بالدىرعاننىڭ اناسى دارىگەرلەرگە بالانىڭ تىنىسى سوڭعى ەكى كۇن بەدەرىندە قاتتى وزگەرگەنىن, كەۋدە تۇسى سىزداپ, مازاسىزدانىپ كەتكەنىن بايقاعانىن بايانداعان. ۋچاسكەلىك دارىگەرگە بارعاننان كەيىن اناسى مەن بالاسى تۇرعىلىقتى جەرى بويىنشا اۋرۋحاناعا جاتقىزىلعان. ورتالىق اۋداندىق اۋرۋحانانىڭ ستاتسيونارىندا ءسابيدىڭ تامىر سوعۋى مينۋتىنا 260 كد دەيىن جەتكەن. بەيكۇنا سابيگە شۇعىل تۇردە كومەك كورسەتۋ ءۇشىن ساناۆياتسيامەن جومدب انەستەزيولوگيا, رەانيماتسيا جانە قارقىندى تەراپيا بولىمشەسىنىڭ مەڭگەرۋشىسى قۋاندىق امىرەقۇلوۆ بارعان. شۇعىل كومەك كورسەتىلگەننەن كەيىن تىكۇشاقپەن وبلىستىق سانيتارلىق اۆياتسيا جەلىسى بويىنشا وبلىس ورتالىعىنا جەتكىزىلدى. مۇندا جومدب سوماتيكالىق كورپۋسىنىڭ رەانيماتسيا بولىمشەسىنە جاتقىزىلدى. ونداعى دارىگەرلەر ءتيىستى كومەكتىڭ ءبارىن كورسەتتى.
قابىلداۋ كەزىندە داگىرەرلەر بالانىڭ جۇرەك ىرعاعىنىڭ باياۋلاپ, تىنىس الۋىنىڭ بۇزىلۋىنا بايلانىستى جاعدايىنىڭ كۇرت ناشارلاپ كەتكەنىن اڭعارعان. ەسىن جوعالتقان ءسابيدىڭ جۇرەك قاعىسى قاتتى وزگەرگەن. ءتىپتى جيىلىگى مينۋتىنا 254-260 مارتە سوققان. جاعدايدىڭ ۋشىعا تۇسكەنىن تۇسىنگەن اق جەلەڭدى جاندار قول قۋسىرىپ وتىرمادى. شۇعىل تۇردە باس دارىگەردىڭ ورىنباسارىنىڭ, رەانيماتسيا ءبولىمىنىڭ مەڭگەرۋشىسى قۋاندىق امىرەقۇلوۆتىڭ, نەوناتولوگ دارىگەر شىنار حامباروۆانىڭ, بالالار كارديولوگى يرينا ءليدىڭ قاتىسۋىمەن كونسيليۋم ءوتتى.
ناتيجەسىندە, جاڭا تۋعان نارەستەگە Ch2a پاروكسيزمالدى تاحيكارديا, جۇرەك ىرعاعىنىڭ بۇزىلۋى دياگنوزى قويىلىپ, كونسيليۋم شەشىمىمەن اريتمياعا قارسى پرەپاراتتى ەكگ باقىلاۋىمەن تيترلەۋ باستالدى.
تەلەمەديتسينانىڭ كومەگىمەن ۇلتتىق عىلىمي كارديوحيرۋرگيا ورتالىعىنىڭ (نۇر-سۇلتان قالاسى) بالالار كارديولوگياسى ءبولىمىنىڭ مەڭگەرۋشىسى الميرا بايقالكانوۆامەن كەڭەس وتكىزىلدى. جۇرەك سوعۋ جيىلىگى جوعارى بولعاندىقتان, بالاعا سينحروندالعان كارديوۆەرسيا جاسالدى. سونىڭ ناتيجەسىندە ونىڭ جۇرەك سوعۋ جيىلىگى قالپىنا كەلدى.
بۇل دەرتتى دەر كەزىندە بايقاماسا, ءسابي ومىرىنە ۇلكەن قاۋىپ تونەتىنى ايتپاسا دا تۇسىنىكتى.
«بالالاردا جۇرەك سوعۋ جيىلىگى جاس ەرەكشەلىكتەرىنە قاراي بولىنەدى. جاڭا عانا دۇنيەگە كەلگەن نارەستەلەردە كۇندىك نورما مينۋتىنا 123-159 سوقسا, 1-2 ايلىق كەزىندە – 121-179, 1-2 جاستا – 89-150, 5-7 جاستا – 65-133, 12-15 جاستا مينۋتىنا 60-119 سوعۋى كەرەك.
