتۋعا اتا-انالاردىڭ جاۋاپكەرشىلىگىن ارتتىرۋعا تىكەلەي ىقپال ەتەتىن «انالار», «اكەلەر», «ارداگەرلەر» كەڭەستەرىنىڭ جۇمىسىن ەرەكشە اتاپ ءوتۋ كەرەك», دەدى وبلىس اكىمى.
سونداي-اق ءبىلىم سالاسىنداعى ماسەلەلەر تالقىلانىپ, جوسپارلار باياندالعان جيىندا وبلىس اكىمى ەڭبەگىمەن دارالانعان ءبىر توپ ۇستازعا العىسحات, وقۋ-اعارتۋ مينيسترلىگىنىڭ ماراپاتتارىن تابىس ەتتى.
وبلىستىق ءبىلىم باسقارماسىنىڭ باسشىسى د.بولاتحان ۇلىنىڭ ايتۋىنشا, وڭىردەگى مەكتەپتەر جاڭا وقۋ جىلىنا دايىن. بيىل تۇركىستان وبلىسىنداعى مەكتەپتەردە 510 مىڭنان اسا وقۋشى ءبىلىم الادى. بۇل – رەسپۋبليكاداعى ەڭ ۇلكەن كورسەتكىش, ياعني ءاربىر جەتىنشى بالا تۇركىستان وبلىسىندا ءبىلىم الادى دەگەن ءسوز. مەملەكەتتىك بيۋدجەتتەن بولەك ورتا ءبىلىم سالاسىن جەكە سەكتوردىڭ ينۆەستيتسيالاۋى ارقىلى دامىتۋ قارقىندى جۇرگىزىلۋدە. وتكەن جىلمەن سالىستىرعاندا جەكەمەنشىك مەكتەپتەر سانى 17-گە ارتىپ (31%), بۇگىنگى تاڭدا 56-عا جەتىپ وتىر,
1 406 مەكتەپكە دەيىنگى ۇيىم قىزمەت ەتۋدە. بالاباقشا اشۋ كورسەتكىشى بويىنشا دا ءوڭىر ەلىمىزدە الدىڭعى ورىندا. تامىز كەڭەسىندە, سونداي-اق ءبىلىم ساپاسىن ارتتىرۋ, Turkistan bilimi ستراتەگيالىق دامۋ جوسپارىن ازىرلەۋ, كىتاپحانالاردى تسيفرلاندىرۋ, ۇستازداردىڭ ءبىلىمىن ارتتىرۋ, مەكتەپ تاپشىلىعىن جويۋ جانە وزگە دە ماسەلەلەر تالقىلانىپ, باياندامالار جاسالدى.
ايتا كەتەلىك, وتكەن وقۋ جىلىنىڭ قورىتىندىسى بويىنشا وقۋشىلاردىڭ ۇلگەرىم ساپاسى 69,4 پايىز بولىپ, الدىڭعى جىلمەن سالىستىرعاندا 5,7 پايىزعا وسكەن. ۇلتتىق بىرىڭعاي تەستىلەۋ ناتيجەسى بويىنشا رەسپۋبليكا كولەمىندە «100 ۇزدىك مەكتەپ» تىزىمىنە تۇركىستان وبلىسىنىڭ 11 مەكتەبى ەندى. بۇل كورسەتكىش بويىنشا تۇركىستان وبلىسى رەسپۋبليكادا ەكىنشى ورىندا.
تۇركىستان وبلىسى