جۇرەكتىڭ پاتولوگيالىق تاحيكاردياسى ادام بالاسىن قاتتى الاڭداتىپ, باسقا كۇردەلى اۋرۋدىڭ بەلگىلەرىن بايقاتادى. نارەستە وتە ءجيى تىنىس الىپ, بويىندا ۇيقىقۇمارلىق نەمەسە تىنىشتىق پايدا بولسا جانە تاماقتانۋدان باس تارتۋ سياقتى بەلگىلەر بايقالسا, وندا ءبىز ايتىپ وتىرعان اۋرۋ تۇرىنە شالدىعۋى ابدەن مۇمكىن. ال ەرەسەك بالالاردا اۋرۋ بەلگىلەرى مۇلدەم بولەك. ولاردا قان قىسىمى تومەندەپ, السىزدىك پايدا بولادى جانە تەرىنىڭ ءتۇسى كوك, بوزعىلت نەمەسە قىزارىپ, ءزار شىعارۋى قيىندايدى.
تاحيكارديانىڭ پاروكسيزمى ادام اعزاسى ءۇشىن وتە قاۋىپتى ەكەنى بەلگىلى. ونىڭ كەنەتتەن باستالىپ, اۋرۋ بەلگىلەرى جىلدام تاراپ, سوڭى قايعىلى جاعدايعا ۇلاساتىن كەزدەر دە ۇشىراسادى. جەدەل مەديتسينالىق كومەك بولماسا, كارديوگەندى شوكپەن, جۇرەك-وكپە جەتكىلىكسىزدىگىمەن قالىپقا كەلتىرىلەدى. پاروكسيزمالدى اريتميانىڭ سوزىلمالى اعىمىندا, قۇرىلىمدىق كارديوپاتولوگيا اريتموگەندىك نەمەسە كەڭەيتىلگەن كارديوميوپاتيا تۇرىندە قالىپتاسادى. ۇزاق قان اينالىمىنىڭ بۇزىلۋى بالانىڭ ءوسۋى مەن فيزيكالىق دامۋىن باياۋلاتادى. ەمدەۋ ناۋقاستىڭ جاعدايىنا جانە تاحيكارديانىڭ ەتيولوگياسىنا بايلانىستى», دەيدى جامبىل وبلىستىق كوپبەيىندى بالالار اۋرۋحاناسى باس دارىگەرىنىڭ ەمدەۋ ءىسى بويىنشا ورىنباسارى سەيداحمەت شىنىبەكوۆ.
13 كۇندىك ءسابي جومدب-دا 5 كۇنگە جاتقىزىلدى. دەر كەزىندە كورسەتىلگەن كومەكتىڭ ناتيجەسىندە جۇرەك سوعۋ جيىلىگى 138-140 ارالىعىندا بولدى. ايتكەنمەن ارا-تۇرا پاروكسيزمالدى تاحياريتميانىڭ شابۋىلدارى قايتالانىپتى. جوعارى مامانداندىرىلعان مەديتسينالىق كومەك كورسەتۋ ءۇشىن بالانى رەسپۋبليكالىق مەداۆياتسيا جەلىسى بويىنشا ۇعكو-عا 4-دەڭگەيدە تاسىمالداعان. بۇل مەديتسينالىق مەكەمەدە تولىق تەكسەرۋدەن وتكەننەن كەيىن «جۇرەك ىرعاعىنىڭ بۇزىلۋى», «پاروكسيزمالدى قارىنشالىق», «تاحيكارديا» دياگنوزى قويىلعان.
ەكى اپتا بويى بالانىڭ ءومىرى ءۇشىن بالالار كارديولوگياسى ءبولىمىنىڭ مەڭگەرۋشىسى الميرا بايقالكانوۆا جانە بالالار اريتمولوگياسى ءبولىمىنىڭ مەڭگەرۋشىسى ايان ابدراحمانوۆتىڭ باسشىلىعىمەن ءتۇرلى ماماندىقتاعى دارىگەرلەر كۇرەس جۇرگىزگەن. ديناميكالىق باقىلاۋ جانە زاماناۋي تەحنولوگيالاردى قولدانا وتىرىپ ەمدەۋدىڭ ناتيجەسىندە جاعداي تۇراقتانعان. بالانىڭ تىنىس الۋى قالىپتى دەڭگەيگە جەتكىزىلگەن. ناقتىراق ايتار بولساق, تىنىس الۋ جيىلىگى مينۋتىنا 22 تىنىس, جۇرەكتىڭ سوعۋ جيىلىگى مينۋتىنا 105 سوققىنى قۇراعان. ناتيجەسىندە, جاعدايى تۇراقتالعان كىشكەنتاي ناۋقاس تۇرعىلىقتى جەرى بويىنشا كارديولوگتىڭ باقىلاۋىمەن ۇيگە شىعارىلدى. قازىرگى تاڭدا بالانىڭ جاعدايى قالىپتى.
«سوڭعى جاعدايعا كەلەر بولساق, دارىگەرلەردىڭ دەر كەزىندە ىسكە كىرىسۋى ارقىلى بارلىق ماسەلە شەشىمىن تاپتى. جالپى, مۇنداي دەرت پايدا بولعان كەزدە اتا-انالار دارىگەرلەرگە جەدەل جۇگىنگەنى ابزال», دەيدى س.شىنىبەكوۆ.
جامبىل وبلىسى
